Read Western Dani Ndawi 69 Bible Online

Ndawi 69 - Western Dani bible

Ndawi 69

¹Ala wae. Niyo neebe paga taannabit nenggaanok kuli ari lagi wage me nagap ndaru o.

²Niyok ngga puubok nen purok alobok ambik me, yobok togon wangge, Niyo alobok nen neebe yubunnaburak eeke, Yi wu'nuk wage logonet aan lebennake, Eeke agaarik o.

³Togop ee'nake kenok, yeenggwa niruwak nduk, an noone nggwok mban ari neegak, Neebe ndeyak eerogo panege, Namili mbuk eerogo panege, Yeenggwa nirenok nduk, nogoba Ala pekkeegak mban eeke neegak, Nenegen andi eerogo panege, Eeke agaarik o.

⁴ An neeruwak ambik wonage yi kwak lek It ineebe ambik lombok nen An eekirak lek kagak ineebi nombakwi, Alom lek kagak ninom wim mbanak ineebe ambik nen Nenggaawak lek eerogo paniyak eekwi, Inamendek woolik neegak inoone omaawi paga, “Ninamendek obaane'me awi ya'niyet o,” yo'nugwi, Eeko agaarik o.

⁵Togop aret me, Ala wae. An wi negen maluk eerit nege nogo kat keenu age, Maluk eeke minggirak niniki wakkolage nogo, Kumaarak wonage lek kenegen kage, Eeke agandik o.

⁶Komaawi Lombok Menggendak nogoba Kaliku ALA wae. It aakumi iniki kat paga luunik wonogwe nogo, an eeke paga inendage maluk age, Iterali inogoba Ala yi wae. It aap kat mukkeren wogwe nogo An neebe paga inenggali ogwe, Eerugwaarik o.

⁷An kat koone yaga aret me, Aap nen meek eeppanugwi iinok, noone lek puk age, An nenggali wappanugwi iinok nena wutik wonage,

⁸Nowe-nawot nen, “Aap alik mendek,” nombakwi, Nit ninagalo ambit aret kwe, “Kat kwe alik aagaluk o,” yinuk, yo'nugwi, Eeko agaarik o.

⁹ Togop aret kwe, kawi wurik nogo op logowak nduk, Niniki aganggen kerek togon eerit nage paga Niniki lek ee'nake kagak, Kat meek eerogo pagagwi nogo an noba aret age menggerak.

¹⁰Mbi nengga'lek nambe mage negen logonet le ari neenok, Aakumi nen miyuk-meya eerogo panugwi,

¹¹Niniki wakkolage logonet, Yum nibinik maluk mendek yikkolage neenok, Aakumi nen, “Ha!” yinuk, nagi'ndok kanggwi,

¹²It wone mbangga tu unggwogo menggam kwi'ndak logonet, An nabok nggarik-nggarek yogwe, Aap amburu kumili aganaka nunggo logonet, Ndawi paga an nanep tenok-mbenok yogwe, Eeko agaarik o.

¹³Togop aret kwe, Kaliku ALA wae. Ndi eyom paga at oone konembunuk obeelom eeppigin, Nombareegindak nogo a'me lik ari kenok, Eeppanenok nduk, tamban mban eeke agarik o. Ala wae. It aakumi inabuwa lombok mbake, Ndi, yoraga'ndak liirogon eeppiinet nage, Eeke menggendak me, Noone yokkege yi, konembunuk, nagap ndaru o.

¹⁴An purok alobok me wonage me, wumbani wage, Ambinom yobok togon wangge neyo pi'nake, Ineebi nombako menggaarak ineenggime nen ndinnake, Niyo alobok ambik me nen pilanogo wumbani wage, Eeru o.

¹⁵Niyo nggwok wu'nuk wage logonet aan lebennake, Niyo alobok kiiniki paga an ndonggonnake, Lek ogo menggam mbuun ambe nen yonggo'nake, Eeke neyo, nagap ndaru o.

¹⁶Kaliku ALA wae. Aakumi kiniki kunik lombok aganake logonet, Obeelom eeppiinet wundi wage menggendak me, Noone yokkege nogo karuk konembunuk onggo yo'nege, Nabuwa nen kena koonogo pe'neege, Eeru o.

¹⁷An niniki abu lek ee'nake kagak, Kayeloman an keege neyo, Kenggaawak kumaappatinuk logorak mage o. Ata, mbet-mbet aret wone onggo yo'nege,

¹⁸Neya wage logomenggendik, nagap ndake, Nawim ineenggime nen wondet eerogo panege, Eeru o.

¹⁹An nendage maluk eerogo pugwi, Miyuk-meya eerogo panugwi, nenggali wappanugwi, Eeko menggaarak nogo liippiige, Nawim nen ee'nabit nugwi nogo kenegen iige, Eeke menggendak o.

²⁰Meek mban eerogo panugwi ti paga nen niniki wakkolage, Niniki abu lek ee'nake, Eeke kenok, Nabuwa nombaruwak nduk toorinakitak kwe, Nabuwa mbaka'lek aret wonogwe, Niniki eyak wappani woraawak lak, “Ao,” mbakitak kwe, Niniki eyak wappani waga'lek aret wonogwe, Eeko logonet,

²¹ Wam ambiki ale ambik kwak An nambi paga labunogo pugwi, Yi abu wonage neenok, anggur amburu ale mendek toologo wo'nugwi, Eeko nogogwaarak o.

²² Togop aret me, it kuwak eeppunuk Mbi noorak pipuk eeremenggaarak nogo ti, Towe wariyak keele pugu kwak age, It inom iniki kunik nogo, pagi wariyak ta'na malenak kwak age,

²³Yi mendek ndi mendek kaga'lek logowak nduk, inigen ogut age, Inamborowak tibik-tibik nugu logowak nduk, Inamborowak yomok ari, Eeruwak o.

²⁴Kat kanini inoba kwippiige, Kanini kani kunik negen inoba kwippiinet nage, Eeru o.

²⁵ Iname nobok lek aret wonogwe, Inawooliya wurik me aakumi yinggak-unggwagak eeka'lek wonogwe, Eerak logowak o.

²⁶It aap kat nen aaninggin inoba kwippiige nogo, it ti nen abunuk piyak-payak eerogo piigwi, It aap kat nen andi-pandi kaawak nduk, eerogo piige nogo it ti nen inabok mbanit nugwi, Eeko menggaarak me,

²⁷Inagap ndarak logowak nduk obeelom eeppiyoorak mage o. Ata, it maluk eekwi ti nogo Irip paga onggo mondok nggwik togon eeppiyaanok nduk, Maluk ambinom eerit nawak nen teppiyet o.

²⁸ Aap iniki abe koonak inendage liiru mbanak nogo Inom liiru mbanogo puurak mage o. Ata, ineenik logorak inendage mbuku paga Liiru mbanak wonage nogo kagaarogo piyet o.

²⁹Ala wae. An perak, tebenogo panugwi paga andi lombok ee'nake, Niniki aaninggin ndugu aago wonage, Eeke me, Kat nen nagap ndarogo aaninggin noba wonage nogo Teeluk eerogo panumunggun o.

³⁰Lembu warogo wokkugwi, Tapi ngguunok eyak warak iyogobit poorak warogo wokkugwi, Eekwi ti, Kinikilom mbuuluk mbake menggendak kwe, An nen ndawi wake logonet, kendage tiyappege, “Wa!” yokkege logonet, kalut eeke, eeke ti paga perak, Kinikilom nggwok lombok mbake menggendak o.

³²It aap tebenak wonogwe nogo nen inoone yokkugwi iinok, Kaliku ALA konengge, Kapuri keele maarak kat mbo piigeelik inabuwa mbake, Eeke menggendak me, It aap tebenak menggaarak nen An andi logonet, kendage tiyappege, Kogo logomenggaarik inale'nggen aret mbakwi, It aap kat mukkeren nogo menggaarak abok aret inale'nggen logonet eerit nugwi, Eeko logogun o.

³⁴Mbogut-nggween nen kat kalut eekwi, Niyo nggwok yenggenak laut inikime nogome Nugut-tiyak agan nugu menggaarak abok aret inom nen kendage mban tiyappugwi, Eeko logowak o.

³⁵At Ala nen o Tiyon ili eerogo pege, Yekura menggam kota-kota abok aret obaane'me wurogo pege, Eerigin o. Eeke kenok, at apuri o ti, ye mbambatinuk wonogwe,

³⁶At Ala ayeloman mini paga wiganak o ti, ineyate kwak kologwe, It aap at Ala iniki kunik eeko menggaarak nogo o time aret wonogwe, Eeko logogun o.