Read Western Dani Ndawi 71 Bible Online

Ndawi 71 - Western Dani bible

Ndawi 71

¹Kaliku ALA wae. Neebe op logorak kabu'me kwi'nari unggwagarak me, Nenggali aruwak nduk mbo paniyak ti mage o.

²Kat abe koonak mban eeke menggendak me, Yeenggwa nege, mbaganikit nduk koonogo panege, Noone yokkege yi, karuk liirogon konembunuk nagap ndake, Eeru o.

³Neebe op logokit nduk unggwi nagak nayugum mulunik kwak kat aret me, nobarogo panege, Nayugum lunik kwak, nayugum pak wurogo pereegi kwak, Kat aret me, nagap ndaruwak nduk, Wone lengganogo wumbege, Eeru o.

⁴Nogoba Ala wae. It maluk eeka ineenggime nen ndinogo wumbanege, Aap iniki maluk inogogumbuk ineenggime nen ndinnake, Eeru o.

⁵Kaliku Kitok Menggendak ALA wae. An wulaga tawe paga nen nok, yogondak kuli niniki kat paga lunik wonage, Kat paga niniki panggombunuk wonage, Eeke agarik o.

⁶Kat nen aret nagalo inikime nen wumbani wagagindak me, Nda'nagagirak nen nok, yogondak kuli niniki koba panggonak wonage agarik o. Togop me, an ko'lu-kii'me tiyappagage minggirak o.

⁷An op logorak narum waka komaawi lombok kat aret me, Aakumi ambik in wakkagak an aret agarik o.

⁸Kubondendok nen nok, oonikiya ari nage kagak, Kalut eeriyak mban nambe paga lunik wonage, Kat mondok iya logonet eeke menggendak nogo Noone puk aga'lek mbininogo yoranet nage, Eeke minggirak o.

⁹Nanggok ari wage neenok, mbo panege, Nomaawi lek ee'nabit unggwage kenok, Kenegen lambek eerogo panege, Eeriyak ti mage o.

¹⁰Ninom wim mbanak nen nabok mbanit nogwe, It an nooriyak mbakwi nogo Ambit me kuwak eeppunuk yogo logonet,

¹¹“Ala nen at muk mbo pegerak me, Mugurok nogo logomonggoorik, pigaganggwi niinok, Aap ambi nen at agap ndarugun lek aret,” yogwe, Eeko agaarik o.

¹²Togop aret yogwe me, Ala wae. An mbo paninuk nda noorak ti mage o. Nogoba Ala wae. Kat mbet-mbet aret yeenggwa niri mok o.

¹³Yeenggwa niri wage keenok, It an nabok mbanit nogwe nogo Inenggali mbakak kambit nawak o. It an nooriyak mbakwi nogo inendage lek ogwe, Inenggali mban inoba ninggirik wonage, Eerak logowak o.

¹⁴Togop eerugun kwe, an perak, Niniki mondok kat paga lunik wonage, Kalut eerit mban nage,

¹⁵Kubondendok nen nok, oonikiya ari nage kagak, “At abe koonak mban eerit nage menggerak o,” yinuk, agan nage, Aakumi inagap ndarogo piyoorak kuli pegendak nogo, Neenggo'lek kwe, yoranet nage, Eeke logogin o.

¹⁶Kaliku Kitok Menggendak ALA wae. Komaawi eeppanege keegak, eerit nage, Kalik mban abe koonak eerit nage menggendak me, Kiniki abe koonak menggendak nogo yoranet nage, Eeke logogin o.

¹⁷Nogoba Ala wae. Wulaga tawe nen nok, yogondak kuli kat mamunnake menggendak me, An kunduk, aa'nduk nen nok, yogondak kuli kat iya tit eeke menggendak nogo, Mbininogo yoranet nage agarik o.

¹⁸Togop aret me, Ala wae. Kat komaawi logonet iya eeke menggendak nogo, It yogondak ndarak yi, yorage, It peebi nda'narugun kunduk mbininogo yorage, Eeka'lek neegak, Nanggok ari nage, neeruwak kenen mbangge, Eeke neenok kat nen mbo paniyak ti mage o.

¹⁹Ala wae. Kat abe koonak mban eeke menggendak nogo Mbogut kuli ari laganggerak wonage o. Yi eekak ndi eekak iya lombok eeke nagandak Kat Ala kokwak ambi ta agaarik o? Lek aret o!

²⁰An andi-pandi kaakit nduk, Aaninggin mondok alik negen noba kwippanege, Ale-pale eerogo panege, Eeke nagandak kwe, An aa'nduk wonagagirak kwak eerogo panege, Nggween kiiniki paga ari nagarak nogo pilanogo mippani wage,

²¹Nayuk lek agaarak nogo nayuk warak eerogo panege, Kenegen lambek neegendak nogo Kena koonogo pe'neego logonet niniki eyak wappanege, Eerumunggun o

²²Nogoba Ala wae. Kat li'lak mban eeppanit wundi wage menggendak me, An nggitat mbuuluk eeke logonet, “Wa!” yokkege, Kat Kikak Nakeelik Alik Leenak Iterali inogoba yi wae. Nggitat kole eeke logonet ndawi paga kendage tiyappege, Eeke logogin o.

²³Nagap ndarogo paneegindak an nogo nen Ndawi paga kalut eeke logonet, Niniki ale'nggen lombok nen kuum-keek ari logogin o.

²⁴Ndi, it an maluk eerogo paniyak mbakwi nogo, inenggali ogwe, Iniki kobak a'nuk nogwe, Eekaarak me, Kubondendok nen nok, oonikiya ari nage kagak, Kat abe koonak mban eeke menggendak nogo Paganogo yoranet nege logogin o.