Read Western Dani Ndawi 72 Bible Online

Ndawi 72 - Western Dani bible

Ndawi 72

¹Ala wae. Kat a'me nggelok eeke logonet, Aakumi inowak loongge menggendak nogo, Aap endagembogut mamunege, Kat kiniki abe koonak logonet eerit nage nogo, Aap endagembogut aput lunege, Eeru o.

²Ti eeke keenok, Iniki abe koonak logonet kapuri inowak loongge, Iniki a'me nggelengga logonet, Kapuri tebenogo piinok wonogwe nogo inawone li'lak mbangge, Eerigin o.

³Ti eeke kenok, puut-puut tiyanak paga Yi mendek ndi mendek wonage mban me, Kologo logonet, iniki ugun tayenak wonogwe, It puut-puut teberogon paga wonogwe nogo nen Abe koonak mban eerit nogwe, Eeko logogun o.

⁴It aakumi inenggela'me tebenak wonogwe nogo, Aap endagembogut nen inawone liirogon mban mbangge, Ineenggi lek inapuri nogo yeenggwaarage, Eeke logogin kwe, It aap tebenogo piiga nogo perak, Aan lebenogo piige logogin o.

⁵Oonegen eya lek aga'lek wonage kagak, Tut lek aga'lek wonage kagak, Aakumi puk aga'lek ndaganabit nogwe iigak, At endagembogut mondok-mondok aret logogin o.

⁶O mayu iri'ngga paga wambit wage, Mayu wambit wage logonet nggween yawenogo pege, Eeke menggi kwak, At togop aret wonage logogin o.

⁷At wone lengganogo yorage kagak, It aap iniki abe koonak nogo wiganit wundi wogwe, Tut lek aga'lek wonage kagak Mbi ndonggok togon nunggo logonet, Iniki ugun tayenak wonogwe, Eeko logogun o.

⁸ At endagembogut ti, Yi niyo ndi niyo nggwok yenggenak nogo, mbambegak wone lengganogo yoranet nege, Niyo Eparat kuli nen nok o irip-irip kuli unde wonage, Eeke logogin o.

⁹It aakumi ya ye mbanggak nega nogo woraanuk, At abu'me tebe yinuk, ayuk wukwi, At awim nogo nen iyok paga pirik-perek yi wogwe,

¹⁰It aap o Taritit inoweewi inendagembogut inom, It aakumi niyo ogobak mbanogo pit nagagerak nogo paga menggaarak inom, nen Inarum wonage onggo at wogori wogwe, Aakumi o Tiyeba mendek inom, Teba mendek inom, Inoweewi inendagembogut nen yi mendek ndi mendek onggo lek we aret iri wogwe,

¹¹Aap inendagembogut abok aret woraanuk, At abu'me tebe yinuk, ayuk wukwi, Yi aakumi ndi aakumi abok aret at ayeloman ogwe, Eeko logogun o.

¹²It aap ineenggi lek tebenak wonogwe nogo nen, “Yeenggwa niret o,” yogwi iinok, yeenggwaarage, It tebenak wonogwe nogo, yeenggwaaroorak lek iinok, yeenggwaarage,

¹³It eekkoloorak meek inom, aap ineenggi lek inom, inabuwa mbake, It aap tebenak wonogwe nogo inagap ndake, Eeke logogin o.

¹⁴It tebembiirogo logonet maluk eeppiigwi, Inogogumbuk nen inoorit nugwi, Eekwi iinok, “It aakumi ti, iya lombok me,” Yinuk, ineenggime nen ndininake, Eeke logogin o.

¹⁵Aap endagembogut ti, mondok-mondok logowak o! Mbuti emas o Teba nen at wogori wogwe, Yi aakumi ndi aakumi at ake tamban eekwi, Inale'nggen nen at oba pugwi iigak o ambik me ari nage, Eeke logowak o.

¹⁶O at unde menggim gandum mban yagabit aago wonage, Puut-puut paga yarak yoguk-yagak lagangge, Nggween o Libanon paga yarak nogo, anggen li aago yugu menggi kwak wonage, Iri'ngga mili-mili kwit agan lagangge menggi kwak, Gandum yarak togop aret kwit agan lagangge, Eeke logowak o.

¹⁷At endage mondok-mondok ki aret wonage, Oonegen eya lek aga'lek wonage kagak, endage wiganinuk nage, Eeke logowak o. At eeppiinet nage paga Yi aakumi ndi aakumi abok nen inale'nggen kaagun me, “Kat kale'nggen at oba pege logot o,” yinuk, Ala yogo logogun o.

¹⁸Iterali inogoba Aliku Ala alik en Yi eeke ndi eeke abu iya lombok eeke menggerak me, At mondok tiyappugwi,

¹⁹At endage mondok-mondok tiyanak aret wonage me, At wogoppugwi, Eeko logowok o. O nggween paga yime abok aret At endage mban ndak warak logowak o. Abet aret yagi o. Abet aret yagi o.

²⁰At Itayi aput Ndawut nen ndawi wake logonet, agan wagagerak nogo ti aret o.