Read Western Dani Ndawi 73 Bible Online

Ndawi 73 - Western Dani bible

Ndawi 73

¹Ala nen at apuri Iterali nogo Iniki kikak naka'lek wonogwe iinok, Abet aret obeelom eeppiige menggerak o.

²Togop aret kwe, an perak, It maluk eeka ineenggi warak lombok ogwe nenegen iige, Iniki wogoppaka nen ineenggi warak eekkologwe ti, An togon eerikit lak, it mban eekkologwe yi, Neebi, lombok inombake, Eeke mbaki, Niyok eraabin tuk togon wambuurak ee'nake, An ngginnariyak negen ee'nake, Eekerak o.

⁴It aap ti, ineebe andi ambi eeginaka'lek obeelom inomaawi mban wonogwe,

⁵Aaninggin-paaninggin aakumi inoba age nogo, it inoba aga'lek we teeluk aret nogwe, Aakumi andi-pandi aganake nogo It eeginaka'lek wonogwe, Eeko menggaarak me,

⁶Iinggen inenggaanok me yippunuk nugu mengga kwak, Iniki wogoppatit nugwi nogo kin iigwi, Aap inayum yirippunuk, nugu mengga kwak, Inogogumbuk logonet eerit nugwi, Eeko menggaarak o.

⁷Iniki omaawi wonogwe me, Maluk eeriyak mban mugurok-magarok nugwi, “Maluk abu aret eeko o,” mbaka'lek eeriyak mban iniki koonogo pit nugwi, Eeko logonet,

⁸Aakumi obeelom eekwi iinok miyuk-meya eerogo piigwi, Aakumi iniki wakkolaawak nduk, agan nugwi, Iniki wogoppako logonet, Aakumi tebenogo piyoorak nduk agan nugwi,

⁹It inoone paga nen At mbogut paga menggerak nogo meek eerogo pugwi, Inamili irip paga it o nggween paga wonogwe nogo inabok mbanit nugwi, Eeko menggaarak o.

¹⁰Ti agan nugwi iinok, It Ala apuri nen yungguninuk it aap ti, muguren wogwe, Niyo ugun nunggwi kwak, Inoone liippega'lek ugun-ugun waganggwi, Eeko logonet,

¹¹“Ala ti, nonggop eerogo eenu age, At Tiyanak Lombok Menggerak nen Nit nonggop eerogo liippinanege, Eeriyak mbakop? Meek o,” Yinuk, yogo menggaarak.

¹²It aap maluk eeka ti, togop aret logonet, Inamendek ambinom mban kuwak eerogo pako nagaatik, Inale'nggen mbakak wonogo menggaarak o.

¹³An niniki kikak naka'lek eekkolage, An maluk eerulik nombaruwak nduk neenggi kooke, Eekirak nogo ti, We aanom warogo aret eekirak kagi o.

¹⁴O kubondendok nen nok oonikiya ari nage kagak, andi-pandi ee'nake, O kubondendok ari wage kenok, Eekirak onggo aaninggin noba kwi'nagak eeke, Eeke menggerak o.

¹⁵“It yogwe ti, an togop aret yigin o,” yinuk, yenetak en, Ala apuri yogondak ndarak ti, meek eerogo piyanetak o.

¹⁶Wone ti, abok aret liippikit nduk eekirak mendek, Aaninggin ambik me, liippuurak meek aret ee'nakerak o.

¹⁷Togop ee'nakerak kwe, Ala awi alik leenak menggim unggwi nanuk wonage logonet, It maluk eeka nen eerit nogwe iinok, Irip paga eeppiyoorak koonak nogo liippigirak o.

¹⁸Nogoba Ala wae. It aakumi ti, Eraabin perak togon wambuwak nduk eerogo piige, Ineebe nggarenak-pugunik eerogo piyaawak nduk yigeebu wuppiige, Eerumunggun me,

¹⁹It ineebe ne ambit liingge aret lek ogwe, Inagabiti nen inamineeri ne agan nage kagak, inenggaawak lek aret ogwe, Eerugun me, iya!

²⁰Nogo yogo logonet inabi abet ndendon kagaatak kwe, Ineenik a'nuk, kobak age menggi kwak, Nogoba wae. Kat mi'nage logomenggendik, “It aap yi, abe lek o,” yinuk, Ne ambit lek eerogo piyaamunggun o.

²¹An niniki andi lombok ee'nake, “Eeppanega'lek ao,” yinuk, Luwaap ngguurik negen malonnirit nege, Eerak negen logonet,

²²Aap wi iniki apit mengga kwak liippega'lek wonage, Kenggaanom paga wam inobaabut mengga kwak wonage, Eekirak o.

²³Togop aret eekirak kwe, Kat mbo panega'lek nimbirak wonage, Neenggi abe'nggan pi'nake,

²⁴Tu abe paga naakit nduk, naruk wake, Eeke logomenggendik, Kat tiyanak menggenom nimbirak logokit nduk, wo'nabumunggun.

²⁵O mbogut paga time an yeenggwa niriyak Aap alik ambi wonage mbaken? Lek aret o. Kat kalik nen aret yeenggwa nege menggendak o. Kalik aret yeenggwa nege menggendak me, O nggween paga yime aap ambi yeenggwa nege logorak an mondok mbaka'lek aret agarik o.

²⁶An neebe inom, niniki inom, abu ndeyak ee'nabit unggwage kwe, Nayugum lunik kwak an niniki Ala kat paga panggonak wonage, Neyate kwak kat paga niniki mondok lunik wonage, Eeke agarik o.

²⁷It aap kat mbo paganuk mbaganggwi nogo, Ineebe lek eerogo piige, It aap kat liirogon mukkeren naga'lek nogo, Abok aret inenggaawak lek eerogo piige, Eerumunggun o.

²⁸Togop aret eerumunggun kwe, an perak, Kat Ala nimbirak kunik logorak op aret mbake agarik o. Neebe op logorak nogo ti, Kaliku Kitok Menggendak kat ALA aret kombakirak me, Kat eerit nage menggendak nogo yoranet nage logogin o.