Read Western Dani Ndawi 74 Bible Online

Ndawi 74 - Western Dani bible

Ndawi 74

¹Ala wae. Kat nonggop nduk mondok-mondok mbo pinanege, Kandomba kwak ndegenninake menggendak nit aret niigak, Nonggop nduk kanini ninoba pinanegak mban eeke, Eeke agandik?

²O maan aa'nduk togon it aakumi Kat kapuri lombok logowak nduk leenogo piige, Keyate kwak kat mendek logowak nduk, wondet eerogo piige, Eereegindak nogo abeke, Ndi, kat wonagaginom puut Tiyon nogo abeke, Eeru o.

³O yigirik-noonom eerogo pegak mban eekwi nogo Kenegen pekkenet nage, Ninawim nen kat kawi alik leenak menggim Yi mendek ndi mendek telenak-mbelenak eerogo pegak mban eekwi nogo liippit nage, Eeru o.

⁴Kat ninom lambunggo monggom Kinom wim mbanak nen kuum-keek yogwe, Ineegin tiyak yegerak ninombaruwak nduk, Ineenu agak ndiimbu eeruwak walok eekwi,

⁵Ye mbuti waganogo eyo nappegak-wappegak muurit nogo mengga kwak eeko logonet,

⁶Yi mendek ndi mendek ineenggi amburu ayo waganogo pugu nogo, Inaye mbuti paga, inayeemet paga, Nggarenak-pugunik eerogo nappit nogwe,

⁷Kat kawi alik leenak menggim kani mbelanogo pugwi, Kat kendage ki menggenom nogome ogole warak logowak nduk, eerogo pugwi,

⁸It iniki mbako logonet, “It abok aret mondok tebenogo piyaawok o,” yinuk, yogwe, Kat kalut eeko menggam o yime abok aret kani mbelanogo pit nogwe, Eekaarak o.

⁹Ti eekwi iigak aret kwe, Nit nineenu agak ninigen kogwe, Aap Ala yorage kagak yo'niraga nen, “Yogop o,” yinuk, yo'nirogwe konenggwi, Eeka'lek niigak, Ne mande ari nagin nogo nit abok nineenggo'lek ogoorik o.

¹⁰Togop aret me, Ala wae. Kat kawim nen meek eerogo pagit unggwogwe, Kinom ogoorak nen kendage miyuk-meya eerogo pagagwi, Eekwi iigak Ne mande ari nagin o?

¹¹Keenggi abe'nggan awiikko'nok laganggendak nonggop nduk wonage agandik o? Keenggi kayum enoona porogo wonage nogo, Nggiginogo aakumi ti, pup eerogo piinet nage logot ubi!

¹²Togop aret kwe, Ala wae. O aa'nduk nen nowe kendagembogut kat aret wonage, O nggween paga yime kat nen aret ninagap ndake,

¹³ Komaawi paga kat nen aret niyo oolo mogonogo nggween kin eeppege, Waalo kole inanini warak niyo paga menggaarak nogo Kat nen aret inanobak tela eerogo piige,

¹⁴ Waalo kole Lewiyatan yi inikime menggerak nogo Kat nen aret anobak ambik nogo aan lebenogo pege, Eebe aret waganogo yi ta'ngge ndi ta'ngge o karume wonogo menggaarak nogo nawak nduk, Kat nen aret wogorage,

¹⁵Niyo nggwok wage, niyo eneeri wundi wage, Eeruwak nduk, Kat nen aret ena koonogo pit nage, Niyo nggwok nage mban menggerak nogo Kat nen aret poronogo pege,

¹⁶O liingge inom, oonikiya inom, kat nen mban wakkage, Oonegen tut imbirak inobaane'me lombok logowak nduk, Kat nen aret koonogo pege,

¹⁷Kat nen aret o nggween yi, “Irip ti kuli o,” yinuk, koonogo pege, Ndi, o kibi logorak inom, o mayu wage logorak inom, Abok aret kat nen mban koonogo pege, Eereegindak o.

¹⁸Togop me, Kaliku ALA wae. It kinom wim mbanak nen meek eerogo pagagwi nogo maloppiige, It aakumi iniki kobak nogo nen Inanini kombakwi nogo liippiige, Eeru o.

¹⁹Kat karowe enegen waanggo puume nogo, Waganogo nggwiya wogorage, Kapuri tebenogo piigaarak wonogwe nogo, Mondok-mondok kobak eerogo piige, Eeriyak mage o.

²⁰O nggween paga yime it aap inogogumbuk nen Aakumi maluk eeppiyaawok nduk kumaarak logonet, Wone kote koonogo pit nogwe me, Kat ninom wone abuk nggaruk togon koonogo pereegurak nogo abeke logot o.

²¹Aakumi tebenak wonogwe nogo inenggali mbakak Iniyokan woraawak nduk eeppiyoorak mage o. Ata, it aap meek mendek inom, tebenak wonogwe inom, Kendage tiyappit woraawak nduk eeppiyet o.

²²Ala wae. It kinom wim mbanak nen inoone agan nugwi nogo, Maloppiiga'lek wonage, It kinom ogoorak nen kat tebembagarak nduk, Eeko logonet, inoone nggwok ari lagangge nogo, Liippega'lek wonage, Eeriyak mage o. Ata, pilak ari logomenggendik kawone amburu mbanggolage, It aap iniki kobak mendek nen Kubondendok nen nok, oonikiya ari nage kagak, Miyuk-meya eerogo pagagwi nogo liippiige, Eeru o.