Read Western Dani Ndawi 77 Bible Online

Ndawi 77 - Western Dani bible

Ndawi 77

¹At Ala nen yeenggwa niruwak nduk, tamban eeke, Aruk konenuwak nduk, noone nggwok paga yoge,

²Aaninggin noba ari wage eyom paga nogoba Ala kwaake, Oonikiya paga neenggi tanep aga'lek nippunuk wonage, Eeke neegak kwe, Niniki kwi'naga'lek nggilu ari mban wonage,

³Ala oba abe'nage kenok, niniki oone ari, Ninikime koonit nage neegak, Nomaawi lek ee'nabit unggwage, Eekerak o.

⁴Ala nen nenegen kubuniyak meek eerogo panggerak me, Niniki piirik mban wonage logonet, noone yuurak meek ee'nake,

⁵O aa'nduk lombok eerit wagagerak nogo, niniki koonit nage, Yi tahun ndi tahun paga eerit wagagerak nogo niniki aberit nage,

⁶Oonikiya paga ndawi tiyanit nage, Ninikime nen mban mbininit nage, Niniki nen kwaarit nage, Eeppunuk, ari logonet,

⁷“At ninogoba Ala nogo nen Nit mondok-mondok mbo pinanigin ilik? Peebi ambinom ninabuwa nen obeelom eeppinanigin ilik?

⁸Iniki kunik ee'ninabit wundi wage menggerak nogo, Mondok lek agaarak kwa? Eeppinaniyak abuk nggaruk togon koonogo pereegerak ti, Mbeyok yereegerak ilik, nok eeppinanit nage logogin a?

⁹At Ala ninabuwa lombok mbake menggerak nogo, Kobak agaarak ilik? Ninabuwa mbaka'lek anini nen mondok mbo pinanigin kwa?”

¹⁰Yinuk, mbake nagarik, niniki wakkolage logonet, “At Tiyanak Lombok Menggerak eenggi abe'nggan paga eerit wage kagak, Yi tahun ndi tahun eerit wagagerak nogo Lek agaarak kwa?” mbareegirak mendek,

¹¹Aliku ALA nen eerit wagagerak nogo niniki aberit nage, O maan aa'nduk lombok eerubok mendek eerit wagagerak nogo ninikime aberit nage,

¹²At eerit wage menggerak abok aret ninikime mbiningge, Aa'nduk iya tit eerit wagagerak ninikime nen maloppit nage, Eekirak o.

¹³Eeke nagarik, nogoba Ala yoge logonet, “Ala wae. Kat eeke menggendak nogo ti, Abu obeelom mban eeke menggendak o. Kat ninogoba Ala mondok iya menggendak kwak Alik ambi wonage abu lek aret o.

¹⁴Kat Ala kalik mban iya tit eeke menggendak o. Aakumi inanebunu lombok inenggela'me Kat komaawi keyaawak nduk eeppiige,

¹⁵Keenggi omaawi paga kapuri Yakup paga wiganak inom, Yutup paga wiganak inom, wondet eerogo piige, Eereegindak o.

¹⁶Ala wae. Niyo nen enegen kat keege, Niyo enegen kat keenok, kilaarak-mogonik eeke, Yi kole laut inikime kilanogo nippit wage,

¹⁷Ndugwi nen mayu wuppit wage, Mbogut paga ngguurubu eeke, Kat nappege menggendak o kimbik nogo nggaganogo nappit nage, Eereegerak o.

¹⁸Ndi, o wiya nombok-kombok warit wage, Kangguurubu eerogo nappit nage, Kimbik pindanogo nappegendak nogo paga o nggween yi eya eerogo pege, O nggween yi nuk-nuk eeke logonet, na'ndo-wa'ndo eeke, Eereegindak o.

¹⁹Kat wagak karu ti, niyo nggwok laut aret o. Yi kole yenggenak laut kiiniki paga kiyok pit wagagindak kwe, Kiyok a'lip nogo aakumi inigen kaga'lek aret wonogogwaarak o.

²⁰Aap ndomba ndegeninaka nen Andomba wogoren nage menggi kwak, Kat nen Muta Karun imbirak yorage keegak, Kapuri wogoren wogogwaarak o,” Yinuk, yoreegirak o.