Read Western Dani Ndawi 78 Bible Online

Ndawi 78 - Western Dani bible

Ndawi 78

¹Kit nowe-nawot yi wae. An wone mamunggiraagin yi, Waabagip nduk, kinaruk konenggwi, Noone yokkiraagin yi, liippugwi, Eeko logonip o.

² An nen wone eegu laarak wone yokkirage, O maan aa'nduk nen eerit wogogwaarak alom wone mamunggirage,

³Ninombomini nen mbininogo yo'nirogwe iigak, Ninaruk konenggwi, nineenu ogwe, Eereegurak woneelom nogo mbininggirage, Eerigin o.

⁴Aakumi pi wakwi iigak, Aliku ALA nen eerit wagagerak wone inom, At omaawi paga eeke nagagerak wone inom, Tam warak eerit wagagerak wone inom, Nit kumaappunuk logorak lek o. Ata, it inombowologwe nit ninapuri mbininogo yorogwe, Ndi, it peebi nda'narugun nogo yorogwe, Eeko logogun o.

⁵At Aliku ALA nen It Yakup mendek eeko logorak wone lengganogo wumbege, “Yogop eeko logonu o, ndogop eeko logonu o,” yinuk, It Iterali mendek yorage, Eeke nagagerik, Ninombomini yorage logonet, “Kinombowologwe nda'naga'lek nda'narugun nogo, ineenu ogwe, Ti'nuk, it inapuri yorogwe, Eeko logowak nduk, Wone yi, kinapuri liirogon mamunirogo logonip o,” yinuk, Wone lengganogo yoragagerak.

⁶

⁷Wone lengganogo yoragagerak nogo ti, Inombomini ti eyom paga ndarak abok aret inogogumbuk inanobak yugum pogom iniki mbere logonet, Ala wone yorage nogo iniki liippega'lek ugun-ugun eerit nugu nogogwaarak nogo kwak lek, Inapuri-inombowologwe nen iniki Ala oba panggombugwi, Ala eerit wagagerak nogo kobak aga'lek abekwi, Wone, “Yogop ee'nu, ndogop ee'nu,” yugu nogo liirogon porogo wonogwe, Eeko logowak nduk, Wone lengganogo yoragagerak.

⁸

⁹It aap wim eeka Eparayim mendek ineegin-inomaale abu li'luk eerak porogo wonogwe kwe, Wim eekwi iigak, iniyokan yungguninuk mbaganeegwaarak.

¹⁰Ala nen Iterali inom wone abuk nggaruk togon Koonogo pereegerak nogo, it porogo logolik teppugwi, Eeko logorak wone yugu nogo, “Eeriyak nineebi o,” yinuk, mbo pugwi,

¹¹Eerit wagagerak nogo inomari eerogo pugwi, Iya tit eeke inigen kogogwaarak nogo kobak eerogo pugwi, Eereegwaarak.

¹² O Metit inom, o Towan kobappaga inom, Ninombomini inigen iigak, Ala nen eerubok mendek eeke logonet,

¹³ Yi kole yenggenak laut mogonogo yugum yagat wurik kwak abo mbanak nu'lek kagak, Ineebe niyo paga wumbiya wage,

¹⁴ O liingge kenok, ndugwi eya paga wogoren wage, Ndi, oonikiya age kenok, ndi eya paga wogoren wage,

¹⁵ Niyo ndonggok togon nawak nduk, O karume yugum lunik nggaganogo punuk, yi nggwok yenggenak laut negen kilanogo wumbi wage,

¹⁶Yugum me nen niyo eneeri wunabi wage, Niyo nggwok nage menggi kwak eerogo nappi wage, Eereegerak.

¹⁷Ti eerit wage kagak kwe, It nen Ala maluk mban eeppit wogwe, O karume at Tiyanak Lombok Menggerak nen yorage nogo eeriyak ineebi mbakwi,

¹⁸ Iniki koombunuk, Ala abut mbanggo logonet, “Niniki uugwe mbakwi ndak-ndak mbi wo'niret o,” yinuk, Inoone omaawi paga Ala yogwi,

¹⁹Ala meek eerogo pogo logonet, “Ala nen o karume yime ninambi noorak wo'niroorak ndak ya?

²⁰Yawi paga yugum wake kenok, Niyo yugum me nen kilak togon wundi wage, Yi niyo ndi niyo nagabit nage, Eereegerak kwe, Nit ninambi noorak wo'nirage, Nit at apuri enggaanggum noorak pipuk eerogo pinanege, Eeriyak op ya?” yinuk, yogwe, Eereegwaarak.

²¹Ti yogwi nogo Aliku ALA aruk konengge nagagerik, Anini ambik age, Anini kani kunik negen it Yakup mendek inoba piige, Anini alik negen it Iterali mendek inoba kwippiige, Eereegerak.

²²It nogo iniki Ala abet mbaka'lek wonogwe, “At nen aret ninagap nda'niren wundi nagin o,” yinuk, Oba panggombega'lek wonogwe, Eekwi iigak kwe,

²³At nen wone lengganogo ndugwi yorage, Mbogut tu paarogo pege, Eeke nagagerik,

²⁴ It mbi mana nawak nduk, Mayu kumulinggen negen wuppiinet wage, Mbogut paga nen gandum wugira wage, Eeke mbareegi,

²⁵Aakumi aret kwe, Mbi malayikat nonggo menggaarak mendek nunggwi, Inambi nggwik eerogo wugira wagagerak me, Ndonggok togon nenet wogwe, Eereegwaarak.

²⁶Oonegen lagi wage menggim pa'nggwe mbogut paga nen Wiya nabuninuk woraawak nduk teppege, At omaawi lombok paga wiya o ame pa'nggwe nen nappi wage,

²⁷O mayu wage menggi kwak, Enggaanggum liirubu kale'ngga negen wugira wage, Mbini niyo aa'nggi paga menggi kwak, ina'naabit warak towe nogo mayu negen wuppiya wage,

²⁸Inawooliya oore'nggam wanggwi, Inawooliya wurik yendok-wandok wanggwi, Eeruwak nduk koongge, Eereegerak o.

²⁹It iniki uugwe mbakwi ndak-ndak wogoragagerak Nenggak mban eeko logonet ndonggoppiyareegerak kwe,

³⁰Kagak, it noorak mbakaatak nogo, Ambinom nenggak mban eereegwaarak paga taganak inambeme ngget-ngget aago iigak,

³¹At Ala anini mi'nage logonet, Aap wakaa'ngget inenggela'me wonogwe nogo inoorogo piige, It Iterali inapuri awo tawe wonogwe nogo lek eerogo piige, Eereegerak.

³²Togop eeginake kagak kwe, it maluk kunik aret eekwi, Eerubok mendek eerit wage kwe, abet mbaka'lek wonogwe, Eeko nogogwaarak me,

³³Inambe aagi ne ambit lek age menggi kwak, It nda'nogogwam kuli ari naga'lek Koorok panggo pi wage, Inamineeri ne agan nage kagak, It nda'nogogwam ari nawak nduk eerogo piige, Eereegerak.

³⁴At Ala nen inooke kenok, it nen at mugurok nogwe, Yungguk togon pelen-pelen at mugurok nogwe,

³⁵“Ala ti, ninayugum nu'lek menggi kwak aret o. At Tiyanak Lombok Menggerak Ala ti, Wondet eerogo pinanega aret o,” yinuk, abekwi, Eeko logonet kwe,

³⁶Iniki laakot logonet, Inoone paga nen mban, “Kat iya o,” yogwi, Inoone pilit-pilit at yogwi,

³⁷ Iniki mbere logonet, at mugurok nogwe, Ala inom wone nggaruk togon koonogo pereegerak nogo liippega'lek ugun-ugun eerit nugwi, Eereegwaarak.

³⁸Togop eekwi iigak kwe, At Ala nen inabuwa mbake, It maluk eeko nogogwaarak paga inoorulik inomaluk nogo mari eerogo piige, “O wiya warit nage nagaatik, Yungguninuk warit wageelik kwak, Aakumi ti, kanggo menggaarak mendek aret o,” yinuk, Abeke nagagerik, anini wuk togon inoba piyoorak mbaketak kwe, Iniki yanggo yinuk puk age, At anini age nogo perak togon eeppiiga'lek tebenogo punuk wonage, Eeke nagagerak o.

³⁹

⁴⁰O karume nen kulinik-kalinik Ala nen yorage nogo, “Eeriyak nineebi o,” yinuk, yogwi, O anggu paga nen Ala iniki wakkolaawak, mba'nuk eeppugwi,

⁴¹Ko'lu-kii'me Ala abut mbanuwok nduk wakkagak eekwi, At Kikak Nakeelik Alik Leenak Iterali inogoba nogo Iniki andi eerogo pugwi,

⁴²At omaawi paga eeke nagagerak nogo mari eerogo pugwi, It tebembiinok wonogwe me, Wondet eerogo piyareegerak eyom nogo kobak aret wonogwe,

⁴³O Metit paga ineenu ariyak mendek iya tit eeke, O Towan kobappaga time eerubok mendek eeke, Eereegerak kogogwaarak nogo mari ogwe, Eereegwaarak.

⁴⁴ Inaniyo nage abok aret amiya eerogo pit nage, Niyo mbuulogwe nage nogo noorak meek eerogo pege,

⁴⁵ Ti'neebon nen ineebe nawak nduk nappiya wage, Inomanggen tayok yuwak nduk Ogolem inenggela'me nappiya wage,

⁴⁶ Ineyabu yarak yibila nen nawak nduk nappiya wage, Anggen yugu wurin mbanogo nawak nen nappiya wage,

⁴⁷ Inageyo anggur yarak nogo Mayu kumulinggen paga yigirogo puwak nduk wuppi wage, Inageyo wuli nogo mbuk aruwak nduk, mayu anggen engga paga ndoonogo pit wage,

⁴⁸Mayu anggen nen inaanggumi lembu-tapi inooruwak nduk nappi wage, O kimbik pindanogo inaanggumi kambin-ndomba inoba kwippiige,

⁴⁹Ala anini kani kunik negen age, Iniki aagi wo ari, anini wungge, Ineebi lombok inombake, eeke nogo, Aap inooka malayikat ineebe ambi aago nen wonok It aakumi inoba kwippiyaawak nduk, nappiya wage,

⁵⁰At Ala iniki yanggo yinuk puk arulik anini kani omoonuk negen inoba kwippiige, Inabuwa nen inili yaga'lek kugilengga inoba iyak wurogo piige, Eeke logonet,

⁵¹ Aakumi o Metit mendek inapuri manggu ndarak inooke, Aap Kam mendek inawooliyana aap inamburu abe paga Manggu ndarak nogo inooke, Eereegerak kwe,

⁵² Aap ndomba ndegeniren nege menggi kwak, at apuri ndegeniren wundi wage, Ndomba wogoren nage menggi kwak, o karume wogoren wage,

⁵³ At apuri inagabiti aga'lek kuurik me aret Ndegeniren wunda wage kagak, It inawim muguren wogogwaarak nogo, Niyo kole yenggenak laut inikime ndonggonogo piige, Eereegerak.

⁵⁴ Eeke nagagerik, At apuri wogoren at anggween abu abe leenogo pereegim ambe paga piya wage, O puut nggelok-nggobok me, Eenggi abe'nggan paga tebenggolagagim nogome piige,

⁵⁵ At aa'nduk a'nuk wage logonet, Yi aakumi ndi aakumi mugogo wumbiige, It aakumi inanggween ti, kuli mbanogo ineyate kwak It Iterali inanebunu lombok wogorage, Inanggween ti paga inawi wuppatinuk logowak nduk yorage, Eereegerak.

⁵⁶ Togop eereegerak kwe, Ala abut mbanuwok nduk wakkagak mban eekwi, At Tiyanak Lombok Menggerak nen yorage ineebi mbakwi, Aberak logorak wone yoragagerak nogo pipporogo wonaga'lek mbo pugwi,

⁵⁷Inombomini iniki mbere logonet, wone liippega'lek Ugun-ugun eerit nogogwa kwak ndak-ndak eekwi, Yigin amborowak kalok wurik me nambukaatak kwe, Ta'mbilak wuk ari menggi kwak it togop eerak wonogwe,

⁵⁸Ala anini mbake kagak, Puut-puut paga warogo wogorogo logorak ogobakkigikwi, “Inogoba nalik aret neegak eekwi yi, neebi o,” Mbake kagak inagugiwak ogobakkigirogo punuk alut eekwi, Eeko nogogwaarak.

⁵⁹Ti eekwi nogo Ala enegen iige nagagerik, anini mi'nage, It aakumi Iterali nogo abu mbo piige,

⁶⁰ At wonage menggim o Tilo nogo mbo punuk mbagangge, Aakumi inenggela'me at awooliya wurik nogo teppege,

⁶¹ Ala omaawi ineenu agak At oone yugu yonggolak aloobut mbanak nogo, Ndininuk nawak nduk mbo pege, At endage abu tiyanak ineenu agak aloobut mbanak nogo, Inawim ineenggime piige,

⁶²At apuri nogo wooluwak nen nawak nduk teppiige, Eyate kwak at apuri nogo anini inoba kwippiige,

⁶³Inapuri tawe nogo kani nen nawak nduk teppiige, Inapuri komologwe nogo aap lek me, inogonggelomini kolaga'lek logowak nduk eeppiige,

⁶⁴It aap Ala unde nogo inooruwak nduk mbo piige, Inakuwi togwe piyamenggaarak nogo inale yaga'lek logowak nduk, eeppiige, Eereegerak.

⁶⁵Eeke nagagerik, Aakumi nogo yogo nagaatik, mi'nogo mengga kwak, Inogoba Ala mi'nage, Aap anggur amburu neenok iniki lek agaatak wonagaatik pilak yogo mengga kwak, inogoba Ala pilak ari, Eeke nagagerik,

⁶⁶At awim nogo inakom niruk mbaganuwak nduk, muguren nage, It mondok-mondok inenggali mbakak nugu logowak nduk eeppiige,

⁶⁷It Yutup mendek inawooliya wurik nogo mbo piige, Anebunu Eparayim mendek miirinaka'lek nimippiige, Eereegerak.

⁶⁸Eeke logonet kwe, Anebunu Yekura mendek perak, miikkolage, Puut Tiyon iniki kunik eereegerak nogo leenogo pake,

⁶⁹At logowam abu abe tiyarogon wuke, Nggween alom yarogo pereegerak mondok menggi kwak, at awi togop aret nu'lek wurogo pege, Eereegerak.

⁷⁰ Eeke nagagerik, at apuri Yakup mendek, At eyate kwak Iterali mendek, Aap ndomba ndegeninaka kwak, ndegeninake logowak nduk, At ayeloman aap Ndawut leenogo pege, Kambin-ndomba inenggela'me nen wagangge, Andomba ndegeninake menggim nen wonok pi wage, Eeke mbareegi,

⁷¹

⁷²Ndawut iniki mondok abe koonak logonet, ndegeninake, Unde wogonaburak obam lombok logonet wogoren nage, Eeke nagagerak o.