Read Western Dani Ndawi 80 Bible Online

Ndawi 80 - Western Dani bible

Ndawi 80

¹ Kat Iterali ndegeninaka. Ninoone yokkugwi yi, karuk liirogon konengge, It Yutup paga wiganak ndomba negen ndegeninaka, Kerub aru-ogwe kagak oolo kwi'ndak wonage yi wae. It Eparayim inom, Mbeniyamin inom, Manate inom, Kat kabinak inoba pindanogo piige, Komaawi a'nuk, pilak ari logomenggendik, ninagap ndari wage, Eeru o.

³Ala wae. Nit aa'nduk wonogogukwak eerogo pinani wage, Ninagap ndarak logowok nduk, Kena koonogo pe'niige logonet, Keya ninoba pindanogo pinanege, Eeru o.

⁴Komaawi Lombok Menggendak Kaliku ALA wae. Nit kapuri tamban eekwi niinok, Ka'luk lagangge menggi kwak, Kanini aagi wungge keegak, ne mande ari nagin o?

⁵Ninambi wo'nirookwak Niniki wakkologo logorak mban eeppinanege, Ninaniyo wo'nirookwak ninale amburu mban Togolowa'na yagabit eerogo pogo logorak eerogo pinanege, Eekendak me,

⁶It ninaagan-ambokan wonogwe nogo nit wonogwe paga wone-wone yogwe, It ninom wim mbanak nen ninagi'ndok kanggwi, Eeko agaarik o.

⁷Komaawi Lombok Menggendak Ala wae. Nit aa'nduk wonogogukwak eerogo pinani wage, Ninagap ndarak logowok nduk, Kena koonogo pe'niige logonet, Keya ninoba pindanogo pinanege, Eeru o.

⁸Eyo anggur awi o Metit nen wonok wage nagagindik, It yi aakumi ndi aakumi kat nen mugogo wumbiinok, Eyo awi ti yarogo pege,

⁹Nggween amok mbanogo punuk yareegindak me, Eyo awi ti, omanggen kiiniki paga aret wurake, Eno'mbak o yi paga ndak warogo pege,

¹⁰Agalu'mak paga puut-puut nobarogo pege, Eyo nggabina yerek-nggorek kwe, At eno'mbak paga nobarogo pege,

¹¹Eno'mbak wiganogo yi laut kuli ari nage, Agarip ndarit niyo Eparat kuli ari nage, Eereegerak o.

¹²Ti eereegindak aret kwe, It yi aap ndi aap tu ti paga nogo logonet, Anggen yugu mbanggak nawak nduk, Nonggop nduk eyagat wurik minogo pereegindak o?

¹³Minogo pereegindak paga nggwiya eyonggaame nen Inogobak pilanogo pi unggwi wogwe, Towe-pagi karume mendek nen Anggen mbanogo na unggwi wogwe, Eeko agaarik o.

¹⁴Togop aret me, Komaawi Lombok Menggendak Ala wae. Kena aa'nduk menggendak ndak-ndak kena koonogo na'niya wage, Mbogut paga nen kenegen wu'niya wage, Eeru o. Keenggi abe'nggan paga eyo awi yake, Kat kaput kwak eyo eno'mbak wiganogo pit nage, Eekkolagagindak yi, Liirogon ndegengge logot o.

¹⁶Eyo yareegindak nogo muurogo punuk kani kunggwi, Kenete aagi eeppunuk mberiragagindak paga It kat kapuri inenggaawak lek eerogo piigwi, Eekwi me,

¹⁷At kat keenggi abe'nggan paga mi'ndak wonage nogo, Aap aret nda'nagagerak leenogo mippateegindak nogo, Eebe op logowak nduk arum logot o.

¹⁸Ninarum wonage keenok, nit kat mbo pagagun lek o. Nit aa'nduk wonogogu kwak eerogo pinanege keenok, Nit nen kat kendage kunogo yokkogo logogun o.

¹⁹Togop eeko logogun me, Komaawi Lombok Menggendak Kaliku ALA wae. Nit aa'nduk wonogogukwak eerogo pinani wage, Ninagap ndarak logowok nduk, Kena koonogo pe'niige logonet, Keya ninoba pindanogo pinanege, Eeru o.