Read Western Dani Ndawi 81 Bible Online

Ndawi 81 - Western Dani bible

Ndawi 81

¹Ninomaawi eeppinanega Ala aruk konenuwak nduk, Kinale'nggen nen ndawi wakwi, Yakup ogoba Ala liippuwak nduk, Kinale'nggen nen keekok yogwe,

²Ndawi tiyanggwi iigak, oone lobale eekwi, Nggitat nggwok oone aberogon eekwi, Nggitat mbuuluk paga eekwi, Eeko logonip o.

³ Tut awo ngget penengge paga, Tut abu penengge kenok, ninale'nggen nen laago lariyak koonak nogo paga, Ndomba eyak paga oone pu eeko logonip o.

⁴Ti eeko logorak koonak nogo ti, It Iterali eeko logowak nduk, wone lengganogo yorage, Yakup ogoba Ala nen, “Yogop eeko logonip o,” yorage,

⁵Ndi, inoone nit nineenggo'lek menggam o Metit nogo Ala nen tebenogo piyaakit nduk wage kenok, It Yutup paga wiganak mendek eeko logorak wone lengganogo pege, Eereegerak nogo ti aret.

⁶At nen ari logonet, “Aaninggin kinuumbaga wonage nogo an muk wagangge, Muun yarak kineenggime nen woppunuk, Kinuumbaga piyanggo monggotak nogo an mbo pege,

⁷ Aaninggin kinoba age paga, “Ninagap ndaru o,” yinuk, Yo'nugwi kiinok, kinagap ndake, O ngguurubu eeke enggela'me kumaarak logonet, Wone onggo yokkirage, Niyo Meriba eneeri wungge me nen kinabut mbangge, Eereegirak o.

⁸Togop me, kit an napuri Iterali mendek yi wae. Kurumbi yokkirage yi, liippugwi, Iterali mendek yi wae. Noone koneniyak mbakwi kenok, kinaruk konenggwi, Eeko logonip o.

⁹ Kit inenggela'me nen an mu'niren wogwe nobaane'me alik ambi mugurok nogwe, An nalut eekwi nobaane'me Aap nggiru inagugi ayuk wuko logonet alut eekwi, Eeriyak mondok mage o.

¹⁰O Metit nen wokkiren wundi wagagirak Naliku kinogoba Ala an aret o. An aret me, towe oo'nu inambe a aago wonogwe me Inagalo kumunuk mbanogo inambeme piya wage menggi kwak, An togop aret eeppinagage logorak mbakirak kwe,

¹¹Kit an napuri noone kinaruk konenggwi, Kit Iterali an noone liirogon waganggwi, Eeriyak, Nineebi o, Yinuk, yogo mbareegup,

¹²Kinanobak yugum pogom wonogwe me, Kinombaalombok o, yinuk, mbo pinagareegirak o.

¹³Kit an napuri noone liirogon konenggwi, Kit Iterali an nen yokkirage ndak-ndak eerit nogwe, Eeko logonetak en,

¹⁴An nen mbet-mbet kinawim nogo tebenogo piige, Ndi, neenggi omaawi paga kit eeppinagagwi nogo melak togon it kinom ogoorak nogo eeppiige, Eeke logonetak o.

¹⁵It aakumi Naliku ALA ineebi nombakwi nogo Yipik agan nabu'me kwi'nari wogo logonetak me, Aaninggin inoba piyaminggirak mondok-mondok inoba wonage kagak,

¹⁶Kit an napuri nogo perak, Gandum abe mendek namunggup nduk wokkirage, Yugum enoona nen nggiin amburu ndonggok togon namunggup nduk wokkirage, Ee'ne, mbakirak kwe, Lek me, Ao, mbake agarik o,” Yinuk, yoragagerak.