Read Western Dani Ndawi 85 Bible Online

Ndawi 85 - Western Dani bible

Ndawi 85

¹Kaliku ALA wae. Kat kanggween nogo ili eerogo pege, Yakup paga wiganak aa'nduk wonogogwa kwak Obeelom eerogo piige,

²Kapuri maluk eeko nogogwaarak nogo mari eerogo mbo pege, Inomaluk taborogo piige,

³Mberirage nagagindak nogo mberiraga'lek teppiige, Kanini kani kunik negen inoba piige nagagindak nogo tebenogo pege, Eekendak o.

⁴Nit ninagap ndaka Ala wae. Nit aa'nduk wonogogu kwak eerogo pinanege, Nit eekwi paga keebi ninombake nogo mbo pege, Eeru o.

⁵Kanini mondok-mondok ninoba pinanege, Ninapuri nda'narit wundi woraagun nogo Kanini inoba piinet nage, Eeke logorak op a?

⁶Kat eeppinanemenggendak paga Kapuri ninale'nggen kombako logowok nduk, Aa'nduk wonogogu kwak obeelom eeppinaniyak lek mbaken?

⁷Kaliku ALA wae. Kat nen ninabuwa mban mbarit wundi wage nogo Nit nineenu aruwok nduk eeppinanege, Ninagap ndarak logowok nduk eeppinanege, Eeru o.

⁸At Aliku ALA nen, “An napuri nake leenak menggaarak nogo, Iniki ugun tayenak logowak nduk eeppiyaagin koonogo pigirak me, Iniki lek logonet, eerit nogo nogogwam iniyokan yungguninuk maluk eerit nagwaarik o,” Yinuk, an yo'nege nogo naruk konengge agarik o.

⁹Nit ninanggween yi paga At endage abu tiyanak logowak nduk, It aap Ala inagabiti mbako menggaarak nogo Inagap ndariyak panggo yi wage mbake agarik o.

¹⁰At abuwa nen iniki kunik ee'ninake, Yo'niragaatak nogo li'luk eeppinanege, Eeriyak nogo imbirak lambuk ari, Iniki abe koonak logorak inom, Iniki ugun tayenak logorak inom, Keyage linggik-kambuk yogwe, Eeko agaarik o.

¹¹Abe liirogon eeka nogo ti, O nggween paga yime nen mbilangge, Abe koonak a'me nggelok mban eeka nogo ti, mbogut paga nen enegen wu'nari wage, Eeke agaarik o.

¹²Aliku ALA nen obeelom eerogo pinanigin me, Nit ninanggween paga anggen obeelom mban yi'nage logogin o.

¹³Waga'lek kagak, Ala woraawak nduk, Aa'nduk kiniki obeelom logonet, A'me nggelok mban eerit namonggotak paga at aru pipuk eerogo pogo logomunggup o.