Read Western Dani Ndawi 9 Bible Online

Ndawi 9 - Western Dani bible

Ndawi 9

¹Kaliku ALA wae. Niniki abe paga lombok nen, “Wa,” yokkege, Yi mendek ndi mendek abok iya lombok eerit nage menggendak nogo mbininogo yorage, Eeke logogin o.

²Kat Tiyanak Lombok Menggendak yi wae. Kat lombok keenok, nale'nggen mbake, Niniki ale'nggen kani omoonuk negen nggelok ari, Ndawi wake logonet kendage tiyappagage, Eeke logogin o.

³Kat wone lengganogo yorage menggenom kwi'na'nuk, eekaatak nogo liirogon inowak loongge, Nawone inom, nobaalombok eeriyak inom, koonogo panege, Eekendak me, Nawim nowagam nen kole mbaganit nogwe, Kenegen keegak iniyogobit lik togon kambit nogwe, Eeko agaarik o.

⁵Kat nen yi aakumi ndi aakumi mberirage, It maluk eeka nogo lek eerogo piige, Inendage mondok-mondok lek logowak nduk, kagaarogo piige, Eekendak o.

⁶Ninom wim mbanak maluk inoba ariyak koonak nogo Muk aret inoba agaarak me, mondok aret logogin o. It wonogo menggam kota-kota abok aret Eyo omanggen negen kinogo piigendak me, Inoba kunduk, aberak logogun mondok lek o.

⁷Kat Kaliku ALA mondok-mondok wone lengganogo yorage logomunggun o. Aakumi inowak loongge logowam koonogo pege,

⁸Aakumi nggween paga wonogwe nogo a'me nggelok inowak loongge, Yi aakumi ndi aakumi inawone ndak-ndak koonogo yorage, Eerumunggun o.

⁹Kaliku ALA nen it tebenogo piinok wonogwe nogo nobaarogo piige, “Nonggop eeruwi?” yinuk, iniki piirik wonogwe iinok, kumaarogo piige, Eeke menggendak o.

¹⁰It aakumi iniki Kaliku ALA koba panggombunuk mukkeren wogwe iinok, Kat mbo piigeelik me, Kendage inom, eeke menggendak inom, ineenu nogo nen Iniki koba panggombunuk aberak menggaarak o.

¹¹Togop me, kit aakumi yi wae. Aap inamiya wunabeegwaarak inamee'nggo wagangga Aliku ALA aret me, at nen aberinake, It tebenak wonogwe nogo nen, “Yeenggwa niret o,” yinuk, yogwe iinok, “Inobaalombok o,” yinuk, mbo piiga'lek aruk konengge, Eeke menggerak me, Aliku ALA wone lengganogo yorage menggim o Tiyon wonage nogo, Alut eeko logonet ndawi wakwi, Eerit nage menggerak nogo, yi aakumi ndi aakumi inenggela'me yoranet nogwe, Eeko logonip o.

¹³Ndi, Kaliku ALA wae. It an ineebi nombakwi nogo nen Andi-pandi eerogo panugwi yi, iyet o. An o Tiyon Aagalukwe kota tu unggwogo menggam logonet, Kat eeke kabok paganogo yorage, Nagap ndaremenggendak paga nale'nggen mbake, Eerikit nduk, Kambunuk tu unggwi nogo menggam pani wanggwi me, Nabuwa mbake, waganogo nippani wage, Eeru o.

¹⁵It yi aakumi ndi aakumi nen Wam labu pugu kwak nggween kabunogo pereegwam it aret yobok togon wanggwi, Ndi, keele pereegwam it aret iniyok nggerenggologwe, Eekaarak o.

¹⁶At Aliku ALA nen eekaatak a'me nggelok eeppiige menggerak kenok, Endage wigak yereegerak me, It maluk eeka nen keele pereegwaarak paga it aret ggerenggologo menggaarak o.

¹⁷It aakumi maluk eeko menggaarak nogo ti, Kambunuk nogo menggam unggwi nogwe, Ndi, yi aakumi ndi aakumi Ala mari eerogo pugwi nogo kunduk, Tu time aret nogwe, Eeko menggaarak kwe,

¹⁸It aap ineenggi lek nogo mondok kobak eerak wonogwe lek inoba aberinake, Ndi, it andi-pandi logonet, iniki lunik nogo mbeyok yaga'lek a'me nggelok eeppiige, Eerigin o.

¹⁹Kaliku ALA wae. It aakumi iniki mbakwi mban eerit nookwak, non mbanogo piige, Ndi, kat nen yi aakumi ndi aakumi aaninggin inoba kwi'naruwak nduk koonogo piige, Eeru o.

²⁰Kaliku ALA wae. It aakumi ti, Inamineeri ne agan nawak nduk eeppiige, Yi aakumi ndi aakumi nen, “Nit yi we aakumi aret,” mbaruwak nduk eeppiige, Eeru o.