Read Western Dani Ndawi 90 Bible Online

Ndawi 90 - Western Dani bible

Ndawi 90

¹Nogoba o. Ninombomini nda'narit wundi wogwe, Ninombowologwe nda'narit wundi nogwe, Eekwi iigak, Nineebe op logorak kabu'me unggwaga kat aret o.

²Puut-puut alom awo kwippega'lek logonet, O nggween yi, awo wakkaga'lek logonet, Mbogut-nggween awo wakkaga'lek logonet, O aa'nduk nen nok, age yobok kuli kitok mondok-mondok menggendak kat Ala aret o.

³ Tahun seribu eerit wage nogo ti, o ne ambit weege kwak kage, Ne ambit oonikiya paga tum wako mengga kwak kage, Eeke menggendak me, Kat nen aakumi inagabolo nogo Iniyokan nggween ari nawak nduk yorage logonet, “Aakumi inapuri yi wae. Kiniyokan liirubu ari nanip o,” Yinuk, yorage menggendak o.

⁵It aakumi ugun nogo yugwi iigak, iniki nggerok togon wonok nage menggendak o. It aakumi ti, O kubondendok iri'ngga anggup larak kwak wonogwe,

⁶Iri'ngga nogo o kubondendok anggup lake nagaatik, O kiyoma teebat a'nuk mbuk age menggi kwak wonogwe, Eeko menggaarak o.

⁷Kanini lombok ninoba pinanege paga nineebe lek ogwe, Kat nen mbe'nirage paga ninogut nggigik togon wungge, Eeke menggerak o.

⁸Nit maluk eekwi nogo kenegen niige, Ninomaluk nobarak wonage nogo, kabinak paga kin eeppege, Eeke menggendak o.

⁹Kat kanini ninoba pinanege paga Nda'nogogurak eyom nogo kuwagaluk eerogo pinani wage, “Ai-ao,” yogwe niigak, Nda'nogogurak yi tahun ndi tahun lek ari nage, Eeke agaarik o.

¹⁰Nit ndarak nineenik niigak tahun eeriyak ti, Tahun 70 aret kwe, Ninomaawi ee'ninake kenok perak, Ndarak niigak tahun 80 aret age menggerak o. Ti ee'ninake paga ninale'nggen mbarumonggoorak kwe, Aaninggin-paaninggin ninoba kwi'nage, Anggon-panggon ee'ninabit unggwage, Eeke kagak, Nda'nogogurak mbet-mbet lek ari nanuk, Nineenggi-niniyok lek aret, lek ogo monggoorak.

¹¹Kanini mondok iya lombok menggendak nogo, Aap ta nen eenu age, Kat kanini mondok iya eeppiige ndak-ndak it aakumi inagabiti kombakwi me, Ta nen aganak nuk ega'lek lambek puk wonage, Eerigin mbaken? Lek aret o!

¹²Niniki warak eekkolaawok nen nda'nogogurak nogo Nineenggi liirogon lingginiyak nduk mamunnirage logot o.

¹³Kaliku ALA wae. Ninabuwa mbaka'lek mbo pinaninuk keegak, Ne mande ari nagin o? Nit kayeloman mini yi, ninabuwa mbaru obak!

¹⁴Nit nda'nogogum eyom ari naga'lek kagak Niniki ale'nggen yogwe, ndawi lubuk yogwe, Eeko logowok nduk, Ninabuwa nen kiniki kunik ee'ninake nogo paga ko'lu-kii'me kubondendok ndonggok togon eeppinanegak mban eeke logot o.

¹⁵Andi-pandi eerogo pinanege keegak, Yi nogo ndi nogo yit nogwe, Aaninggin-paaninggin ninoba pinanege keegak, Yi tahun ndi tahun eerit nogwe, Eeko nogoorak ndak-ndak Ninale'nggen mbako logowok nduk, eeppinanege logot o.

¹⁶Kat eeke menggendak nogo Kayeloman mini nineenu aruwok nduk, kin eerogo pege, Kendage abu tiyanak, “Wi!” kugwi nogo Ninapurilogwe kunduk inigen keyaawak nduk eeppiige, Eeru o.

¹⁷Ninogoba Ala o. Kale'nggen ninoba pinanege, Nineenggi paga eerit nugwi nogo omaawi eerogo pege, Nineenggi paga eerit nugwi nogo lek age kero, nu'lek eerogo pege, Eeke logot o.