Read Western Dani Ndawi 91 Bible Online

Ndawi 91 - Western Dani bible

Ndawi 91

¹Aap ambi eebe op logokit nduk, at Tiyanak Lombok abu'me wonage kenok, At Omaawi Lombok Menggerak angguna'me logogin o.

²An nen Aliku ALA yoge logonet, “An neebe op logowam inom, Pak wurogo pereegim inom, ti, Niniki koba panggonak nogoba Ala kat aret o,” Yinuk, ari logogin o.

³Towe nggerok yuwak nduk keele pugume kat kenggaanok nggerok ari, Kugilengga iyak wuremenggerak paga keebe kangge, Eeke keyo, At abet aret kagap ndake,

⁴Towe a'naabit abu'na aagalogwe tebembiinok menggi kwak At eenggi paga nobakkake, Keebe op logonok nduk, at abu'me pagage, At yokkiremenggerak ndak-ndak li'luk eeppagage, Eeke ti, at aret me, Kanggeemu kwak, karin kwak at aret o.

⁵Togop aret me, Oonikiya paga kamineeri ne agan nawak nduk eekkake, Kinom ogoorak ambi nen omaale wundep wukkake,

⁶Nogo iniki mbere eeke paga kugilengga ndi wu'nage, O liingge-liingge andi At ambi oba agak eeke mendek kat koba ari wage, Eeke kenok, Kat kagabiti mbarumunggun lek aret o.

⁷Keeben abeenok aap ineebe seribu kanggwi, Keenggi abe'nggan aap ineebe sepuluh ribu kanggwi, Eerumenggaarak kwe, It inoba a'nuk kambemenggaarak nogo ti, Kat koba ari woraagin lek o.

⁸Ata, aganakwi nogo kenegen mban liippiige, It aap maluk mendek onggo eeppiige nogo Kat kenegen mban kage, Eerumunggun o.

⁹An neebe op logorak ti, “Aliku ALA aret o,” yinuk, ari, Ndi, an logorak nogo ti, At Tiyanak Lombok Menggerak abu'me aret wonage mbake, Eeke keenok,

¹⁰Maluk mendek ambi koba ari wage, Kugilengga kawooliya paga ndi wu'nage, Eerigin lek o.

¹¹ Kat yi eekak ndi eekak eerit nege keegak, It malayikat nen karum logowak nduk, Ala nen wone lengganogo yoramenggerak Wogo logomenggaarik,

¹² Yugum paga kowak kalok yi wangge keyo, Ineenggi ndoonak paga inaani wambi namunggun o.

¹³ Togop eerumunggun me, Singa inom, waalo muuru inom, tebenogo piigak nage, Singa anini ambik inom, waalo aakumi inooka inom, Kiyok aan lebenogo piinet nage, Eeke logomunggun o.

¹⁴At Aliku ALA nen ari logonet, “At aap ti, iniki kunik ee'nake me, agap ndake, Ala ti, an nogoba aret o, yinuk, ari me, arum wonage,

¹⁵Yeenggwa niru o, yo'nege kenok, yeenggwaage, Maluk eeppugwi iinok, ili ari, Aap ineenggime nen ndinogo wumbege, At endage tiyappege, Eeke logogin o.

¹⁶Iniki ndonggo yuwak nduk, At ndarak kagak eenik nggorek logorak eeppege, Kagap ndaka nogo ti, an aret, eenu eeppege, Eeke logogin o,” Yinuk, yereegerak.