Read Western Dani Ndawi 92 Bible Online

Ndawi 92 - Western Dani bible

Ndawi 92

¹Kat Tiyanak Lombok Menggendak yi wae. Kaliku ninogoba ALA, “Wa,” yokkugwi, Kendage tiyappagago logonet ndawi wakwi, Eeko logorak ti op aret o.

²Nggitat agale 10 aago paga inom, Nggitat oone abe eeka paga inom, Eeko logonet, Lek aga'lek kiniki kunik mban ee'ninake nogo Kubondendok paga yorogwe, Yoraga'ndak li'luk eeppiige nogo Oonikiya paga nen yorogwe, Eeko logorak ti kunduk op aret o.

⁴Kaliku ALA wae. Eerit nage menggendak paga niniki ale'nggen mbake, Keenggi paga nen eeke menggendak paga Nale'nggen nen ndawi lubuk ari, Eeke agarik o.

⁵Kaliku ALA wae. Kat eerit nage menggendak nogo ti, nggwok lombok wonage, Ndi, kiniki koonogo pege menggendak nogo ti, Tabarak lombok wonage, Eeke menggendak me, iya o!

⁶It aap iniki apit nogo nen ineenu ogwe, It aap iniki lek wi negen nen liippugwi, Eeka'lek nogo yi o.

⁷Iri'ngga awi mbilangge menggi kwak, Aap maluk mendek nogo togop aret awi mbilanit nugwi, It maluk eeko menggaarak abok nen Maluk wone mban wiganit nugwi, Eeko menggaarak kwe, Ineebe lek eerogo piyamenggerak mondok aret logogin o.

⁸Kaliku ALA wae. Kat perak, Mondok-mondok tiyanak lombok menggendak o.

⁹Kaliku ALA wae. Kat kinom wim mbanak nogo, Kat kawim nogo abet aret lek eerogo piige, It aap maluk eeka abok aret mak eerogo nappiige, Eerumunggun o.

¹⁰Ndi, an perak, Lembu nggwiya eyak pilanak menggi kwak, an nomaawi togop aret eerogo panege, Amburu ngget toolak paga noba kilirogo panege, Eereegindak o.

¹¹It ineebi nombakwi tebenogo piige nogo an nenegen abe nen iige, Ninom ogoorak aap maluk mendek mbaganggo logonet, Inoone agan nogwe nogo naruk konengge, Eekirak o.

¹²Eyo nggabu engga mili lagangge menggi kwak, Eyo nggabina Libanon mendek mili kwit agan lagangge menggi kwak, It aap iniki abe koonak nogo togop aret logogun o.

¹³It aap ti, Kaliku ALA kawi wurik me Eyo awi yarak mbilangge menggi kwak wonogwe, Kat ninogoba Ala kawoore'nggam Eyo yarak kwit agan lagangge kwak, wonogwe,

¹⁴Aap inanggok ari nogwe iigak, Eyo anggen yege menggi kwak, anggen abe yugwi, Eyo mbuk aga'lek ki menggi kwak, it togop aret wonogwe, Eeko logonet,

¹⁵“At Aliku ALA ti, iniki abe koonak mban wonage, Ninayugum lunik kwak wonage, Eeke menggerak me, Inikime maluk wonage abu lek aret o,” yinuk, yogo logogun o.