Read Western Dani Ndawi 96 Bible Online

Ndawi 96 - Western Dani bible

Ndawi 96

¹Kit aakumi abok nggween paga wonogwe yi wae. Aliku ALA konenuwak nduk, ndawi wakwi, Aliku ALA liippuwak nduk, Kit ndawi ngget pugu tiyanggwi,

²Aliku ALA ale'nggen mbaruwak nduk, ndawi tiyanggwi, at endage tiyappugwi, Kinagap ndake menggerak wone ko'lu-kii'me yoranet nugwi,

³At mondok tiyanak menggerak nogo, it aakumi lombok inenggela'me mbininogo yorogwe, At iya tit eeke menggerak nogo Aakumi inanebunu lombok yoranet nugwi, Eeko logonip o.

⁴Aliku ALA ti, mondok iya lombok me, At mban tiyappogo logorak ti, op aret o. Yi kugi ndi kugi abok aret inayuk warak aret kwe, At inirimbaga lombok me, at mban ayuk wuko logonip o.

⁵Yi aakumi ndi aakumi inagugi inayuk wukwi ti, Kugiwak ineenggi paga nen ogobakkigirik aret kwe, At Aliku ALA perak, Mbogut aret ogobakkigirogo pereegerak o.

⁶At endage tiyanak ayuk warak wonage kenok, “Wi!” ugwi nogo mban ndak warak wonage, At omaawi ayuk warak lombok menggerak nogo ti, At awi alik leenak menggim nogome ndak warak wonage, Eeke menggerak o.

⁷ Yi aakumi ndi aakumi kinanebunu lombok yi wae. Aliku ALA mban alut eekwi, “Kendage tiyanak komaawi ambik Kaliku ALA aret o,” Yinuk, at wogoppugwi,

⁸Aliku ALA endage abu iya me, tiyappugwi, At ake wogoriyak wonok at oore'nggam pi unggwi wogwe,

⁹Aliku ALA kikak nakeelik alik leenak mondok iya lombok menggerak me, Ayuk wuko logonet, alut eekwi, Kit nggween paga monggotak yi abok aret at enggaanom paga kinaganak nuk-nuk kirage, Eeko logonip o.

¹⁰Kit yi aakumi ndi aakumi inenggela'me logonet, “Aliku ALA ti, ninowe endagembogut aret o,” Yinuk, yogo logonip o. At o nggween yi abok aret Nu'lek eerogo pereegerak me, abolok yigin lek o. Aakumi inanebunu lombok eeremenggaarak nogo, At a'me nggelok inowak loongge logogin o.

¹¹At Aliku ALA wage, Aakumi nggween paga wonogwe nogo Inowak loonikit nduk wage, Eeke logomenggerik, It o yime menggaarak eeremenggaarak nogo A'me nggelok inowak loongge, Aakumi inanebunu lombok Eeremenggaarak ndak-ndak onggo eeppiige, Eeke logogin me, Kit mbogut yi, kinale'nggen mbakwi, Kat nggween yi, ndawi lubuk ari, Eeko logonip o. Niyo kole yenggenak inikime wonogwe abok aret inom inoonebu yogwe, Yabu wogo paga yi mendek ndi mendek yarak inom inale'nggen nen nugut-walek yogwe, Eeko logowak o. Ti eekwi iinok, Yi eyo ndi eyo eyonggaame wonogwe abok aret inale'nggen nen nggele'mbuk agan nogwe, Aliku ALA wage enggaanom paga ndawi wakwi, Eeko logogun o.