Read Western Dani Ndawi 99 Bible Online

Ndawi 99 - Western Dani bible

Ndawi 99

¹ At Aliku ALA endagembogut aret o. Endagembogut aret me, Yi aakumi ndi aakumi inaganak wake, Malayikat negen kerub aru-ogwe iigak, Oolo at wone lengganogo yorage menggim wonage kenok, O nggween yi, nuk-nuk ari, Eeruwak o.

²Aliku ALA o Tiyon time endage nggwok aret wonage, At abu tiyanak lombok me, Yi aakumi ndi aakumi at abu'me piinok wonage, Eeke menggerak o.

³At kikak nakeelik alik leenak endage mondok nggwok iya lombok me, Yi aakumi ndi aakumi at endage tiyappogo logowak o.

⁴At endagembogut mondok tiyanak wonage, Eekaatak a'me nggelok eeppiigo logorak inikilom mbake, Ndak-ndak eeppiinet nogo logorak wone lengganogo pege, Obeelom mban eerit nugwi wone inom, Eekwi a'me nggelok eeppiigwi wone inom, It Yakup paga wiganak eeko logowak nduk, Lengganogo yorage, Eereegerak o.

⁵Togop me, Aliku ninogoba Ala tiyappugwi, At kikak nakeelik alik leenak menggerak me, At wone lengganinake menggim tebe yinuk alut eekwi, Eeko logonip o.

⁶Aap Ala unde inenggela'me Muta Karun inom wonogwe, “Ninogoba Ala aret,” yogo menggaarak Inenggela'me aap Tamuwen wonage, Eeko logonet, “Yeenggwa niret o,” yinuk, Aliku ALA yogo mbareegwa, inoone konembunuk, Yeenggwaarage nagagerak o.

⁷ Ndugwi logonak enggela'me nen yorage kenok, “Yogop ee'nu ndogop ee'nu,” yorage nagagerak inom, Wone lengganogo yorage nagagerak nogo inom, Ineenggi liirogon pippunuk eeko nogogwaarak o.

⁸At Aliku ninogoba Ala ti, Inoone yogwi iinok, onggo yorage nagagerak o. It maluk eekwi iinok, onggo eeppiige nagagerak kwe, “Ala ti nineebi,” mbaka'lek, “Ninomaluk lek eerogo pinanega ti, Ala aret o,” Yinuk, mbako nogogwaarak.

⁹Togop aret me, Aliku ninogoba Ala tiyappugwi, At Aliku ALA ti, kikak nakeelik alik leenak me, At abuut abu abe alik leenak nogome ninendobanggun yindumbunuk alut eekwi, Eeko logowok o.