Read Western Dani Kini Wuppiige 1 Bible Online

Kini Wuppiige 1 - Western Dani bible

Kini Wuppiige 1

¹KINI WUPPIIGE WONE Aap Ndawut aput Iterali inowe endagembogut Talomo nen wone alom eenu paga kini wuppiige nagagerak yi aret o.

²Iniki warak logorak inom, inaruk wariyak inom, ineenu ogwe, Yi wone ndi wone alom kin kogwe,

³Iniki liippunuk eerit nugwi, iniki penenak paga eekwi, a'me nggelok eekwi, wi-wi aganaka'lek koonak mban eekwi, Eeko logowak nduk, Nonggoti eerogo mamunggologwe,

⁴Aap iniki yuundurak nogo iniki ngget paga wone koonggwi, Aap tawe nogo yi wone ndi wone ineenu ogwe, Iniki liippunuk eekwi,

⁵Wone yogo nogogwaarak alom inom, Eegu nobat wone inom, Wone it aap iniki warak nen yogwe inom, Iniki warak nen eegu laarogo yogwe inom, Nogo yelok kogwe, Eeko logowak nduk, Wone alom eenu paga kini wuppiige nagagerak nogo ti aret. It aap iniki warak nogo inaruk konembunuk Wone ambinom ineenu ogwe, Ndi, it aap wone mbet-mbet yelok kaga nogo Wone yi paga panggombunuk koonggwi, Eeko logowak o.

⁷ It aap iniki warak mamunggolaawok nduk eekwi ti, Aliku ALA inagabiti mbakwi ti aret kwe, Aap iniki lek wi nen perak, iniki warak ogwe, inaruk wakwi, eekwi ti, miyuk-meya eerogo pogo menggaarak o.

⁸Naput yi wae. Kogoba nen karuk wake nogo karuk konengga'lek taganogo pege, Ndi, kagalo nen wone mamunggege nogo, “We aret agan nege a,” yinuk, mbo pege, Eeriyak mage o.

⁹Karuk liirogon konengge kenok, iri'ngga anggen laambu mendaarak abu abe kanobak me yirik kwak, Iinggen amini mbanak kenggaanok me yirik kwak, aret logogin o.

¹⁰Naput yi wae. It aap maluk eeka nen kinikime manabi wogwe iinok, “E o,” yinuk, muguren noorak mage o.

¹¹It nen yokkogo logonet, “Aap ambi kok pippunuk, waruwok nduk, enaari nogwe, Aap ambi maluk eeka'lek ugun nage me, amendek ndinggologwe,

¹²Kambunuk nogo menggam nen aap yonggorinake menggi kwak, ineebe ineenik ngge-ngge ninambe me yonggorinakwi, Kanggaatak mbuun ambena wanggo mengga kwak, ineebe inaani aret yonggorinakwi,

¹³Inamendek onggo nggwok mendek nogo inagugun waganggo logomonggoorik, Niname yi mendek ndi mendek kugun wogo nogo mban yagabit eerogo pakwi, Eeruwok nduk, mok o.

¹⁴Kiniki nggaruk togon ninom noorak koongge keenok, Kolamonggoorak nogo ndak-ndak tumbukkologo logogun o,” yinuk, yokkugwi iinok,

¹⁵Naput yi wae. Kinom noorak mage o. Ata, kiyok awiirak logomunggun o.

¹⁶It aap ti, “A puk-puk,” yaga'lek perak togon maluk eerit nogwe, Aap inamiya mbet-mbet wunabit nogwe, Eeko menggaarak o.

¹⁷Yirowe-ndirowe abok inigen iigak, yilunnaruwak nduk, Yum mbiganogo nappugwi iinok, mbaganggwi iigak, We aanom warogo nappugu age menggerak kwe,

¹⁸It aap ti perak, inalik en aret wakkolaawok nduk, enaakkologwe, It inamendek aret lek eerogo pakwi, Eeko menggaarak o.

¹⁹Aakumi maluk eeppiigo logonet inamendek nabenogo kolaawok nduk eekwi onggo irip paga eeginaburak ti aret. Inamendek waganggwi ti nen it ineebe aret nggelenogo piige menggerak.

²⁰ Iniki warak ti nen tu nggwok paga oone nggwok agan nege, Kota oore'nggam aakumi konenuwak nduk, oone tiyarogon ari,

²¹At yugum pak wurik paga nen oone ari, Tu kota unggwi wogo menggam wone mbanit nage, Eeke yi aret.

²²Iniki warak nen ari logonet, “Aap kiniki yuundurak yi wae. Kiniki koongga'lek ugun wonogwe, Kit meek eerogo piiga nen aakumi meek eerogo piyoorak kinikilom mbakwi, Kit kiniki lek wi negen nen wone nineenu ariyak, Nineebi o, mbakwi, Eekwi kiigak, Ne mande ari nagin o.

²³An kinaruk wakirak nogo liirogon konenenetak en niniki ee'nake nogo kilikkirage, Ndi, niniki koonit nage nogo kineenu eeppinagage, Ee'netak kwe,

²⁴An nen wiigiragarak kwe, Ninaruk koneniyak nineebi o, yinuk, yogwe, Yeenggwa kiraakit nduk, neenggi ndek yagarak kwe, kit nen an liippanulik, mbo panugwi,

²⁵An nen kinaruk wakirak kwe, kinaruk logu negen eeppunuk wonogwe, Yogop eeko logonip o, yokkiragarak kwe, Nineebi, mbakwi, Eekotak me,

²⁶Aaninggin kinoba age kenok, kinagi'ndok kangge, Maluk mendek kinoba kwi'nage kenok, meek eerogo pinagage, Eeke logogin o.

²⁷O wiya nabuninuk wage menggi kwak, kinagabolo ne agan nawak nduk eeppinagi wage, O wiya oone pu warit wage menggi kwak, aaninggin-paaninggin kinoba ari wage, Nonggop eekkolaawi, yubagip nduk, eeppinagi wage, Kiniki lek-lek arumunggup nduk, eekkinabi wage, Eeke kenok, An nen miyuk-meya eerogo pinagage logogin o.

²⁸Ne ti eyom paga it aap ti nen an yo'neremenggaarak kwe, an wone onggo yoraga'lek puk age, An kwaa'nabit namenggaarak kwe, kwaa'neega'lek aret wonogwe, Eerugun o.

²⁹It nogo nen yi wone ndi wone ineenu ariyak nogo ineebi mbakwi, Aliku ALA ayuk wuriyak uugwe mbaka'lek wonogwe,

³⁰Inena kooninake nogo mbo pugwi, Inaruk wake nogo ineebi mbakwi, Eerugun me,

³¹It eekwi onggo ti, inambi negen ti aret nunggwi, It eeriyak koonggwi ti paga inikime yagabit eerogo pakwi, Eeko logogun o.

³²It aap iniki yuundurak nogo nen tu abe mbo punuk nomo agan nogwe paga it aret ineebe wakkologwe, Ndi, aap iniki wi nen eeriyak kagak eeka'lek paga it ineebe aret lek eerogo pakwi, Eeko menggaarak kwe,

³³It aap an yorage liirogon konengga nogo perak, wone ambi inoba aga'lek inale'nggen aret wonogwe, Maluk ndogop eeppinanigin o, mbaka'lek iniki ugun tayenak wonogwe, Eeko logogun o,” yinuk, ari agaarik o.