Read Western Dani Kini Wuppiige 10 Bible Online

Kini Wuppiige 10 - Western Dani bible

Kini Wuppiige 10

¹Aap Talomo nen wone alom eenu paga kini wuppiige nagagerak wone nogo yi o. Wulaga iniki warak wonage paga ogoba iniki ale'nggen eeppege menggerak kwe, Iniki lek wi negen eerit nage paga agalo iniki puru eerogo pege menggerak o.

²Aap wi-wi aganako logonet inamendek waganggwi ti paga ambi eekkoloorak lek kagak kologo menggaarak kwe, Ndak-ndak eeppiinet nugwi paga nen perak, kanggo menggam nen inagap ndakkologo menggaarak.

³Aap iniki abe koonak mbi abu wonogwe iinok, Aliku ALA nen mbo piigeelik wogorage menggerak kwe, It aap maluk mendek uugwe mbakwi iinok perak, wogoraga'lek mbo piige menggerak o.

⁴Aap ineenggi tanep wonogwe paga mbi abu wu'no lu yogwe wonogo menggaarak kwe, Aap ineenggi omaawi kenok perak, inambi ndiinik kagak nonggo menggaarak o.

⁵Aap ambi aput nen anggen put age eyom paga amendek kuwak eerogo pake nogo ti, iniki warak kogo menggaarak kwe, Anggen mbanggwi eyom paga nogo mban yege kenok perak, enggali aago wonage kogo menggaarak.

⁶Aap iniki abe koonak kenok, inale'nggen mbaruwak nduk, inenggare-nggare inanobak paga yippiigo mengga kwak, inamendek abe mban wonage menggerak kwe It maluk mendek iinok perak, aakumi maluk eeppiyoorak inikime kumaarak kagak inoone paga mban abe-abe agan nugu menggaarak.

⁷Aap iniki abe koonak inoba abekwi iinok, inale'nggen mbako menggaarak kwe, It maluk mendek perak, inendage yogolik aret menggaarak.

⁸“Yogop ee'nu ndogop ee'nu,” wone yorogwe nogo aap iniki warak nen liippogo menggaarak kwe, Aap wi wone mbangga ti, inoone lek aret ogo menggaarak.

⁹Aap wi-wi aganakulik kenok ti, tu kuuri'me aret nugu menggaarak kwe, Aap wi-wi aganaka perak, at eeke nogo aakumi ineenu ogo menggaarak.

¹⁰It aap inigen nimik agan nugwi paga maluk eerogo piinet nugu menggaarak kwe, Inagabiti mbaka'lek aakumi inaruk wakwi iinok perak, iniki kwippiinet nogo menggaarak o.

¹¹Aap iniki abe koonak inoone agan nugwi ti, aakumi ineenik logorak alom it aret menggaarak kwe, It aap maluk mendek kenok perak, aakumi maluk eeppiyoorak inikime kumaarak kagak inoone paga mban abe-abe agan nugu menggaarak o.

¹² Neebi-keebi mbarit nogwe paga nen wone warit nogo menggaarak kwe, Nabuwa-kabuwa mbarit nogwe paga perak, wone yugu taganogo pugwi nogo obeelom eerogo pogo menggaarak.

¹³It aap iniki warak nen yogwe nogo ti, yi wone ndi wone yelok kaga nen inoone yogwe aret iigo menggaarak kwe, Muun yawi pipuk aago wonage ti, iniki kole aga'lek inomarip ake punik aret menggerak.

¹⁴Aap iniki warak nogo nen yi wone ndi wone ineenu a'nuk porogo menggaarak kwe, Aap iniki lek wi inoone agan nugwi paga perak, it aret maluk eerogo pako menggaarak o.

¹⁵Aap ineenggi warak inamendek nogo ti, inawi pak wurik kwak wonage menggerak kwe, It aap tebenak ineebe lek eerogo pakwi nogo ti, ineenggi lek paga nen aret lek eerogo pako menggaarak.

¹⁶Aap iniki abe koonak nen yabu eekwi onggo kologwe ti paga ineebe ineenik aret wonogo menggaarak kwe, It aap maluk eeka inawu kologwe paga nen maluk ambinom eerit nogo logonet, ineebe maluk aret eekkologo menggaarak.

¹⁷It aap wone mamunirogwe nogo liirogon konenggwi paga tu ineenik aganake menggim nogwe iigo menggaarak kwe, It aap inaruk wakwi nogo liippugulik kenok perak, tu nomo agan nogwe iigo menggaarak.

¹⁸Aakumi nen inoreewi ineebi lombok inombako logonet, “Togop mbakulik o,” yogwe iinok ti, pilit aret pugunggo menggaarak kwe, It aap inoreewi inabok mbanit nugwi iinok perak, aap wi negen aret agan nugu menggaarak o.

¹⁹Wone ambik agan nugu logonet enggela'me wone maluk inom wundi wage menggerak kwe, It wone yuurak aganake tebenogo wuppugwi nogo ti, iniki warak aret wonogo menggaarak o.

²⁰It aap iniki abe koonak inoone ti, mbuti perak at mendek mban kwak iya lombok wonogwe kwe, Aap maluk eeka iniki ti perak, iya lek aret wonogo menggaarak o.

²¹Aap iniki abe koonak inoone paga nen aakumi ambik iniki kole eerogo piigo menggaarak kwe, Aap iniki lek wi nogo perak, iniki lek me, we aret kanggo menggaarak.

²²Aliku ALA ale'nggen inoba piige paga it aakumi ineenggi warak ogo menggaarak o. Ndi, eeppiige logonet, aaninggin-paaninggin kaawak nduk, inom eeppiigeelik o.

²³Aap iniki lek wi nen maluk eeriyak inikilom mbako menggaarak kwe, Aap iniki ngget nen perak, iniki warak logorak inikilom mbako menggaarak.

²⁴It aap maluk mendek nen, “Ninamineeri ne agan nage,” mbakwi nogo aret inoba age menggerak kwe, It aap iniki abe koonak nogo nen perak, uugwe mbakwi nogo aret kologo menggaarak o.

²⁵O wiya warit wage nagaatik, nage kagak, aap maluk eeka ineebe lek aret iigo menggaarak kwe, It aap iniki abe koonak nogo perak, mondok nu'lek wonogwe iigo menggaarak.

²⁶Aakumi nen aap eenggi tanep mendek ambi eeruwak nduk nappegaatak kwe, eekeelik nogo ti, Anggur amburu ale mendek nunggwi iinok, ineyak ne agan nage, ka'luk inigen me unggwage kenok andi age, Eeke menggi kwak aret o.

²⁷It aap Aliku ALA inagabiti mbakwi paga it ndarak nggorek logorak eerogo pako menggaarak kwe, It aap maluk mendek perak, yi tahun ndi tahun eeriyak kwe, Ineenik logorak kuwagaluk eerogo pako menggaarak o.

²⁸Aap iniki abe koonak iniki lunik wonogwe paga iniki ale'nggen aret mbako menggaarak kwe, Aap maluk mendek iniki lunik wonogwe ti perak, we aanom warogo aret iniki lunik menggaarak.

²⁹Aliku ALA eerit nage menggerak nogo it iniki abe koonak nen ndak-ndak eerit nugwi paga ineebe op wonogo menggaarak kwe, Aap maluk eeka nogo perak, eeka'lek paga ineebe lek eerogo pako menggaarak o.

³⁰It aap iniki abe koonak nogo ineebe mondok nu'lek wonogwe iigak kwe, It maluk eeka perak, o yime wonogo logogun lek aret o.

³¹It aap iniki abe koonak nen wone yogwe ti, iniki warak ariyak wone wumbi wogo menggaarak kwe, Aakumi inambokan laganuwok nduk agan nugwi ti perak, inoone lek aret ogo menggaarak.

³²Aap iniki abe koonak nen aakumi inale'nggen mbariyak wone ineenu logonet, agan nogo menggaarak kwe, It aap maluk mendek perak, pilit wone yuurak mban ineenu logonet, agan nogo menggaarak o.