Read Western Dani Kini Wuppiige 11 Bible Online

Kini Wuppiige 11 - Western Dani bible

Kini Wuppiige 11

¹Aaninggin wakkaga maluk kenok, Aliku ALA eebi lombok mbake menggerak kwe, Aaninggin wakkaga abe kenok perak, inikilom mbake menggerak.

²It aap iniki tiyappakwi iinok, yini-panip inenggali aret ogo menggaarak kwe, It iniki tebenak wonogwe iinok perak, iniki warak aret eekkologo menggaarak.

³It aap iniki koonak nogo ti, iniki koonak ti nen unde wogonake menggerak kwe, It iniki nggolawe ti, pilit wone agan nugwi paga ineebe aret lek eerogo pako menggaarak.

⁴Inowak looniyak eyom ari wage kenok, “Ninamendek we aanom warogo porogo wonogoorak,” mbarugun kwe, Obeelom eerit nogwe iinok perak, kambunuk nogo menggam nogwe iyo, inili eerogo piyaagin o.

⁵It aap maluk inoba lenggenggulik obeelom mban eerit nugwi kenok, Tu koonak paga nogo menggaarak kwe, it aap maluk mendek nogo perak, maluk eekwi ti nen yigeebu wuppiige menggerak.

⁶Aap iniki koonak nen obeelom eerit nugwi paga inagap ndakkologo menggaarak kwe, It aap iniki nggolawe perak, iniki nengge logonet maluk eerit nugwi ti paga nen inenggaanok yilunggologo menggaarak.

⁷It aap maluk mendek kanggo logonet, iniki lunik wonogwe nogo lek aret age, Ndi, “Nomaawi paga ndogop eerigin o,” yinuk, iniki koonggwi nogo lek aret age, Eeke menggerak o.

⁸It aap iniki abe koonak nogo aaninggin inoba wonogwe me nen inagap ndake kagak, Inobaane'me aap maluk mendek inoba kwi'nage menggerak.

⁹It Ala ineebi mbaka inoone paga it inom menggaarak ineebe nggelenogo piigo menggaarak kwe, It aap iniki abe koonak nogo perak, wone liippugwi paga inagap ndakkologo menggaarak.

¹⁰It iniki abe koonak obeelom mban wonogwe paga o kota wonogwe abok aret inale'nggen mbakwi kwe, Aap maluk mendek kanggwi iinok, “Op kangga,” yinuk, inale'nggen nen keekok yogo menggaarak.

¹¹Aap iniki koonak obeelom eerit nugwi paga o kota endage tiyak ari menggerak kwe, Aap maluk mendek inoone agan nugwi paga nen perak, o kota maluk aret age menggerak.

¹²Aap iniki awo kole aga'lek nogo nen inoreewi meek eerogo piinet nugu menggaarak kwe, Aap iniki koleewak kenok perak, inoone yuurak aganake kenok, tebenogo pogo menggaarak.

¹³“Wone kote me, yugup o,” yoragaatak kagak, aap inamili irip paga agan nega nen ugun paganogo pit nogo menggaarak kwe, Aap wone yugu tebenogo pit nega nogo perak, kote wone tebenogo punuk wonogo menggaarak.

¹⁴Aap ambi awuri inarum wonage lek kenok, at mendek lek aret ogo menggaarak kwe, Inaruk waka ineebe ambik nen yorogwe paga ineebe ndegenak obeelom aret wonogo menggaarak.

¹⁵Aap ambi nen, “Kanomat an aret teenikit o,” yoge nogo Aaninggin aret oba age menggerak kwe, Aap ambi nen, “An togop eeriyak neebi,” ari kenok ti, at aaninggin oba ageelik o.

¹⁶Kumi nggaganin inayuk warak ogo menggaarak kwe, Aap iniki worokot kenok perak, it inamendek mban ambik ogo menggaarak.

¹⁷It aap iniki ndoobu nogo inobaalombok aret obeelom eekko'net nogo menggaarak kwe, Aap inanini ambik nogo perak, ineebe aret maluk eekkologo menggaarak.

¹⁸It aap maluk mendek eerit nogwe onggo kologwe ti, lek ariyak mendek kologo menggaarak kwe, It aap awi yumbunit nogo mengga kwak, obeelom mban eerit nogwe onggo ti perak, mondok logorak mendek aret kologo menggaarak.

¹⁹Aap ambi iniki koonak abet aret wonage kenok, eenik nggorek aret wonage menggerak kwe, Aap ambi maluk eeriyak mban mugurok nage kenok perak, at mbet-mbet aret kangge menggerak.

²⁰It aap iniki nggolawe iinok, Aliku ALA nen eebi lombok inombake menggerak kwe, It aap maluk inoba lenggenggulik kenok perak, inikilom inombake menggerak.

²¹It aap maluk mendek ti, maluk onggo inoba arigin lek ti lek, arigin aret kwe, It iniki abe nogo perak, maluk onggo inoba arigin lek inagap ndarak aret logogin abet aret mbako logonip o.

²²Wam ogobak me mbuti emas pelenogo pugulik kagak pugu menggi kwak, Kwe kigirikwe kwe, iniki lek nogo togop aret menggerak.

²³It iniki abe koonak nen iniki uugwe mbakwi nogo irip paga obeelom aret ari nage menggerak kwe, Aap maluk mendek iniki lunik wonogwe ti, irip paga inanini eeppiyoorak mban inoba ari wage menggerak.

²⁴Aap ambi amendek yumbuk-yumbuk eeke menggerak kwe, amendek ambik aret age, Ndi, aap alik ambi amendek ambik wonage kwe, wogoraga'lek nggilimi kenok, eenggi lek arit unggwage, eeke menggerak.

²⁵Aap ambi aakumi inale'nggen mbaruwak nduk, wogorage paga amendek ambik aret wagangge, Aap ambi niyo toologo wogorage kenok, at nen niyo ndonggorogon aret nengge, Eeke menggerak.

²⁶Aap ambi nen mbi kungga'lek teppake kenok, aakumi nen at kugi pulunogo pogo menggaarak kwe, Kungge kenok perak, aakumi inale'nggen at oba pogo menggaarak.

²⁷Aap ambi obeelom eeriyak mugurok nage kenok, aakumi nen at inikilom mbako menggaarak kwe, Maluk eeriyak mugurok nage kenok perak, maluk ti nen melak togon at oba kwi'nage menggerak.

²⁸Aap ineenggi warak paga iniki panggonak wonogwe ti, Eyo engga mono-mono wangge menggi kwak, Yigeebu wanggo menggaarak kwe, It aap iniki abe koonak ti perak, eyo anggup awo lake menggi kwak aret logogun o.

²⁹Aap ambi aaganapuri naalop-kaalop eerogo piige kenok, yate kwak, at o wiya ti aret kolage, Ndi, aap iniki lek wi nen aap iniki warak nogo Ayeloman ari unggwage, Eerugun o.

³⁰Aakumi iniki abe koonak eekwi onggo ti, eyo ki menggi kwak it mondok ineenik aret wonogwe, It aap Ala apuri aruwak nduk, eeginabit nogwe iinok, iniki warak aret wonogwe, Eeko menggaarak.

³¹ Aap iniki abe koonak awo nggween paga wonogo logonet, obeelom eekwi onggo eeppiyaagin lek ti lek, eeppiyaagin aret kwe, It aap Ala ineebi mbaka inom, aap maluk eeka inom, ti perak, maluk eekwi onggo abunuk aret eeppiige logogin o.