Read Western Dani Kini Wuppiige 12 Bible Online

Kini Wuppiige 12 - Western Dani bible

Kini Wuppiige 12

¹Aap ambi nen aruk wakwi inikilom mbake kenok, yi wone ndi wone eenu ariyak inikilom mbake menggerak kwe, Aap ambi nen aruk wakwi eebi mbake kenok perak, aap ti, iniki lek wi negen aret menggerak.

²Aap iniki obeelom nogo Aliku ALA nen ale'nggen ombake menggerak kwe, Aap inambokan lagangga nogo perak, maluk eeppege menggerak.

³It aap maluk eerit nugwi paga iniki nu'lek eerogo pakulik kwe, It aap iniki abe koonak nogo perak, eyo omanggen kiniyak meek nu'lek menggi kwak, it togop nu'lek aret menggaarak.

⁴Kwe ambi obaabut abu obeelom nogo ti, ogonggelo enggare-nggare kwak aret menggerak kwe, Kwe ambi ogonggelo enggali eerogo pit nage kenok perak, ogonggelo owa'na nenet unggwage menggi kwak aret menggerak.

⁵Aap iniki abe koonak nen a'me nggelok mban eeppiinet nawok nduk, wone koonogo pogo menggaarak kwe, It aap maluk mendek perak, aakumi inambokan laganiyak koonogo punuk, eeppiinet nogo menggaarak.

⁶Aap inooruwok nduk enaako mengga kwak, aap maluk eeka inoone ti, togop aret eeppiinet nugu menggaarak kwe, It aap iniki koonak inoone yogwe paga perak, aakumi inagap ndarogo piigo menggaarak.

⁷Aap maluk mendek tebenogo piigwi iinok, ineebe abu lek aret ogo menggaarak kwe, It aap iniki abe koonak awi wiganak perak, mondok nu'lek aret wonogo menggaarak.

⁸Aap iniki warak ti ndak-ndak “Wi!” irogo menggaarak kwe, It aap maluk iniki nggolawe kenok perak, meek lombok eerogo piigo menggaarak.

⁹Aap endage lek logonet, ayeloman wonage ti, iya aret mbako menggaarak kwe, Endage warak negen eekkolage logonet, mbi abu wonage kenok perak, meek aret mbako menggaarak.

¹⁰Aap iniki abe koonak nen aanggumi abe logowak nduk ndegeninake menggerak kwe, Aap maluk mendek nen inaanggumi inabuwa mbakwi ti, inanini eeppiigwi ti aret.

¹¹Aap ambi anggween mban eebi-eeba eerit nega ti, ambi ndonggorogon nengge menggerak kwe, Aap ambi, “Yogop kwak kolaane,” mbake nogo mban mugurok nage kenok, aap ti, iniki lek yuundurak aret wonage menggerak.

¹²It aap maluk mendek nen, “It maluk eeka nonggop eeppiinok inawu kologwe nogo, nit togop eeruwok lak, ao,” mbako menggaarak kwe, It aap iniki abe koonak nogo ti, eyo omanggen abe yarak logonet, anggen yege menggi kwak wonogo menggaarak.

¹³It aap maluk eeka inoone maluk agan nugwi paga ineebe nggelenggologo menggaarak kwe, Aap iniki abe koonak nogo perak, aaninggin inoba arukwak nduk woppako menggaarak.

¹⁴Aap inoone abe agan nugwi paga aakumi inale'nggen mbakwi iinok, it aret iniki ndonggo ari, Ndi, ineenggi eeppiinet nogwe paga onggo it aret inoba ari wage, Eeke menggerak.

¹⁵Aap iniki lek wi nen, “An eerit nage ti, op aret eerit nage,” mbake kagak kwe, Aap iniki warak nen perak, aruk wakwi nogo liirogon konengge menggerak.

¹⁶Aap iniki lek wi nogo, yogwi eebi mbake kenok, iniki mbet-mbet mi'nage menggerak kwe, Aap iniki penenak nen perak, “Meek eeppanugwi yi, iya lek o,” yinuk, yaga-taga eerogo pege menggerak.

¹⁷Aap oone abet mban ari menggerak nogo nen at enegen kegetak ndak-ndak ari menggerak kwe, Aap oone pilit pugunit nege menggerak nogo nen perak, kegetak kagak alik pugunogo ari menggerak.

¹⁸Aap ambi oone perak togon ari menggerak nogo ti, wooluwak ndanuk togon inooko mengga kwak aret ari menggerak kwe, Aap iniki warak nen oone agan nege paga aakumi obeelom eeppiinet nage menggerak.

¹⁹Inoone abet mban agan nugwi ti, mondok aret wonage menggerak kwe, Inoone pilit agan nugwi perak, ne ambiriluk wonagaatik, lek age menggerak.

²⁰It aap maluk eeriyak koonogo pugwi nogo nen aakumi inambokan laganiyak mban inikime menggerak kwe, Aakumi iniki ugun tayenak logowak nduk yoranet nugwi ti perak, inikime inale'nggen mban wonage menggerak.

²¹Aap iniki abe koonak kenok, aaninggin inoba aga'lek wonogwe iigak kwe, Aap maluk eeka perak, aaninggin inoba agak eeko menggerak.

²²Inoone pilit agan nugwi ti, Aliku ALA eebi lombok inombake menggerak kwe, Inoone abet mban agan nugwi iinok perak, inikilom inombake menggerak.

²³Aap iniki penenak nen yi wone ndi wone ineenu nogo inikime tebembunuk menggaarak kwe, It iniki lek nogo nen aap wi yogo mengga kwak ugun-ugun agan nugu menggaarak.

²⁴Aap ineenggi omaawi nogo ti, aap nggwok ogwe iigak kwe, Aap ineenggi tanep nogo perak, aakumi inayeloman aret ogo menggaarak.

²⁵Aap iniki piirik logonet, aaninggin ndugu eerogo patit unggwage menggerak kwe, Aap alik ambi nen abuwa mba'nuk, wone ambiriluk ambi yoge paga ale'nggen eerogo pege menggerak.

²⁶Aap iniki abe koonak nogo nen oreewi tu obeelom paga wogoren nage menggerak kwe, Aap maluk mendek nogo nen perak, oreewi tu alik paga nomoneren nage menggerak.

²⁷Aap eenggi tanep nogo nen wari naakit mbaketak nogo wari naga'lek we aret menggerak kwe, Aap eenggi omaawi kenok perak, eerit nage paga amendek abe mban kolage menggerak.

²⁸Obeelom mban eerit nugwi ti paga ineenik aret kologwe, Tu abe ti paga nugwi iinok, kanggulik nabelan-kabelan aret kologwe, Eeko menggaarak.