Read Western Dani Kini Wuppiige 13 Bible Online

Kini Wuppiige 13 - Western Dani bible

Kini Wuppiige 13

¹Wulaga ambi iniki warak kenok, ogoba nen aruk wake liippege menggerak kwe, Wulaga ambi meek eerogo piiga ti perak, aruk wakwi nogo aruk konenggeelik o.

²Anggen abe mbanogo nunggwi kwak, aap oone abe agan nege paga obeelom eerogo patit nage menggerak kwe, Aakumi wi-wi eeginaka perak, anini nen aakumi maluk eeppiyoorak mban mbake menggerak.

³Aap ambi ambe liirogon unde wake paga iniki liirogon aret unde wake menggerak kwe, Aap ambi oone ugun-ugun agan nege paga perak, at eebe aret lek eerogo pake menggerak.

⁴Aap eenggi tanep nen uugwe mban mbarit nege menggerak kwe, enegen me lek aret age kagak, Aap yabu eeka nogo perak, iniki, “Ao,” mbaketak ndak-ndak aret kolage menggerak.

⁵Aap iniki abe koonak nen pilit wone ineebi mbako menggaarak kwe, Aap maluk eeka nogo perak, inowe-inawot inenggali eerogo piinet nugwi, inendage maluk eerogo pakwi, Eeko menggaarak.

⁶Aap ambi iniki abe koonak nen obeelom mban eerit nage paga eebe aret unde wakkolage menggerak kwe, Aap maluk eeka nogo nen perak, maluk eerit nage paga eebe aret maluk eekkolage menggerak.

⁷Aap ambi eenggi warak yuwak nege kwe, amendek ambiriluk ambi lek aret wonage, Ndi, aap ambi nen amendek wonage kagak, lek mbaruwak eenggi melaarak nege kwe, amendek ambik aret wonage, Eeko menggaarak.

⁸Aap ambi eenggi warak nen, “Neebe ili o. Neenggi wonage o,” yinuk, amendek wogorage menggerak kwe, Aap ambi eenggi lek nogo perak, “Namendek lek me, nano waagun?” yinuk, iniki ugun menggerak.

⁹It aap iniki abe koonak ti, eya abinak kwindagala aago kwak menggaarak kwe, It aap maluk mendek perak, ndi nogonik kwak wonogo menggaarak.

¹⁰Aap iniki tiyappakwi paga nen ndugwi ineenggime piigo menggaarak kwe, Inaruk wakwi konenggo menggaarak nogo perak, iniki warak aret iigo menggaarak.

¹¹It mbet-mbet ineenggi warak eekkologwe nogo inamendek mbet-mbet lek aret age menggerak kwe, Aap ambi nen amendek ambit nabek eekko'net unggwage ti, amendek ambi nabek nggwok aret arit lagangge menggerak.

¹²It iniki lunik nogo ya langgok arit nage kenok, iniki wakkologo menggaarak kwe, Iniki uugwe mbakwi nogo aret kologwe iinok perak, eyo abe mili kwit agan lagangge menggi kwak, iniki togop aret wonogo menggaarak.

¹³Aap ambi nen Ala wone mamunik meek eerogo pege paga at obaalombok aret maluk eekkolaagin kwe, Aap ambi wone yugu nogo mondok porogo wonage kenok perak, onggo abe mendek aret kolaagin o.

¹⁴Aap iniki warak wone mamunik mugurok nogwe ti, ineenik logorak alom aret me, Kanggwi keele pugume kagak nomoninuk inili eekko'nok mbaganggo menggaarak.

¹⁵Aap iniki warak abe ti, aakumi inikilom mbako menggaarak kwe, Aap wone yugu liippugulik kenok perak, aakumi inoone maluk inoba piigo menggaarak.

¹⁶It aap iniki penenak nogo wone ineenu paga nen eeko menggaarak kwe, It aap wi negen perak, eerit nugwi paga iniki lek iigo menggaarak.

¹⁷It wone yugu ndak-ndak yogolik yonggo nappiigwi iinok, aap a'nggan waganogo piinet nugu menggaarak kwe, Wone yugu ndak-ndak yaga yonggo nappiigwi iinok perak, aakumi iniki kwippiinet nogo menggaarak.

¹⁸Aap ambi nen aruk wakwi nogo mbo pege paga eenggi lek age, enggali age, eeke menggerak kwe, Aap ambi nen aruk wakwi nogo liippege kenok perak, at ayuk wuko menggaarak.

¹⁹It aap iniki uugwe mbakwi nogo ndak-ndak arit nage kenok, iniki ale'nggen mbako menggaarak kwe, It aap iniki lek wi nogo nen perak, maluk mbo puurak ineebi lombok mbako menggaarak.

²⁰Aap ambi nen aap iniki warak imbirak kunggolage kenok, at iniki warak aret age, Ndi, aap ambi nen aap wi negen imbirak kunggolage kenok perak, at eebe aret maluk eekkolage, Eeko menggaarak.

²¹Aaninggin-paaninggin nogo nen it aap maluk eeka muguren-magaren nege menggerak kwe, Iniki ale'nggen obeelom logorak nogo nen aap iniki abe koonak inoba arikit nduk muguren nege menggerak.

²²Aap abe nogo nen eyate ombowologwe inake piinok nage menggerak kwe, Aap maluk eeka amendek nogo perak, aap iniki abe koonak inake teppiinok nage menggerak.

²³Aap ineenggi lek inanggween we wonage nogo ti, mbi-mbiingga kunik aret logorak kwe, It aap a'me nggelok eeppiigulik nen, “Yabu eerugup o,” yogwe paga yarak lek aret wonage menggerak.

²⁴Aap ambi nen apuluk yawi waka'lek paga apuluk eebi lombok mbake menggerak. Aap ambi apuluk abuwa lombok mbake kenok perak, apuluk iniki koonnaruwak nduk, yawi liirogon aret wake menggerak.

²⁵Aap iniki abe koonak nogo nen inambi ndinggik-ndonggok nunggo menggaarak kwe, Aap maluk eeka nogo perak, mbi abu nen wo'no lu agan nugu menggaarak.