Read Western Dani Kini Wuppiige 14 Bible Online

Kini Wuppiige 14 - Western Dani bible

Kini Wuppiige 14

¹Kwe iniki warak nen at awi wurik nogo liirogon ndegenggolage menggerak kwe, Kwe iniki lek wi negen kenok perak, at lombok nen at awi wurik nogo minogo pake menggerak.

²Aap koonak eeka nen Aliku ALA agabiti mbake menggerak kwe, Aap eeriyak kagak nggolawe eeka nogo nen perak, Ala meek mbake menggerak.

³Aap iniki lek wi inoone agan nugwi ti, inamborowak paga wakkoloorak inake muun yawi kwak wonage menggerak kwe, Aap iniki warak nen perak, inoone abe agan nugwi paga nen inagap ndakkologo menggaarak.

⁴Lembu lek kenok anggen mbanogo nunggulik aret kwe, Lembu inomaawi eekwi paga nen anggen ambik mbanogo nunggo menggaarak.

⁵Aap enegen abet kenok yaga nen ari ti, pilit ariilik lek kwe, Enegen abet kegetak kwe, pilit pugungga nen ari ti perak, pilit aret pugunit nage menggerak.

⁶Aap wone yelok kaga nen yi wone ndi wone mbet-mbet aret ineenu ogo menggaarak kwe, Aap meek eerogo piiga nen perak, “Niniki warak eekkolaawok,” mbarit nugwi kwe iniki warak eekkolaga'lek aret menggaarak.

⁷Aap iniki lek wi nogo agan nege paga wone ambi kineenu ariyak lek me, mbo punuk mbaganggo logonip o.

⁸Aap iniki warak nen iniki penenak logonet eeke ti, at eerit nage nogo liippege menggerak aret kwe, Aap iniki lek wi negen eerit nage ti, aakumi inambokan laganikit nduk, pilit agan nege menggerak.

⁹Aap iniki lek wi nogo nen inomaluk lek eerogo piyoorak inake warogo wogoriyak i'ndok kanggo menggaarak kwe, It aap iniki koonak nen perak, “Ninomaluk lek eerogo pinanuwak lak ao,” mbako menggaarak.

¹⁰Aap iniki wakko'net unggwage alom nogo inalitak lombok liippakwi, Ndi, iniki ale'nggen kogwe nogo kunduk, aap alik ambi inom kogolik inalik mban aret kogwe, Eeko menggaarak.

¹¹Aap maluk mendek inawi wurik nogo ti, mi-mi wambigin kwe, It aap iniki koonak inawooliya wurik perak, mondok aret logogin o.

¹² Aakumi nen, “Tu yi abe me op aret nogo ogoorik o,” mba'nuk nogwe kwe, Nogo logonet, irip paga kanggo menggam aret ari nogo menggaarak.

¹³Inikime nen andi kogo logonet, inambe paga i'ndok kanggwi, Ndi, inale'nggen mbakwi iigak, irip paga iniki puru ari, Eeko menggaarak.

¹⁴It wone yugu mbo pega nen anggen maluk mendek aret mbanggologwe, Ndi, it aap abe mendek nen anggen abe mendek aret mbanggologwe, Eeko menggaarak.

¹⁵Aap iniki yuundurak nogo nen yi wone ndi wone ugun aret wagangge menggerak kwe, Aap iniki penenak nen perak, liippunuk eerit nage menggerak.

¹⁶Aap iniki warak nogo nen, “Maluk eeriyak neebi o,” yinuk, ogole mbagangge menggerak kwe, Aap iniki lek wi nogo nen perak, anini mbet-mbet mi'na'nuk ugun eerit nage nagaatik, “Op eeki,” yinuk, puk aret age menggerak.

¹⁷Aap inanini mbet-mbet wungga nogo nen aap wi negen aret eerit nogwe, Ndi, aakumi maluk eeppiyoorak kote koonogo pugwi iinok, aakumi nen ineebi lombok inombakwi, Eeko menggaarak.

¹⁸Aap iniki yuundurak ti, it wi negen eekwi ti aret yate kwak kologo menggaarak kwe, Aap iniki perenak perak, nggare-nggare yippiigo mengga kwak, yi wone ndi wone ineenu ogo menggaarak.

¹⁹Aap maluk mendek nen aap abe inabu'me tebe yi unggwogwe, Aap maluk eeka nen aap iniki abe koonak inaru ngga'nggi paga ari nanuk nggino yorogwe, Eeko logogun o.

²⁰Aap ineenggi lek nogo aakumi abok nen ineebi inombako logonet, inom menggaarak nen kunduk, ineebi lombok inombako menggaarak kwe, Aap ineenggi warak nogo perak, inoreewi ambik aret wonogo menggaarak.

²¹Aap ambi nen ore meek mbake ti, maluk aret eeke menggerak kwe, Aap ambi nen it aap tebenak mendek inabuwa mbake nogo perak, at ale'nggen nggwok aret mbake menggerak.

²²It aap maluk eeppiyoorak kote koongga ti, tu kobak ari nogolik mbakop? Tu kobak ari nogo menggaarak aret kwe, It aap obeelom eeppiyoorak mban koongga perak, aakumi nen it inabuwa mbakwi, yoragaatak liirogon eekwi, Eeko menggaarak.

²³Anggon-panggon kagak eekwi paga ambi eekkologo menggaarak kwe, Inoone paga mban agan nugwi kenok perak, ineenggi lek aret eerogo pako menggaarak.

²⁴Aap iniki warak nen iniki warak logonet eekwi paga inendage tiyappiigo menggaarak kwe, Aap iniki lek wi nen perak, wi negen eerit nugwi paga wi aret inombako menggaarak.

²⁵Aap enegen kenok abet mban ari paga aakumi inagap ndake menggerak kwe, Aap enegen kenok pilit pugungga nen pilit pugunit nage paga aakumi inagap mbugunogo piinet nage menggerak.

²⁶Aap ambi Aliku ALA ayuk wuke ti, pak wurogo pereegi kwak aret me, At apuri ineebe op logowok nduk, time aret ari unggwogo menggaarak o.

²⁷Aliku ALA ayuk wukwi ti, aakumi ineenik eeginaka alom aret me, Mugurok nogwe iinok, kanggwi ageele nen yilunogo piyaagin lek.

²⁸Aakumi ambik aap endagembogut abu'me wonogwe iinok, at endage tiyak ari menggerak kwe, Aakumi at abu'me wonogwe lek iinok perak, endage lek aret age menggerak.

²⁹Aap ambi anini mbet-mbet wungga'lek tebenogo punuk wonage kenok, at iniki warak aret menggerak kwe, Aap ambi mbet-mbet anini wungge kenok perak, iniki lek wi negen aret kin eerogo patit nage menggerak.

³⁰Aap iniki ugun tayenak wonage paga eebe omaawi aret eerogo pege menggerak kwe, Aap ambi eeke paga, “An togon eerikit lak, at mban eeke, ao,” mbarit unggwage paga perak, owa'na nenet unggwage menggerak.

³¹Aap ambi nen aap ineenggi lek nogo tebenogo piige kenok, at ogobakkigirogo piyareegerak nogo aret meek eerogo pege menggerak kwe, Aap ambi nen it aap eekkoloorak meek nogo inabuwa mbake kenok perak, Ala aret ayuk wuke menggerak.

³²It aap maluk eeka nen maluk eerit nugwi paga it ineebe aret nggelenggologo menggaarak kwe, Aap iniki abe koonak nogo perak, kambemenggaarak kwe, obeelom eerit nugu logomenggaarak me, ineebe obeelom aret logogun o.

³³Iniki warak nogo aap wone mbet-mbet yelok kaga inikime puk ari unggunuk wonage menggerak kwe, Aap iniki lek wi negen kenok perak, iniki warak nogo inikime wonageelik o.

³⁴Aakumi ambi mendek nen obeelom mban eerit nugwi paga it mendek inendage tiyak ari menggerak kwe, Maluk eerit nugwi paga perak, inendage maluk aret age menggerak.

³⁵Aap endagembogut nen awot ambi iniki warak wonage kenok, iniki ale'nggen mbake menggerak kwe, Eerit nage paga enggali eerogo pege kenok perak, anini oba pege menggerak.