Read Western Dani Kini Wuppiige 15 Bible Online

Kini Wuppiige 15 - Western Dani bible

Kini Wuppiige 15

¹Wone onggo yanggorogon ari paga at anini wungge nogo tebenogo pege menggerak kwe, Oone omaawi paga wone onggo ari kenok perak, anini nogo abunuk mi'nage menggerak.

²Aap iniki warak oone nogo ti, ineenu ariyak mendek wundi wage menggerak kwe, Aap wi negen oone nogo ti, iniki kobak eerogo piyoorak mendek mban wundi wage menggerak.

³Aliku ALA enegen yi o ndi o abok aret wonage logonet, Aap maluk mendek inom, aap obeelom mendek inom, enegen liippiige menggerak o.

⁴Inoone yanggonak yogwe paga eyo ki lagangge menggi kwak, aakumi obeelom eerogo piigo menggaarak kwe, Inambokan laganuwak nduk agan nugwi paga perak, aakumi iniki andi eerogo piigo menggaarak.

⁵Aap iniki lek wi nen ogoba aruk wake nogo, eebi lombok mbake menggerak kwe, Ogoba nen aruk wake nogo liippege kenok perak, iniki warak aret kogo menggaarak.

⁶Aap iniki abe koonak ame yi mendek ndi mendek ambik wonage menggerak kwe, Aap maluk eeka nen perak, inawu kologwe nogo paga maluk aret inoba kwippako menggaarak.

⁷Aap iniki warak nen agan nugwi paga yi wone ndi wone ineenu eeppiinet nugu menggaarak kwe, Aap iniki lek wi kenok perak, togop eekulik o.

⁸Aap maluk mendek nen ake warogo Aliku ALA wogogwi nogo, at eebi lombok mbake menggerak kwe, Aap iniki koonak nen tamban eekwi iinok perak, koneniyak inikilom mbake menggerak.

⁹It aap maluk mendek nen eerit nogwe nogo Aliku ALA eebi lombok mbake menggerak kwe, It aap obeelom eeriyak mugurok nogwe iinok perak, iniki kunik lombok aganake menggerak.

¹⁰It tu abe kagak nomoninuk alik paga mugurok nogwe iinok, iniki koonnaruwak nduk aaninggin lombok inoba kwi'nage, Ndi, it aap inaruk wakwi nogo ineebi mbakwi iinok, aret kanggwi, Eeko menggaarak o.

¹¹Aakumi kambunuk nogo menggam inom, ineebe lek ogo menggam inom, tu paarak mban wonage kenok, Aliku ALA nen liippiige menggerak me, Aakumi iniki mbakwi ti, abunuk liippiige menggerak o.

¹²Aap meek eerogo piiga ti, aap nen aruk wakwi koneniyak eebi mbake menggerak me, At nen aap iniki warak wonogwe me, inom wone mbani noorak eebi mbake menggerak.

¹³Aap iniki ale'nggen wonage paga etenggen eya eerak wonage menggerak kwe, Iniki andi wonage paga perak, lambi-lambe aago menggerak o.

¹⁴Aap wone yelok kaga nogo nen yi wone ndi wone eenu eekkoloorak mbake menggerak kwe, Aap iniki lek wi nen perak, iniki kobak eerogo piyoorak wone mban at ambi kwak nenet nage menggerak.

¹⁵Aap tebenak wonogwe nogo ko'lu-kii'me aaninggin inoba luurik mban wonage menggerak kwe, Aap iniki ale'nggen wonage paga ko'lu-kii'me i'ndok nggi ari mban wonage menggerak.

¹⁶Aap ambi amendek mbuura'luk wonage kagak, Aliku ALA agabiti mbake menggerak ti, obeelom aret kwe, Aap amendek ambik wonage logonet kwe, “Nonggop aremenggi?” yinuk, iniki piirik mban wonage ti perak, maluk aret o.

¹⁷It aap niniki-kiniki kunik logonet, mbi-mbiingga mban nunggo logorak ti obeelom aret kwe, Neebi-keebi yogo logonet, inaanggo amok warak wappunuk larogo nugwi ti perak, maluk aret o.

¹⁸Aap anini mbet-mbet wungga nogo nen ndugwi puwak nduk eerogo piinet nage menggerak kwe, Aap anini mbet-mbet wunggeelik yanggonak nogo nen wone wakwi nogo lek eerogo piige menggerak.

¹⁹Aap eenggi tanep nen eerit nage nogo ti, tu alok nombanak kwak wonage menggerak kwe, Aap iniki koonak nen eerit nage nogo perak, tu abe yarak kwak wonage menggerak.

²⁰Apuluk iniki warak wonage paga ogoba iniki ale'nggen eeppege menggerak kwe, Wulaga iniki yuundurak wonage paga agalo meek eerogo pege menggerak.

²¹Aap iniki yuundurak nogo nen wone kobak eeriyak mendek mban koneniyak inikilom mbake menggerak kwe, Aap iniki warak nen perak, tu koonak paga nage menggerak.

²²Aap ambi aakumi inom wone liirogon koombunuk eekeelik kenok, at eeriyak mbaketak nogo lek aret age menggerak kwe, “Yogop eeruwok o,” yinuk, inom koombunuk eeke kenok perak, a'me aret nggelok ari menggerak.

²³Aap ambi wone onggo lik togon yorage nagaatik, iniki ale'nggen mbake menggerak me, Wone yuurak age kenok, ndak-ndak yoroorak ti mondok obeelom aret o.

²⁴Aap iniki warak ineenik aganaburak tu ti, ogu paga aakumi kambunuk nogo menggam lek o. Ata, tu agi paga wonage menggerak o.

²⁵Aap iniki tiyappake awi wurik ti, Aliku ALA nen minogo pege menggerak kwe, Kwe nanu anggween mbanak kuli ogoorak nogo ya langgok eerogo pukwak, arum menggerak.

²⁶It aap maluk mendek nen eeriyak koonogo pugwi ti, Aliku ALA eebi lombok mbake menggerak kwe, Aap iniki kikak naka'lek nen eeriyak koonogo pugwi perak, Ala inikilom mbake menggerak.

²⁷Aap ambi, “An mban kolaakit,” mba'nuk, ko'net nage paga akwe-apuri maluk eerogo piige menggerak kwe, Aap ambi, “Mage yugume eeriyak wu wo'niriyak neebi,” mbaka nogo perak, eenik aret logogin o.

²⁸Aap iniki abe koonak nen wone onggo yuurak kenok, oone yungguppunuk ari menggerak kwe, Aap maluk mendek nen perak, oone maluk ugun-ugun kilirogo wumbit nage menggerak.

²⁹Aap maluk mendek ti, Aliku ALA imbirak lambunik lek ndarogon menggerak kwe, Aap iniki abe koonak nen tamban eeke kenok perak, at aruk liirogon aret konengge menggerak.

³⁰Inetenggen eya aago wonogwe iinok, inale'nggen age, Obeelom wone konenggwi paga inoba tayik-tayok nage, Eeke menggerak.

³¹Aap ambi eebe op logowak nduk, aruk wakwi nogo liirogon konengge kenok, Iniki warak me, aap iniki warak inenggela'me logorak op aret o.

³²Aap ambi iniki koonnaruwak nduk wone yogwi kwe, “Ti iya lek o,” yinuk, mbo pege kenok, at eebe aret eebi mba'nuk mbo pake menggerak kwe, Aap ambi nen aruk wake nogo liippege kenok perak, wone ambinom eenu eekkolage menggerak.

³³It aap Aliku ALA inagabiti mbakwi paga iniki warak logorak mamunggologwe, Ndi, iniki tebeppatiyak aa'nduk mamunggo'nok, inayuk wuriyak mendek mamunggologwe, Eeko menggaarak o.