Read Western Dani Kini Wuppiige 16 Bible Online

Kini Wuppiige 16 - Western Dani bible

Kini Wuppiige 16

¹Aakumi nen eeriyak inikime koonogo pogo menggaarak kwe, Eebe eeriyak perak, Aliku ALA nen aret, “Eeriyak op o,” yinuk, yorage menggerak.

²Aakumi nen, “Nit eekwi abok aret op eerit nogo ogoorik o,” mbako menggaarak kwe, Aliku ALA perak, alom ngge eeruwok nduk koonggwi nogo abok aret liippiige menggerak.

³Kit eeriyak koonggwi nogo abok aret Aliku ALA wogo'nuk wonogwe kiinok, Kit koonggwi nogo abok aret a'me aret age kaamunggup o.

⁴Yi mendek ndi mendek eeriyak koonggwi nogo abok aret aakumi nen, “Ti yogop nduk eeruwok o,” mba'nuk eerit nogwe nogo Aliku ALA nen waganogo at eeriyak mbaketak mban eerit nage, Ndi, it aap maluk mendek kunduk, aakumi aaninggin inoba eeppiyoorak eyom paga, it maluk mendek ti inake eeppiyoorak nduk, pipuk eerogo piige, eeke menggerak.

⁵Aap iniki tiyappakwi abok aret Aliku ALA nen eebi lombok mbake menggerak me, Aap ti, maluk onggo eeppiyaagin lek ti lek, eeppiyaagin abet aret mbako logonip o.

⁶It aakumi nen Aliku ALA iniki kunik eekwi, Yegetak liirogon mban eerit nugwi, Eekwi paga Aliku ALA nen inomaluk lek eerogo pege menggerak. Ndi, Aliku ALA inagabiti mbakwi paga maluk ogole nen mbaganggo menggaarak.

⁷Aap ambi eerit nage nogo Aliku ALA inikilom mbake kenok, Aap ti, awim kunduk at imbirak lambunik obeelom logowak nduk eeppege menggerak.

⁸Aap a'me nggelok eeppiinet nage logonet, amendek mbuuluk kuwak eekkologwe ti, op aret kwe, Aap wi-wi eeginabit nage logonet, amendek ambik kuwak eerogo pake kenok ti perak, maluk aret o.

⁹Aakumi inikime nen, “Yogop eerikit, ndogop eerikit,” mbako menggaarak kwe, Aliku ALA nen perak, “Ti eeppunuk ti ee'nip o. Ti eeppunuk ti ee'nip o,” yinuk, koonogo yorage menggerak.

¹⁰Aap endagembogut nen Ala kwak wone lengganogo yorage menggerak me, Eekaatak liippunuk, aakumi inowak loongge logowak o.

¹¹Aaninggin abe wakkaga inom, kuli a'me ari naga inom, nogo ti, Aliku ALA unde wonage, Ndi, ndak-ndak age lek kenok, yugum mbuulogwe ambi pegak eekwi yonggolak menggerak abok aret nogo ti, at nen mban ogobakkigirogo pege, Eereegerak.

¹²Aakumi obeelom mban eerit nugwi paga aap inendagembogut wone lengganogo yorogo menggam omaawi menggaarak me, It aap inendagembogut nen aap maluk eerit nugwi nogo ineebi lombok mbako menggaarak.

¹³Aakumi inoone abet mban yogwe iinok ti, it aap inendagembogut inale'nggen mbakwi, It aap wone ndak-ndak yogwe iinok ti, iniki kunik eeginakwi, Eeko menggaarak.

¹⁴Aap endagembogut nen aap ambi anini mbake ti, at wariyak ari kenok, yonggo wage menggi kwak aret kwe, Aap iniki warak nogo nen at anini mbake nogo lek eerogo pege menggerak o.

¹⁵Aap endagembogut enete eya aago wonage kenok, “Nili yigin, kagi,” mbakwi, O kibi wonagaatik, ndugwi ogom eeke kenok, inale'nggen mbakwi kwak, aap endagembogut inabuwa nen obeelom eeppiige kenok, inale'nggen mbakwi, Eeko menggaarak.

¹⁶Mbuti perak waganggwi ti, op negen kwe, yi wone ndi wone alom ineenu ariyak ti perak, iya o. Mbuti emas waganggwi ti, op negen kwe, iniki warak ariyak ti, iya lombok o!

¹⁷It aap iniki koonak nogo eerit nogo logonet, maluk kenok, ogole nen mbaganggwi, Ndi, it aap liippunuk eerit nogwe nogo ti, iniki aret liirogon unde wakkologwe, Eeko menggaarak.

¹⁸Aa'nduk iniki tiyappatit nogo nagaatik, irip paga eebe aret lek eerogo pakwi, Aa'nduk, “Wi!” niraawak nugu nagaatik, irip paga yigeebu aret wambi nogwe, Eeko menggaarak.

¹⁹Aap iniki tebenak logonet, aap tebenak mendek inenggela'me logorak ti, op aret kwe, Aap iniki tiyanak inom logonet, kugun wogo tumburogo nunggwi ti perak, maluk aret o.

²⁰Aap ambi nen wone at mamunege nogo liippege kenok, obeelom aret eekkolage, Ndi, aap ambi iniki Aliku ALA oba panggombege kenok, ale'nggen aret mbake, Eeke menggerak.

²¹Aap iniki warak kenok, “Wone mbet-mbet yelok kaga o,” yinuk, yogwe, Ndi, aap wone kigirikwe ari paga nen, “Aap ti, abet aret ari,” mbakwi, Eeko menggaarak.

²²Aap iniki warak wonage kenok ti, ineenik logorak alom porogo wonage me, at ale'nggen paga nege menggerak kwe, Aap wi nen iniki lek negen eerit nage paga onggo maluk aret oba pake menggerak.

²³Iniki warak nen aap oone liippunuk yuwak nduk eeppege, Ndi, oone nabek togon mamunirage paga wone mbet-mbet waawak nduk, eeppege, Eeke menggerak.

²⁴Wone abe agan nugwi ti, nggiin amburu nggi agan wangge menggi kwak aret me, Konenggwi kenok, iniki eya arit nage, obat kwak inowak enoona obeelom arit nage, Eeke menggerak.

²⁵ Aakumi nen, “Tu yi paga op aret nogo ogoorik o,” mbakwi kwe, Nogo logonet, kanggo menggam aret ari nogo menggaarak.

²⁶Mbi abu age kenok yabu eeriyak aganake menggerak me, Aap yabu eeka nogo mbi nunggo logowok nduk, yabu eeko menggaarak.

²⁷Aap maluk mendek nen ore ambi maluk eeppikit nduk wakkenet unggwage, Kani omoonuk nen nenet nage menggi kwak, at oone togop aret agan nage, Eeke menggerak.

²⁸Aap iniki worokot nen ndugwi puwak nduk eerogo piige, Oreewi inom kunik nogo inabok mbanit nage paga mbugunogo mappiige, Eeke menggerak.

²⁹Aap ogogumbuk nogo nen oreeluk ambokan lagangge nagaatik, At eebe wonok tu maluk me pi nage menggerak.

³⁰Aap ambi nen enegen nimik ari kenok, at maluk eeriyak koongge yelok kogwe, Ndi, aap ambi nen ambe kamuk ari kenok, iniki alik ambi koombunuk ari mbakwi, Eeko menggaarak.

³¹Ineeruwak kenen wonage kenok ti, obeelom mban eerit nugwi iigak, wundeegerak me, Nggare-nggare abu kigirikwe yirik kwak aret wonage menggerak.

³²Aap wakaa'ngget ti iya negen kwe, aap anini mbet-mbet wunggeelik yanggo yinuk wonage ti perak, abu iya o. Ndi, aap ambi omaawi ambik nen o kota ambi tebenggola unggwage kenok ti, iya aret kwe, Aap ambi anini mi'nage kenok tebenogo pege ti perak, mondok iya lombok o!

³³Ta mippuurak kin kaawok nduk iri'ngga mbanak waganggo menggaarak kwe, “Ti aret wamen o,” yinuk, yorage menggerak nogo ti, Aliku ALA nen aret o.