Read Western Dani Kini Wuppiige 17 Bible Online

Kini Wuppiige 17 - Western Dani bible

Kini Wuppiige 17

¹Kiniki ugun tayenak logonet mbi abuk mban nunggo logorak ti op aret kwe, Wone-wone yogo logonet, laago nggwok larak nunggo logorak ti perak, maluk aret o.

²Aap ayeloman iniki warak ambi nen wulaga ambi ogoba enggali eerogo pit nage nogo liirogon arum wonage kenok, Ogoba nen eyate apuri tumburirage logonet, at inom aret wogorigin o.

³Kani eyak paga mbuti perak abut mbanggwi, Kani aganggen paga mbuti emas abut mbanggwi, Eeko menggaarak kwe, Aliku ALA nen perak, Aakumi iniki abut mbangge menggerak.

⁴Aap maluk mendek nen inoone maluk yogwe nogo inaruk konenggwi, Aap pilit pugungga nen aakumi maluk eeppiyoorak yogwe nogo liippugwi, Eeko menggaarak.

⁵Aap ambi nen aap ineenggi lek mendek nogo miyuk-meya eerogo piige kenok, at ogobakkigirogo piyareegerak nogo aret meek eerogo pege menggerak. Aap ambi nen aakumi maluk inoba aremenggerak me, “Op togon eeki,” yinuk, ale'nggen mbake kenok, at yemenggerak onggo oba arigin lek ti lek, oba arigin aret o.

⁶Aap inanggok inenggare-nggare mendaarak ti, inombowologwe aret. Ndi, wologwe nen iya inombakwi nogo ti, inogobamini aret.

⁷Aap wi nen inoone abe mendek yogolik me, Aap inayuk warak nen inoone pilit ti nonggop togon yuurak mbakop? Meek aret o.

⁸Mage yugu kagak eeruwok nduk, wu wogorogwe nogo ti, Inili eeka aret mbakwi me, Wogorogwe iinok, eerit nugwi abok aret A'me mban arit nage menggerak.

⁹Aap ambi nen at maluk eeppege kwe, “Op aret o,” yinuk, puk age kenok, at nabuwa-kabuwa mbakwi nogo aret mugurok nage menggerak kwe, Aap maluk eeppege nogo nen ambinom mban eeppit nage kenok perak, at ore nogo aret ogoorogo pege menggerak.

¹⁰Aap iniki warak kenok, wone ne ambit paga aruk waremenggaarak aret liippege menggerak kwe, Aap iniki lek wi kenok perak, ne 100 kuli yawi waremenggaarak kwe, liippegeelik aret o.

¹¹Aap iniki maluk kenok, wone yugu eeriyak eebi mba'nuk, maluk eeriyak mban mugurok nage menggerak me, Iniki koonnaruwak nduk, aap inanini ambik at owagam nappiya wogo menggaarak.

¹²Nggwiya aagalogwe piginakwi iinok, inagalo ngguk agan aap inom lambunggwi iinok ti, aaninggin negen aret kwe, Aap wi nen iniki lek nogo mendek eerit nage kagak aruk wariyak perak, aaninggin mondok iya aret o.

¹³Aap ambi nen at obeelom eeppege kagak onggo maluk aret eeppege kenok, At ame maluk mban aret wonage logogin o.

¹⁴Ndugwi puwok nduk, eekwi nogo ti, niyo narak paarogo pugwi kwak aret me, Wone-wone yogwe nogo ndugwi puurak awo aga'lek kagak, mbo pogo logonip o.

¹⁵Aap maluk eekerak kagak, “Eerulik o,” yogwi, Maluk eerulik aap abe kagak, “Maluk eekendak o,” yogwi, Eekwi ti, Imbirak Aliku ALA nen eebi lombok mbake menggerak.

¹⁶Aap wi nogo nen Iniki warak ariyak uugwe mbaka'lek logonet, Wu eenggime porogo wonage nogo ti, Aanom warogo aret porogo wonage menggerak.

¹⁷Aap ambi aaninggin at oreeluk oba age nogo, imbirak ndak-ndak kaawak nduk nda'nagagerak me, Nano mendek oreeluk oba agak eeke kenok, “Nawuluk kwak me,” yinuk, at mbo pegeelik iniki kunik mban aret eeke menggerak o.

¹⁸Aap ambi at ore yoge logonet, “Ndogop eeruwok o,” yinuk, wone perak togon koonogo pege, “Kat koba wonage nogo an aret teenikit o,” yoge, Eeke kenok, Aap ti iniki kole aga'lek aret wonage menggerak.

¹⁹Aap ambi nen wone wariyak inikilom mbake kenok, at maluk eerit noorak nogo inikilom mbake, Aap ambi nen eenggi warak tiyappege kenok, aap kiraaka wiirage kwak aret eeke, Eeko menggaarak.

²⁰Aap ambi iniki nggolawe kenok, at obeelom eekkolaga'lek aret wonage, Ndi, aap ambi oone mbere ari kenok, at nen aret maluk oba kwippake, eeko menggaarak.

²¹Aap ambi aput wi negen eerit nage paga ogoba iniki puru eerogo pege, Ndi, wulaga iniki lek wi ogoba nogo ti, iniki ale'nggen lek aret wonage, eeke menggerak.

²²Aap iniki ale'nggen mbakwi ti, obat nunggwi paga obeelom mengga kwak aret wonage menggerak kwe, Ale'nggen lek iniki puru aago wonage kenok perak, eebe wono eerogo patit unggwage menggerak o.

²³Aap ambi eekerak onggo oba puurak yugu nogo eeppukwak wu kumaarogo wogogwi nogo Aap maluk mendek nen kolage menggerak.

²⁴Aap wone yelok kaga nogo nen iniki warak ariyak nogo mban koonit nege menggerak kwe, Aap iniki lek wi negen nogo perak, “O nggween irip me time ndogop kwak pit nane,” yinuk, iniki koonogo nappit nege menggerak.

²⁵Wulaga iniki lek wi negen eerit nege paga ogoba iniki andi eerogo pege, Ndi, eerit nege paga agalo nen, “Naagaluk abe ndareegibok, ao,” yinuk, iniki warogo pake, Eeko menggaarak.

²⁶Aap maluk eeka'lek obeelom wonage kagak, maluk onggo eeppugwi, Aakumi inoweewi koonak eeppiigwi iigak, yawi inookwi, Eeriyak ti, maluk aret o.

²⁷Aap yi wone ndi wone alom eenu nogo nen oone liippunuk ari, Aap iniki warak nogo nen iniki yungguppegak ari, Eeko menggaarak.

²⁸Aap iniki lek wi aret kwe, puk wonage kenok, iniki warak ombakwi, Ndi, oone lek wonage kenok, iniki ngget ombakwi, Eeko menggaarak.