Read Western Dani Kini Wuppiige 18 Bible Online

Kini Wuppiige 18 - Western Dani bible

Kini Wuppiige 18

¹Aap ambi oreewi inom ogoorak logonet, at eeriyak uugwe mbake nogo mban eerit nage, Aakumi iniki koleewak nen eeriyak op mbakwi nogo yogwi iinok, anini mi'nage, Eeke menggerak.

²Aap iniki lek wi nogo nen yi wone ndi wone eenu ariyak nogo eebi mbake logonet, At iniki koongge nogo mban tiyappit noorak inikilom mbake menggerak.

³Aap maluk eeriyak inikilom mbakwi nogo nen aakumi meek eerogo piyoorak kunduk inikilom aret mbakwi, Ndi, aap endage maluk age kenok, kunume-oome at abok mban agan nugwi, Eeko menggaarak.

⁴Aakumi inoone yogwe ti, niyo aloboguk kwak wonage menggerak me, Aap iniki warak nen agan nugwi nogo ti, niyo eneeri mili kila-kila wundi wage menggi kwak aret wonage menggerak.

⁵Aap maluk mendek inom a'nuk, inaana'le mbanggwi, Ndi, aap maluk eeka'lek ugun wonogwe iigak, “Maluk eekotak o,” yinuk, yorogwe, Eekwi ti, maluk aret o.

⁶Aap iniki lek wi oone paga nen, “Kinoone yi-wu yo'ninip o,” agan nege, Oone agan nage paga yawi nukko'net nege, Eeke menggerak.

⁷Aap iniki lek wi nogo oone paga nen at eebe aret lek eerogo pake, Oone ari paga nen keele pugu kwak yilunggolage, Eeke menggerak.

⁸Aap ambe irip paga wonok nege ti, ombat tele kwak aret wonage me, Aap ambi wone ti konengge kenok, inikime mondok ya'nari wangge menggerak.

⁹Aap yogaatak liirogon eekeelik oweeluk-awuluk kwak ti, Yi mendek ndi mendek pup eerogo pega ti aret.

¹⁰Aliku ALA endage ti, o nggorek omaawi wurik kwak aret wonage me, Aap iniki abe koonak nogo nen mbe agan time unggwi na'nuk, ineebe obeelom aret wonogo menggaarak o.

¹¹Aap ineenggi warak nogo nen inamendek ambik wonage ti, O kota yugum pak tiyarogon wurik kwak wonage mbako menggaarak.

¹²Aap ambi aa'nduk iniki tiyappatit nege kenok, peebi endage maluk age menggerak kwe, Ndi, aap ambi aa'nduk iniki tebeppake kenok perak, peebi ayuk wuko menggaarak.

¹³Aap ambi wone awo aruk liirogon konengga'lek logonet wone onggo mbet-mbet ari ti, Aakumi nen, “Wi negen agan nege kenggali o,” yinuk, yogo menggaarak o.

¹⁴Aap ambi kugi andi eeremenggerak kwe, iniki nen, “An kambuurak neebi,” mbake kenok, obeelom aret age menggerak kwe, Aap ambi, “Kambuurak kugi aret kunggirak kagi,” mbake kenok perak, ta nen obeelom eerogo pigin mbakop? Lek aret o.

¹⁵Aap wone yelok kaga nogo nen yi wone ndi wone alom ineenu eekkologwe, Aap iniki warak nogo nen yi wone ndi wone ineenu aruwak nduk, inaruk konenit nugwi, Eeko menggaarak.

¹⁶Aap ambi nen aap nggwok ambi yori ungguurak uugwe mbake nogo, amendek wogoremenggerak paga tu mbininogo pege, Wogoremenggerak paga at nen wonok aap nggwok nogo owagam pi unggwage, Eeke menggerak.

¹⁷Aap ambi owak loonggo logonet, peebi yoriyak awo kagak, aa'nduk yogwi inoone nogo ti abet aret mbake menggerak.

¹⁸Wone wakwi iinok, “Alom ta eekerak?” kin kaawak nduk mbere mbanggwi, Mbere mbanggaatak inoba age kenok, wone wakwi nogo lek aret age, Eeke menggerak.

¹⁹O kota ambi omaawi ambik tebenogo puurak ti op negen kwe, Aap ambi ore nen iniki warogo pegetak nogo iniki yanggonogo puurak ti perak, meek lombok aret o. Wone wakwi nogo ti, aap nggwok owa'nagat tu unggwogo menggam nowa'mbit-kowa'mbit eerak menggi kwak aret o.

²⁰Mbi ndonggorogon nenok, “Abu aret nonggo o,” yogo mengga kwak, wone yorogwe paga, “Op togon yorogo o,” yinuk, yogo menggaarak. Ndi, wone yoragaatak ndak-ndak eekwi iinok, iniki tayok ari menggerak.

²¹Inoone agan nugwi ti nen aakumi ineenik eerogo piige, inoorogo piige, eeke menggerak me, It aap inoone agan nugwi inikilom mbakwi ti, irip paga inoone yemenggaarak onggo ndak-ndak aret kologo logogun o.

²²Aap ambi nen akwe kolage kenok, abe mendek aret kolamenggerak me, Aliku ALA nen ale'nggen eeppege logogin o.

²³Aap eenggi lek nogo nen, “Nabuwa ket o,” yinuk, yoranet nege menggerak kwe, It aap ineenggi warak nogo nen perak, wone onggo panggok togon yorogo menggaarak.

²⁴Aap ambi oreewi ambik wonogwe kwe, ambi oba age kenok perak, mbo punuk mbaganggo menggaarak. Ndi, aap ambi owe-awot iniki mbuuluk kunik eeginake menggerak kwe, At ambi perak, oreewi iniki mondok kundugu lombok aganake menggerak.