Read Western Dani Kini Wuppiige 19 Bible Online

Kini Wuppiige 19 - Western Dani bible

Kini Wuppiige 19

¹Aap ambi eenggi lek obaabut obeelom ti, op aret kwe, Aap iniki lek wi negen nen aakumi inambokan laganikit nduk oone agan nage ti, maluk aret o.

²Iniki liippega'lek logonet, oone aganggen kereembu agan nage, Mbet-mbet eerit nage logonet, irip paga ninggin aret ari nage, Eeke nogo ti, maluk aret o.

³Aap ambi iniki lek wi negen eerit nage paga maluk aret eekkolage nagaatik, anini wuk togon Aliku ALA mberege menggerak.

⁴Aap eenggi warak wonage paga oreewi ambik ogo menggaarak kwe, Aap eenggi lek wonage paga perak, oreewi mbo punuk mbaganggo menggaarak.

⁵Aap ambi eeke enegen kegetak kwe, piliret, “Eeke koolik o,” ari nogo ti, onggo oba arigin lek ti lek, oba aret age, Ndi, aap ambi oone pilit mban pugunit nege kenok kunduk, onggo eeppigin lek lek, aret eeppege, Eerigin o.

⁶Aap nggwok ale'nggen inombaruwak nduk, aakumi apit aret at mban eeppit nugwi, Aap ambi we wogorage kenok, at mban inik-inik irit nugwi, Eeko menggaarak.

⁷Aap eenggi lek nogo owe-awot abok aret ineebi ombako menggaarak me, Oreewi kunduk, abunuk mbo punuk mbaganggo menggaarak. At nen, “Yeenggwa ni'nip ubi!” yinuk, muguren nage menggerak kwe, Ineenggi-iniyok lek aret iige menggerak.

⁸Aap ambi nen iniki warak eekkolage paga at aret iniki kunik eekkolage, Aap ambi nen, “Yi wone ndi wone neenu arikit lak, ao,” mbake paga at aret obeelom eekkolage, Eeko menggaarak.

⁹Aap ambi eeke enegen kegetak kwe, piliret, “Eeke koolik o,” ari nogo ti, onggo oba arigin lek ti lek, oba aret age, Ndi, aap ambi oone pilit mban pugunit nege kenok, at eebe aret lek eerogo pake, Eeko menggaarak.

¹⁰Aap iniki lek wi negen ti, abu kigirikwe logorak ndak-ndak lek aret me, Aap ayeloman ambi nen nonggoti ogobamini nagawan-nagawan wone lengganogo yoroorak mbakop? Abunuk meek aret o.

¹¹It aap iniki warak nogo paga nen inanini wungge nogo tebenogo wurakwi, Maluk eeppugwi iigak, “Op aret o,” yinuk, puk wonogwe paga, “Wi,” irogwe, Eeko menggaarak.

¹²Aap endagembogut anini wungge ti, singa anini nen oone kole ari menggi kwak aret kwe, Ale'nggen mbake nogo perak, konaananggen iri'ngga oba luurogo pege menggi kwak aret menggerak.

¹³Wulaga iniki lek wi eeke paga ogoba aaninggin eerogo pege, Ndi, aap ambi akwe nen wone wariyak mban eeke nogo ti, terap puk wanggak eeke menggi kwak aret ari, Eeko menggaarak.

¹⁴O wurik inom, yi mendek ndi mendek inom, ti, inogobamini nen inapuri ineyate wogorogo menggaarak kwe, Kwe iniki penenak nogo aap kolaawak nduk, Aliku ALA nen aret wogorage menggerak.

¹⁵Aap yabu eeka'lek puk wonogwe paga nogo yuurak mban eeginabi wage, Ndi, yabu eeriyak ineebi mbakwi paga mbi abu aganake, Eeke menggerak.

¹⁶Aap ambi nen, “Yogop ee'nu ndogop ee'nu,” yoge nogo liirogon eeke paga eebe aret ili eerogo pake menggerak kwe, Aap ambi nen Ala wone yugu meek eerogo pege paga eebe aret kangge menggerak.

¹⁷Aap ambi nen aap ineenggi lek inabuwa nen wogorage ti, Aliku ALA wogorukwak wogorage me, Aliku ALA nen onggo aap ti wogorigin o.

¹⁸Kaput awo tawe age kagak iniki koonogo puurak op me, koonogo pege logot o. Ugun eerit nage paga wakkolamenggerak kangge kenok, “At nen aret wakkolaawak nduk, ogoba nen aruk waka'lek teppigi,” kombarukwak, togop eeriyak mage o.

¹⁹Aap ambi anini mbet-mbet wungge paga aakumi nen maluk eeppugwi ti, obaalombok aret o. Ili ari keenok, “Peebi togop mban nili ari logogin,” yinuk, eerit nage logokwak, obaalombok eenu eekkolaawak nduk, mbo piyet o.

²⁰Kat karuk wakwi nogo liippege, wone mamunggugwi nogo liippunuk wagangge, eeke keenok, Irip paga kiniki warak lombok eekkake kaamunggun o.

²¹Aakumi nen yi eeriyak ndi eeriyak ambik iniki koonggo menggaarak kwe, Aliku ALA nen eeriyak mbake perak, aret age menggerak.

²²Aap iniki, “Ao,” mbakwi nogo ti, “It ninom monggoorak ninabuwa nen ninendage obeelom eerogo pinanit nogo logowak,” mbako menggaarak. Aap eenggi lek logorak ti op aret kwe, Aap pilit pugungga logorak ti perak, maluk aret o.

²³Aliku ALA inagabiti mbakwi paga ineenik logonet, inale'nggen wonogwe, Ndi, “Aaninggin ambi ninoba arigin,” mbaka'lek iniki tayenak logonet, nogo yugwi, Eeko menggaarak o.

²⁴Aap eenggi tanep nogo nen mbi yuma yonggolak eenggi pigamenggerak kwe, Kilirogo ambeme mambega'lek aret wonage menggerak.

²⁵It aap meek eerogo piiga yawi wakwi iinok, aap iniki yuundurak nogo kwe, iniki warak mamunggologwe, Ndi, it aap wone yelok kaga nogo inaruk wakwi iinok, yi wone ndi wone ambinom ineenu eekkologwe, Eeko menggaarak.

²⁶Wulaga ambi nen ogoba ale-pale eerogo pege, agalo mugogo wumbege, eeke paga Wulaga ti, enggali eekkolage, endage maluk aret eerogo pake, eeke menggerak.

²⁷Togop aret me, naput yi wae. Karuk wakwi nogo konengga'lek mbo pege keenok, Yi wone ndi wone mamunggolagandak nogo nomonogo mbo punuk, tu alik paga nage logomunggun o.

²⁸Aap ambi eeke enegen kegetak kwe, piliret, “Eeke koolik o,” ari nogo nen a'me nggelok eeppiiga oone yugu nogo meek eerogo pege, Ndi, aap maluk mendek nen pilit wone mban nenet nege logonet inikilom mbake, Eeko menggaarak.

²⁹Aap miyuk-meya eerogo piiga eeppiyoorak onggo inake pipuk aago wonage, Ndi, aap iniki lek wi inamborowak paga yawi inooriyak inake eerak wonage, Eeke menggerak.