Read Western Dani Kini Wuppiige 20 Bible Online

Kini Wuppiige 20 - Western Dani bible

Kini Wuppiige 20

¹Anggur amburu nunggwi paga aakumi miyuk-meya eerogo piyoorak aganake, Ndi, amburu kumili aganaka nenggaatak paga ndugwi puurak eeginake, Eeke menggerak me, Aap ambi nengge nagaatik, tu alik nomo agan nage kenok, iniki lek aret mbako menggaarak.

²Aap endagembogut anini wungge nogo ti, singa anini nen oone kole ari menggi kwak aret me, Aap ambi nen at anini wunduwak nduk eeppege kenok, at eebe aret ogut punggolage menggerak.

³Aap ambi wone wariyak eebi mba'nuk mbo pege kenok, aakumi nen at ayuk wuko menggaarak kwe, It aap iniki lek wi kenok perak, wone wariyak inikilom me, wone mbet-mbet wako menggaarak.

⁴It aap ineenggi tanep nogo nen o ena koonak paga yabu eeka'lek logomenggaarik, Anggen mbanggwi eyom paga anggen kwaaremenggaarak mendek eebe lek aret kogo menggaarak.

⁵Aakumi inikime eeriyak koonggwi nogo ti, niyo aloboguk ambik kwak aret wonage menggerak kwe, Aap iniki warak nogo nen yi toologo nippi wogo mengga kwak, iniki koongge nogo pilanogo nippi wage menggerak.

⁶Aakumi apit nen, “Nit mbo pinagagun lek o. Niniki mondok kunik eekkinako logogun o,” yogo menggaarak kwe, Aap ambiriluk ambi nen oreeluk mbo pegeelik iniki kundugu lombok eeke menggerak kenok ti, iya aret me, aap ti mendek ta nen kwaakkoorak op mbakop?

⁷Aap iniki abe koonak nogo nen maluk eeka'lek abe mban eerit nage logomenggerak paga Obaane'me apuri wiganak nogo inale'nggen aret mbako logogun o.

⁸Aap endagembogut nen aakumi inowak looninake menggim kwi'nari lagangge nagaatik, Aap maluk eekaatak abok aret yelok iinet nage menggerak.

⁹“An niniki abu kikak naka'lek wonage. An noba mbeenogo pakirak me, maluk eeka'lek wonage,” yinuk, Aap ta nen yuurak op mbakop?

¹⁰Aaninggin abe wakkaga kagak alik ambi paga wakkogwe, Togolowak abe yonggoka kagak alik ambi paga yonggokwi, Eekwi ti, Imbirak Aliku ALA nen eebi lombok mbake menggerak.

¹¹Wologwe inobaabut abu obeelom koonak ilik, mbakaatak kwe, It eerit nugwi paga inobaabut ineenu ogo menggaarak.

¹²Ninaruk paga konenggwi, ninigen paga kogwe, eeko logowok nduk, Aliku ALA nen imbirak ogobakkigireegerak.

¹³Kat mbi abu eekkabi worookwak, nogo yuurak mban uugwe mbariyak ti mage o. Ata, kambi ambik nengge logonok nduk, nogo yega'lek yabu mban eeke logot o.

¹⁴Aap kunggolage nogo nen, “Yi maluk o. Yi abu maluk aret o,” ari nagaatik, Abu kunggo'nok, “Ndogop kunggirak yi kaanip o,” yinuk, wogoppatit ame nage menggerak.

¹⁵Mbuti emas inom, yugum kere'li-kere'lo ambik eerak inom, ti, wonage menggerak aret kwe, Aap ambi eenu nen oone liirogon ari kenok perak, iya lombok me, aap ti mendek kwaakkoorak meek aret o.

¹⁶Aap ambi nen, “Aap nggiru anomat ti, an nen aret teenikit o,” ari kenok, at ayum waamunggun o. Woppunuk porogo wonage me, aap onggo wogorulik nogo nen, “Onggo wo'nirulik o,” yokkiri wage kenok, ayum ti aret wogorumunggun o.

¹⁷Aap wi-wi aganako logonet, mbi kologwe nogo ti, ombat obeelom aret kogo menggaarak kwe, Abu nunggo nagaatik, yugum anggen mban inambeme yebet aago kogo menggaarak.

¹⁸Eeriyak mbaremenggendak nogo koreewi kinom koonogo pege, Wim namburiyak mbake keenok, “Nonggop eeruwok o,” yinuk, koreewi yoranet nege, Eeke logot o.

¹⁹“Wone kote me, yugup o,” yoragaatak kagak inamili irip paga wonok nega nen ugun paganogo pit nugwi me, Aap inoone ugun agan nega ti, kinom lambuniyak mage o.

²⁰Aap ambi nen agalo ilik, ogoba a, kugi pulunogo pege kenok, O iniki apit aago paga andi wuninik wonage nogo noguk yigin o.

²¹Aap tawe wonage paga yate mbet-mbet unde eekkolage kenok, lek aremenggerak me, Irip paga ale'nggen kaagin lek aret o.

²²“Maluk eeppanggendak onggo eeppagagin aret o,” yinuk, yuurak ti mage o. Ata, Aliku ALA nen onggo eeppuwak nduk, tokkage logot o.

²³Aaninggin wakkogo logonet, yugum wakkaga abe kagak alik paga wakkogwe iinok, Aliku ALA eebi lombok mbake, Ndi, aaninggin wakkagak irip abe ari nage kagak, alik paga pi wogwe iinok, inikilom lek eebi mbake, Eeke menggerak o.

²⁴Aakumi iniyok pit nogo logorak nogo ti, Aliku ALA nen aret koonogo piinet nage menggerak me, Aakumi iniki mba'nuk iniyok pit noorak ti, nonggop togon liippuurak mbakop? Meek aret o.

²⁵Aap ambi nen iniki koongga'lek kagak perak togon, “Yi Ala ake o,” yinuk, nggomoorogo punuk, ti'nuk peebi, “Nonggop eekibok eekirak?” mbake nogo ti, Keele pugu inenggaanok yilunggoloorak kwak aret o.

²⁶Aakumi nen gandum leennaruwak nduk piyak-piyak eeko nagaatik, yugum aambirangga kole nogo paga yigiko mengga kwak, Aap endagembogut iniki warak nen it aap maluk mendek togop aret eerogo piige menggerak o.

²⁷Aakumi iniki nogo ti, Aliku ALA andi wuninik kwak aret me, Inikime koonggwi nogo liippiinet nage menggerak.

²⁸Aap endagembogut nen aakumi at abu'me wonogwe nogo inabuwa mbake, liirogon aret kooninake, eeke paga At eebe kuuri'me aret nege, It at abu'me menggaarak inabuwa mbake paga at wone lengganogo yorage menggim mondok omaawi aret wonage, Eeke menggerak.

²⁹Aap tawe inobaanggi-inobaangge eerak kwak ti, inomaawi aret. Ndi, aap inanggok inayuk warak iigwi nogo ti, ineeruwak kenen ti aret.

³⁰Inamiya timbo eerogo piigwi paga maluk ambinom eeriyak inagabiti eerogo piigwi, Ndi, yawi inookwi paga inikime lombok koonggwi nogo kinogo wumbiigwi, Eeko menggaarak.