Read Western Dani Kini Wuppiige 21 Bible Online

Kini Wuppiige 21 - Western Dani bible

Kini Wuppiige 21

¹Aap endagembogut iniki nogo ti, Aliku ALA eenggi paga wonage me, “Niyo time aret nage logowak o,” yinuk, koonogo pegetak nage menggi kwak, “Aap endagembogut iniki ndogop koonuwak o,” yinuk, eeppege menggerak.

²Aakumi nen, “Nit eekwi abok aret op eerit nogo ogoorik o,” mbako menggaarak kwe, Aliku ALA perak, alom ngge eeruwok nduk, iniki koonggwi nogo liippiige menggerak.

³Aliku ALA ake warogo wogogwi ti, mbuuluk inikilom mbake menggerak kwe, Abe koonak mban eerit nugwi, eekaatak a'me nggelok eeppiinet nugwi, eekwi iinok perak, inikilom nggwok aret mbake menggerak.

⁴Iya nombaruwak enegen mbogut paga nege, iniki tiyappatit nege, eeke ti, Aap maluk mendek andi wuninik kwak aret me, maluk aret menggerak.

⁵Aap iniki koongga'lek perak togon eerit nage paga amendek lek eekko'net unggwage menggerak kwe, Aap iniki liirogon koombunuk eerit nage paga perak, amendek ambik eekkolage menggerak.

⁶Aap ambi aakumi wi-wi eerogo piinet nage logonet, eenggi warak lombok eekkolamenggerak nogo ti, Aap kambuurak mugurok nega nen amendek kuwak eerogo pegetak kwe, laago aagi ne ambit lek age menggi kwak aret lek age menggerak o.

⁷It aap maluk mendek nen obeelom eerit nugu logorak ineebi mbako menggaarak me, Maluk eeppiinet nugwi paga inenggaawak lek eerogo pako menggaarak.

⁸It aap maluk eekwi inaru ti, yelok-nggolok nugu menggaarak kwe, It maluk eeka'lek obeelom mban eerit nugwi nogo perak, inaru koonak paga aret nogo menggaarak.

⁹Aap ambi akwe wone waka imbirak oome logorak ti aaninggin aret kwe, Ooliya wurik me ari noorak ti perak op aret o.

¹⁰Aap maluk mendek nen maluk eeriyak mban uugwe mbarit nage logonet, Oreewi inabuwa mbaka'lek aret wonage menggerak.

¹¹Aap meek eerogo piiga nogo eekerak onggo aaninggin oba pugwi iinok, it eeriyak kobak mendek nogo nen iniki warak mamunggologwe, Ndi, it aap iniki warak nogo inaruk wakwi iinok, abunuk ineenu aret eekkologwe, Eeko menggaarak.

¹²At Iniki Abe Koonak nogo nen it aap maluk mendek iname liippiige, It aap maluk mendek nen eeriyak mbakwi nogo lek eerogo piige, Eeke menggerak.

¹³It aap ineenggi lek nen inoone nggwok paga, “Yeenggwa niret o,” aap ambi yogwi nogo aruk nappatinuk wonage kenok, At kunduk oone yemenggerak kwe, onggo yorugun lek aret o.

¹⁴Aap anini mbake nogo inamendek kumaat-kumaat wogogwi paga iniki yanggo ari, Ndi, aap anini alik negen wungge nen eeppiyoorak mbake nogo eeppiige kero, wam ambeme wuppugwi paga anini tebe agan wangge, eeke menggerak.

¹⁵Eekaatak a'me nggelok eeke paga it aap iniki abe koonak nogo inale'nggen mbako menggaarak kwe, It aap maluk eeka perak, inamineeri ne agan nage menggerak.

¹⁶Aap ambi nen it ineenu logonet eeko menggaarak inaru nogo mbo punuk nomo agan Aakumi kambunuk nogo menggam kuwak eerak wonogwe me, nggelok yi nage menggerak.

¹⁷Aap ambi iniki ale'nggen logorak mban uugwe mbake kenok, amendek lek aret arit unggwage, Ndi, aap ambi anggur amburu inom, wam amburu inom, mban inikilom mbake kenok, amendek ambik aga'lek aret wonage, Eeke menggerak.

¹⁸It aap iniki abe mendek nogo inake aap maluk mendek nogo aret ogwe, Ndi, it aap iniki koonak nogo inake iniki nggolawe aret ogwe, Eeko menggaarak.

¹⁹Aap ambi akwe anini mban wungge, wone wake, eeke nogo imbirak logorak aaninggin kwe, Eyonggaame time alik ari nanuk logorak perak, op aret o.

²⁰Mbi ombat abe mendek inom, wam amburu inom, ti, aap iniki warak ame lek ageelik wonage mban menggerak kwe, Aap iniki lek wi nen perak, amendek mbet-mbet lek eerogo pake menggerak.

²¹Aap ambi nen obeelom mban eeppiinet nage, aakumi inabuwa mban mbarit nage, eerit nage paga At eenik wonage logonet ale'nggen kage, obeelom mban wonage, ayuk warak wonage, Eeke menggerak o.

²²Aap iniki warak nen aap wim kalu-kalu o kota wonogo menggam nogome obaga kwi'nari unggwage, Yugum pak wurik it nen iya mbakwi nogo aret langgunogo pege, Eeke menggerak.

²³Aap ambi nen maluk oba age kero, ambe inom, oone agan nage inom, liippunuk arum wonage paga At eebe aret ili yikkolage menggerak.

²⁴Aap iniki tiyappatit nugwi, “An iya,” mbarit nugwi, eekwi inendage ti, Aap Meek Eeppiiga, aret me, It nogo nen, “An mban, Wi, niruwak,” mba'nuk wogoppatit nugu menggaarak.

²⁵Aap eenggi tanep nogo yabu eeriyak eebi mbake me, Iniki uugwe mbake paga nen at eebe aret wakkolage menggerak.

²⁶At iniki nen nenet nage kagak, o kubondendok nen nok, oonikiya ari nage menggerak kwe, Aap iniki abe koonak nogo perak, wogogwi nogo kuli pega'lek kuluk aret wogorit wundi wogo menggaarak.

²⁷It aap maluk mendek nen Aliku ALA ake warogo wogogwi iinok, eebi lombok mbake menggerak me, Iniki maluk ambi koombunuk ake warogo pit wogwe iinok perak, abunuk eebi lombok mbake menggerak o.

²⁸Aap ambi eeke enegen kegetak kwe, piliret, “Eeke koolik o,” ari nogo nen ari kenok, oone taganogo pogo menggaarak kwe, Aap ambi wone liirogon konembunuk yaga nen ari kenok perak, ari logowak nduk, teppogo menggaarak.

²⁹Aap maluk mendek eenu mbaruwak etenggen ogom eerak wonage menggerak kwe, Aap iniki koonak nen perak, eerit noorak abu liirogon koombunuk, eerit nage menggerak.

³⁰“Aliku ALA tebenogo puwok o,” yinuk, aap iniki warak nogo nen at yogwi, Aap yelok kaga nen, Wone ndogop yogwi niinok, “E o,” yuurak yelok kagarak me yogwi, Aap wone koongga nen iniki liirogon koombunuk yogwi, Eeremenggaarak kwe, meek aret kaagun o.

³¹Wim eeriyak age kero, kuda paga panggombunuk pipuk eerogo pogo menggaarak kwe, Ineegin tiyappege menggerak nogo ti, Aliku ALA nen aret o.