Read Western Dani Kini Wuppiige 22 Bible Online

Kini Wuppiige 22 - Western Dani bible

Kini Wuppiige 22

¹Kineenggi warak eekkoloorak ti, op aret kwe, kinendage obeelom logowak nduk eeko logorak ti perak iya o. Mbuti perak inom, mbuti emas inom, kiniki kundugu eekkoloorak ti op aret kwe, aakumi nen iniki kundugu eekkinaburak ti perak, mondok iya o.

²Aap ineenggi lek ineenggi warak imbirak Aliku ALA nen mban ogobakkigirinabeegerak me, imbirak ndak-ndak aret o.

³Aap iniki penenak nen maluk at oba ariyak mbet-mbet yelok kage nagaatik, eebe op logokit nduk, kumaa'nage menggerak kwe, Aap iniki yuundurak kenok perak, ugun eerit nage me, aaninggin oba kwippake menggerak.

⁴Aap ambi iniki tebeppake, Aliku ALA agabiti mbake, eeke paga Eenggi warak age, ayuk warak age, eebe op mban wonage logonet, ale'nggen wonage, Eeke menggerak.

⁵Aap maluk mendek inaru nogo menggam alok-palok inom, keele pugu inom, wonage kenok, Aap ambi iniki tum wakkolaga nen tu ti paga naga'lek mbagangge menggerak.

⁶Aap ambi apuluk tu koonak paga nage logowak nduk aruk wake menggerak kenok, Wulaga ti, anggok a'nuk, tu ti mbo punuk, nomo agan alik paga nage logogin lek o.

⁷Aakumi ineenggi warak nen aakumi ineenggi lek inabu'me piigwi, Ndi, aap inanomat mbanak nen aap inanomat porogo wonage nogo inayeloman eerogo piigwi, Eeko menggaarak.

⁸Aap ambi nen maluk mendek awi yumbunit nage kenok, maluk mendek anggen aret mbanggolage me, At anini eeppiinet nage paga ayuk warak eekkolage nogo lek aret eerogo pake menggerak.

⁹Aap iniki ndoobu nen aap ineenggi lek ambi tumburirage menggerak me, ale'nggen kage logogin o.

¹⁰Aap miyuk-meya eeppiiga mugogo wumbiigwi iinok, Wone wakwi nogo nggobok ari, ndugwi pugwi ti lek age, ndi, inenggali wappiinet nage nogo lek aret age, Eeke menggerak.

¹¹Aap ambi iniki kikak naka'lek logorak, “Ao,” mbake, oone yanggonak mban ari, eeke menggerak nogo ti, Aap endagembogut nen aap ti, iniki kunik aret eeke menggerak.

¹²It aap yi wone ndi wone alom liippunuk yorogwe iigak, Aliku ALA nen enegen wogonake menggerak kwe, Aap wone abe kagak alik agan nugwi iinok perak, inoone lek eerogo piige menggerak.

¹³Aap eenggi tanep nogo nen, “Singa endekem wonage,” Ndi, “Wundi nage neenok, nibininake, eeke kero,” yinuk, oome mban menggerak.

¹⁴Kwe mbabilu oone ari ti, nggween kiiniki paga kabunik kwak aret wonage me, It aap Aliku ALA anini inombake nogo yigeebu time aret wanggo menggaarak.

¹⁵Elege-aabologwe iniki koonggwi tabarak wonage nogo ti, aap iniki lek eerit nege menggi kwak aret wonogwe me, Yawi paga inookwi iinok, it koonggwi tabarak wonage nogo nggigik togon wungge menggerak.

¹⁶Aap ambi eenggi warak eekkolaakit nduk, it aap ineenggi lek nogo tebenogo piige logonet, inamendek wagangge inom, Aap ambi nen it ineenggi warak onggo lek we wogorage inom, imbirak ndak-ndak ineenggi lek aret eekkologo menggaarak.

¹⁷It aap iniki warak nen wone yogo menggaarak nogo kat kinikime porogo wonage, Wone ti abok aret yuurak kambe paga lunik wonage, eeke keenok, kale'nggen eekkake logogin me, Wone ti liippege, it wone yogwe nogo karuk konengge, ndi, an wone mamunggege yi, “Mamunggola,” mbake, eeke logot o.

¹⁹Kiniki Aliku ALA oba panggombunuk logonok nduk, o yogondak yi paga an nen kat aret mamunggege agarik o.

²⁰Kat nen wone abe mendek nogo mondok abet aret mbake, At ambi nen, “Wone eebe yu o,” yokkege kenok, lik togon yoge, Eeke logonok nduk, An nen karuk wariyak wone inom, yi wone ndi wone keenu ariyak inom, wone abe yogo menggaarak alom 30 kuli liiru mbanogo wokkereegirak nogo lek a?

²²It aap tebenak wonogwe nogo ti, Aliku ALA nen inawone mbangge, Inamendek ndinggwi iinok, inamendek ndinemenggaarak nogo wagangge, Eerigin me, “Aap ti, eenggi lek o,” yinuk, amendek wagangge, It aakumi ambi eekkoloorak meek wonogwe nogo wone mbanggo menggam tebenogo piige, Eeriyak mage o.

²⁴Aap anini mbet-mbet wungga nen eerit nage nogo kat mamunggolage, Keele pugu paga kenggaanok nggerenggolage, Eerukwak, Aap anini mbet-mbet wungga nogo kore eekkolage, Aap anini wulo kimbirak kunggolage, Eeriyak mage o.

²⁶“Aap anomat mbanak an nen teenikit o,” ari logomenggendik, anomat teeniyak kamendek lek kenok, nogo yege keegak kat nogo yege menggendak eyo ndoonak waganggwi iyo, “Wone yogop eeruwok o,” yogwe nogo koone perak togon ari, “Aap anomat mbanak an nen teenikit o,” yinuk, mbet-mbet ari, eeriyak mage o.

²⁸Aa'nduk togon kombomini nen, “Kanggween yi kuli o,” yinuk, yugum mippereegwaarak kagak, ya langgok eerogo puurak mage o.

²⁹Aap ambi eenggi amburu paga yabu eerit nage kenok, waganggwi nogo kenegen kage menggendak ilik lek a? At aap ti, aap inendage lek mendek inake eerit nage logogin lek o. Ata, aap inendagembogut inake eerit nage logogin aret o.