Read Western Dani Kini Wuppiige 23 Bible Online

Kini Wuppiige 23 - Western Dani bible

Kini Wuppiige 23

¹Kat aap nggwok ambi kimbirak kwi'na'nuk mbi nengge logonet kenok, Yi mendek ndi mendek larak kowagam wonage ti liippunuk nengge,

²Ndonggok togon noorak eekkake kenok, ando pegak nengge, Eeke logot o.

³At aap ti, ambi larak namenggendak paga yilunggake kero, Ombat abe larogo pit namenggerak nogo kiniki nen nenet ungguurak mage o.

⁴Keenggi warak eekkolaakit nduk, wakkenet ungguurak ti mage o. Ata, kiniki warak kenok, eekkake ti kagak tebenogo wuppege logot o.

⁵Towe pen ware oo'nu enaabit wungge nagaatik, wiga agan ogona time iyok lek lek ari nage menggi kwak, Kamendek wonage ti, kenegen awo pekkage keegak, aret lek arigin o.

⁶Aap nggilimi mendek nen, “Mbi inom, niyo inom, ambinom nengge logot o,” yinuk, Oone abe lek onggo kunemenggerak inikime linggingge logonet, yokkirigin me, At ambi nengge, mbi ombat abe laremenggerak nogo kiniki nengge, eeriyak mage o.

⁸At togop mbake kagak at ambi lunggunogo wurabemenggendak nogo peyak wurogo pege, “Kambi ombat abe ninggirak me, wa,” yoremenggendak nogo we aanom warogo aret yoge, Eerumunggun o.

⁹Kat kiniki warak nen koone yoremenggendak paga aap iniki lek wi nogo nen meek eerogo pagarak me, Aap iniki lek wi negen ti, wone yoriyak mage o.

¹⁰Nggween o maan mbanak kagak ya longgok eerogo pege, Ndi, elege-aabologwe moono inanggween yabu eekkologo menggam wa nage, Eeriyak mage o.

¹¹Eeke keenok, It Inaana'le Mbangga ti, omaawi ambik wonage me, Inawone mbangge logonet, koone lek eerogo pagagin o.

¹²Wone mamunggakwi nogo ti, liirogon wagangge, Ndi, yi wone ndi wone ineenu nen yokkugwi ti, karuk liirogon konengge, Eeke logot o.

¹³Kapuluk aruk waka'lek mbo puurak ti mage o. Yawi paga wake keenok, at kambigin lek me, Wake logomunggun o.

¹⁴Kapuluk ti, aakumi kambunuk nogo menggam nage kero, agap ndarogo yawi paga wake logomunggun o.

¹⁵Napuluk yi wae. Kat kiniki warak lombok wonage keenok, an niniki ale'nggen aret ee'nake,

¹⁶Ndi, koone paga kunduk, abet mban ari keenok, an ninikilom mbake, Eerigin o.

¹⁷Kat ko'lu eeppagarak ti, abet aret wonage, ndi, kiniki lunik wonage nogo ti, lek arigin lek mondok wonage, Eeke logogin me, “It aap maluk eekwi ti, an togon eerikit lak, it mban eekwi, ao,” yinuk, mbake ti mage o. Ata, Aliku ALA kagabiti mbake ti mban mugurok-magarok nage logot o.

¹⁹Napuluk yi wae. Wone yi, karuk liirogon konengge logomenggendik, kiniki warak eekkolage, Tu abe koonak paga nage logonok nduk, kiniki liirogon arum wakkolage, Eeke logot o.

²⁰It amburu kumili aganaka nengga inom, wam kiinduwak linik inom, ineenggi lek age, Ndi, we nogo mban yugwi iinok, inayum nibinik-ndelenak age, Eeke menggerak me, Aap anggur amburu ndonggok togon nunggwi, wam kiinduwak me, ndonggok togon nunggwi, eekwi iinok, kinom noorak mage o.

²²At ndakkabeegerak kogoba nogo oone liirogon konengge, Ndi, kagalo abu kweegelo age kenok, at keebi mbake, Eeriyak ti mage o.

²³Wone pilit lek abet yogwe nogo kunggolage logomenggendik, aap ambi inoba kuniyak mage o. Iniki warak ariyak wone inom, inaruk wariyak wone inom, ineenu ariyak wone inom, mugurok nage logot o.

²⁴Aap ambi iniki abe koonak wonage kenok, ogoba ale'nggen ambik aret mbake, Ndi, aap ambi apuluk iniki warak nen eerit nage paga at inikilom aret mbake, Eeko menggaarak.

²⁵Kat kogoba inom, kagalo inom, inale'nggen aret wonogwe, Ndi, kwe kat ndakkabeegerak nogo kunduk, ale'nggen aret wonage, Eeko logowak o.

²⁶Napuluk yi wae. Kiniki an paga panggombege, An eerit nage nogo kenegen liippaninuk eeke, Eeke logot o.

²⁷Kwe ya wukak nogo ti, nggween kiiniki paga kabunik kwak wonage, Ndi, kwe mbabilu nogo ti, nggween ambe mbuuluk kabunik kwak wonage, Eeko menggaarak me,

²⁸Aap kumaaka kwak it nen aap kok lebeninabuwok nduk, enaarak wonogwe, It kumi nogo ti, aakumi inenggela'me nen aap inakuwi warak iigak, kumi it mban muguren nawak nduk, eeppiinet nogwe, Eeko menggaarak o.

²⁹Aap ta nen aaninggin oba wonage? Ta nen iniki wakkolage? Ta nen ndugwi pit nage? Ta nen iniki aagi eekkolage? Ta nen alom lek kagak amiya timbo eerogo pake? Ta nen enegen amiya eerogo pake? Eeke menggerak mbaken? Lek o!

³⁰It aap anggur amburu nunggo menggam elaambirik kwi'ndak mban wonogwe, Anggur amburu ombat alitik-alitak nanggelak-kanggelak toolak nogo ombat wakkanet nogwe, Eeko menggaarak ti nen aret o.

³¹Togop aret me, Anggur amburu laambu maa'ngga kunik kwak kenok, Anggur amburu ligit-ligit eeke kenok, Amburu abe me iniki paga yo agan wangga kenok, Kawooringgen nookwak, kenegen pekkoorak mage o.

³²Nengge kenok, waalo eyak inooke menggi kwak kooke, Waalo aakumi inooka eyak inooketak andi kogo mengga kwak eekkake, Eerak logonet,

³³Kenegen mbini-mbani eerogo pagage, Kiniki lek age logomenggendik, kiniki yi koonggak ndi koonggak eerit nage,

³⁴Aap niyo laut kilaarak-mogonik eeke paga nage menggi kwak, Aap yiiro paga nage menggi kwak, Keebe ambime nonggombagagak, ambime nonggombagagak eekkake,

³⁵Koone yi puguninuk ndi puguninuk ari, eeke logonet, “Nookaarak kwe, andi ee'naka'lek wonage, Yawi paga nookaarak kwe, andi ee'nake kaga'lek wonage,” Ari logomenggendik, “Amburu ambi naakit nduk, mbet-mbet neenik arikit lak ao,” ari, Eeke logomunggun o.