Read Western Dani Kini Wuppiige 25 Bible Online

Kini Wuppiige 25 - Western Dani bible

Kini Wuppiige 25

¹Aap Talomo nen wone alom eenu paga ambinom kini wuppiyareegerak wone it aakumi Yekura inowe endagembogut Kitikiya awuri liiru mbangga nen liiru mbaneegwaarak nogo yi o.

²At Ala nen wone kumaarogo pege kenok, ayuk wukwi, Aap inendagembogut nen wone kin paga agan nogwe iinok, inayuk wukwi, Eeko menggaarak o.

³Mbogut agi tiyarogon wonage, ndi, nggween yi, ogu teberogon wonage, eeke menggi kwak, Aap inendagembogut iniki ti, togop aret me, iniki mbakwi kwaakkoorak meek aret o.

⁴Mbuti perak nggween inom wonage nogo leenogo nappege kenok, mbuti perak mban agaatak me, aap mbuti perak paga ogobakkigika inake age menggerak.

⁵Aap maluk mendek aap endagembogut owagam nen leenogo wumbiige kenok, a'me nggelok eerit namenggerak paga at wone lengganogo yorage menggim nogome omaawi aret age menggerak.

⁶ Aap endagembogut enggaanom paga wogoppake, Ndi, aap nggwok kwi'nogo menggam, “An kunduk ninom kwi'narikit,” mbake, Eeriyak mage o.

⁷Aap ambi nen, “Lagi mok,” yokkege kenok, kwi'nari lagarak ti op aret kwe, Aap endage warak enggaanom paga, “Kat yime lek,” yokkege kenok, kenggali mbakak wambi woroorak ti perak, aaninggin aret o.

⁸Aap kimbirak menggendak ambi eeke kenegen abe nen kage kenok, mbet-mbet wone owak loonggo menggam pi woramenggendak alom kwaako logomenggaarik, Wone lek ari nage kenok, kat kenggali arukwak, mbet-mbet owak loonggo menggam pi woroorak mage o.

⁹Kat kawone kore kimbirak menggendak nogo kimbirak yuurak op kwe, yogo logonet perak, Aap alik awone kumaarak wonage nogo paganogo at yoriyak mage o.

¹⁰Aap awone kumaarak nogo paganogo yoremenggendak konengge logomenggerik, Kat kenggali wappagage kenok, kendage maluk aremenggerak mondok-mondok logokwak, togop yuurak mage o.

¹¹Wone ambi mondok liirogon a'me aret yorogwe nogo ti, ye wanggo'me anggun enona nggelok togon mambogo mengga kwak aret o.

¹²Aap iniki warak nen, “Naruk wakwi nogo liirogon konenikit,” mbake nogo ti, Mbuti emas paga inamberaarenggen yarak yiko mengga kwak, Emas at mendek paga inobaanggi-inobaangge eeko mengga kwak, Aret wonage menggerak.

¹³Aap ambi yonggo nappegetak ogoba yemenggerak abu ndak-ndak yora nage nogo ti, O kibi paga anggen mbanggo logonet, niyo miin toologo nunggwi paga iniki yawek ari menggi kwak aret wonage menggerak me, At ogobamini inale'nggen eerogo piige logogin o.

¹⁴Aap ambi iniki tiyappake logonet, “Yogop wokkiriaagin o,” yinuk, yorage nagaatik, wogorageelik nogo ti, Ndugwi wage, o wiya wage, eeke kogwe kwe, mayu wageelik menggi kwak aret wonage menggerak.

¹⁵Aap iniki aan aganggenggwi lek logonet, yorage paga aap nggwok iniki amok mbanogo piige, Oone yanggonak ari paga inowak enoona ndik-ndik eerogo piige, Eeke menggerak.

¹⁶Kat nggiin amburu wagangge kenok, ambik namenggendak paga pe wurukwak me, we mbuuluk mban nenggak eeke logot o.

¹⁷Kat kore ame nabenak mban wage paga kore eebi komba'nuk, anini wundukwak, Nabenak mban wagak eeriyak mage o.

¹⁸Aap ambi ore imbirak menggerak nogo eerulik kagak, pilit-pilit, “Eekendak o,” yoge nogo ti, Eyo obate mbanak kwak, wooluwak kwak, maale ngget ambik kwak, aret wonage menggerak.

¹⁹Aap ambi aaninggin oba age eyom paga at iniki aap iniki kwi'ndak lek oba panggombege nogo ti, Ineyak langguk ari, iyok tiyo'luk nage, eeke menggi kwak aret wonage menggerak.

²⁰Aap ambi iniki puru aago me, ake ndawi wakwi nogo ti, Togwi ambik eeke kagak, ayum nggoorogo waganggwi, Awin kunik paga mayu yumbunogo pugwi, Eeko mengga kwak aret wonage menggerak.

²¹ Kinawim nogo mbi abu kenok, mbi nawak nduk, wogogwi, Niyo abu ari kenok, niyo nawak nduk, wogogwi, eeko logonip o.

²²Ti eekwi kiinok, mo kik-kik negen kaawak nduk eeppumonggotak me, Aliku ALA nen onggo kit wokkiraagin o.

²³Aakumi inamili irip paga agan nogwe iinok, aakumi inete aagi ogwe nogo ti, O omarip paga nen wiya warit wage logonet, mayu wonok wage menggi kwak aret wonage menggerak.

²⁴Aap ambi akwe wone waka imbirak oome logorak ti, aaninggin aret kwe, Ooliya wurik me ari noorak ti perak, op aret o.

²⁵Aap ambi wone abe wone o nda nen wage aruk konengge ti, Aap iniki woongge kenok, yi miin nengge menggi kwak aret menggerak.

²⁶Aap ambi iniki abe koonak nen aap maluk mendek eeriyak koongge nogo, “E o,” yinuk, imbirak eerit nage nogo ti, Niyo eneeri nggut wungge kwak, Niyo nggween kambunik me obari age menggi kwak, Aret menggerak.

²⁷Nggiin amburu ambik nenggak yuurak ti maluk aret o. Ndi, aap ambi endage tiyappuwak nduk, oone ambik agan nage ti kunduk, maluk aret o.

²⁸Aap ambi iniki nengge nogo tebenogo pegak eekeelik ti, O kota yugum yagat wurik ndengga-ndengga wangge menggi kwak aret wonage menggerak.