Read Western Dani Kini Wuppiige 26 Bible Online

Kini Wuppiige 26 - Western Dani bible

Kini Wuppiige 26

¹“O kibi eeke eyom paga aworak kani pit wage, ndi, anggen mbanggwi eyom paga o mayu wage, Eeke kero, iya!” yogo mengga kwak, “Aap iniki lek wi negen kenok, inayuk wukulik o,” yinuk, yogo menggaarak.

²Towe yiluwe wiga agan mban nage, towe wuni'nuk wiganinuk mban nege, Eeke menggi kwak Wone alom lek kagak kugi pulunogo piigwi kwe, abe inoba ageelik mbeyok ari menggerak.

³Yawi ena koongga ti, kuda ake wonage, ndi, keele anobak paga pugungga ti, keledai ake wonage, Eerak menggi kwak, Muun yawi mbanak ti, aap iniki lek wi negen inamborowak paga inooriyak inake aret wonage menggerak.

⁴Aap iniki lek wi negen nen oone yokkege kenok, Kimbirak ndak-ndak kombarukwak, at ari menggi kwak onggo yoriyak mage o.

⁵Aap iniki lek wi negen wone yokkege onggo at ari menggi kwak yoge keenok, Iniki nen, “Nimbirak niniki warak aret kagi,” mbarukwak, oone yokkege onggo kiniki warak nen yoge logot o.

⁶Aap ambi nen aap iniki lek wi negen yaga nogo wone eerogo nappi wage ti, Iyok kalenogo pake, aakumi inooka amburu nunggwi kwak aaninggin oba kwippake, Eeke menggi kwak aret wonage menggerak.

⁷Aap iniki lek wi negen nen wone eegu laarogo ari ti, Aap arowak langgonak me, arowak langgok nege menggi kwak aret wonage menggerak.

⁸Aap iniki lek wi negen inayuk wukwi nogo ti, Yugum nggelenogo nappegak nogo paga yugum keele maappunuk namburogo nappuurak eekaatak kwe, nageelik nogo kwak aret wonage menggerak.

⁹Aap iniki lek wi negen nen wone eegu laarogo ari nogo ti, Aap niyo kumili aganaka nenok alok eenggime ngguurik nonggop kinggoloobok menggi kwak aret wonage menggerak.

¹⁰Aap ambi nen aap iniki lek wi negen ilik, it aap tu paga nogwe me ambi nen a, “Neyabu eeru o,” yoge nogo ti, Aap ambi nen omaale ugun namburugo nappegetak aap eebe paga kundugu age menggi kwak aret wonage menggerak.

¹¹ Aap iniki lek nen wi eeko mengga kwak nogo mban eerit nage nogo ti, Nggeewo peyak wurogo pege nagaatik, iyokan na wage menggi kwak aret wonage menggerak.

¹²Aap ambi iniki lek kagak iniki warak ombaruwak nduk wogoppake nogo kage menggendak ilik, lek a? Aap iniki abe wi nen iniki warak eekkoloorak ti, op negen kwe, aap ti perak, iniki warak eekkoloorak abu meek aret o.

¹³Aap eenggi tanep oome mban logorak mbake logonet, “Singa tu nggwok paga wonage. Ndi, singa anini warak tu mbuuluk paga wonage,” ari menggerak.

¹⁴Aap eenggi tanep nogo nen at nogo yege menggim paga windak ndennagak-wennagak ari nogo ti, Tu nggele'mbuk eerak paga nappegak-wappegak eeke menggi kwak aret wonage menggerak.

¹⁵Aap eenggi tanep nogo nen mbi yuma yonggolak pigamenggerak kwe, Kilirogo ambeme mambuurak meek aret age menggerak.

¹⁶Aap eenggi tanep nogo nen, “An niniki warak aret,” mbake, Ndi, aap ineebe 7 iniki warak nen wone onggo at yogwi nogo meek aret mbake, eeke menggerak.

¹⁷Aap wone wakwi me, aap ugun ambi inom nggelenna'nuk wone wakwi nogo ti, Aap nggeewo aruk pigagangge menggi kwak aret menggerak.

¹⁸Aap ambi nen ore ambokan lagangge logonet, “An ti, we noonewak aret yagarak o,” yinuk, yoge nogo ti, Aap kumili nen kani kunik maale paga nggelembunuk namburogo nappege, maale irip paga mbeeli perenak nambuke, Eeke menggi kwak aret wonage menggerak.

²⁰Kani lek kenok kani nogok ari menggi kwak, Aap ambi oone ugun-ugun agan nage lek kenok, wone wakwi nogo inoone nggobo agan nage menggerak.

²¹Aap wone wakwi inikilom nen ndugwi puwak nduk, inikime manabit nage nogo ti, Kani anggen wonage kenok kani kere ari, kani kunggwi kenok kani wunuk ari, eeke menggi kwak aret wonage menggerak.

²²Aap ambe irip paga wonok nege ti, ombat tele kwak aret wonage me, Aap ambi wone ti konengge kenok, inikime mondok ya'nari wangge menggerak.

²³Aap inikime maluk koongge logonet, oone amburu ndik-ndik agan nage nogo ti, Togolowak nggween paga ogobakkigirik agabolo paga amburu warak abinak lan ari menggi kwak aret wonage menggerak.

²⁴Aap aakumi maluk eeppiiga nen abet ari mbaruwak nduk oone abe agan nege menggerak kwe, Inikime perak, aakumi inambokan laganiyak mban kumaarak wonage menggerak.

²⁵Aap ti, anini nen aakumi eeppiyoorak mbake 7 kuli aret inikime wonage me, Oone aberogon agan nage nogo ti, karuk koneniyak mage o.

²⁶Anini nen aap eeppiyoorak mbake nogo ti, kumaarak kagak oone abe agan nage menggerak kwe, Maluk eebe eerit nage paga perak, aakumi abok inigen kogo menggaarak.

²⁷Aap ambi nen aap alik ambi yigeebu wambuwak nduk nggween kabunogo pemenggerak kwe, at aret wangge, Ndi, yugum paga aap alik aan lebenuwak nduk, wogonogo pemenggerak kwe, melak togon at aret aan lebeni wage, Eeke menggerak.

²⁸Aap pilit pugungga nen ore iniki andi kaawak nduk, eerogo pege paga at ore nogo eebi lombok mbake, Oone amburu ndik-ndik agan nage paga aaninggin oba pake, Eeke kogo menggaarak.