Read Western Dani Kini Wuppiige 27 Bible Online

Kini Wuppiige 27 - Western Dani bible

Kini Wuppiige 27

¹ Ko'lu ariyak keenggo'lek me, “An ko'lu ndogop eerikit o,” yinuk, wogoppatiyak ti mage o.

²Kat nen aret kendage tiyappatiyak ti mage o. Ata, aap alik nen kendage tiyappagawak o. Aap kat keenggo'lek mendek kunduk, wogoppagarak ti op aret kwe, kat koone agan nege logonet, wogoppatiyak ti mage o.

³Yugum inom, mbini inom, imbirak ti, aaninggin aret kwe, Iniki lek wi nen aakumi iniki andi eerogo piinet nage perak, aaninggin ambik lombok aret wonage menggerak.

⁴Aap anini ambik nogo nen op neebi, maluk neebi, eerit nage, Anini wungge nogo ti, niyo wurik nage logonet, yi mendek ndi mendek yigirit nage menggi kwak, eerogo pit nage, eeke nogo ti, iya negen kwe, Aap ambi nen ore ambi eeke paga, “An togon eerikit lak at mban eeke yi, ao,” yinuk, anini lombok ombake ti perak, mondok iya lombok menggerak.

⁵Kin paga inaruk wako logorak ti op aret kwe, Inabuwa mbakwi nogo tebembunuk logorak perak, maluk o.

⁶Kimbirak ogoorak nogo nen oone yanggok-yanggok yokkirit nage menggerak kwe, Kore kiniki kunik nen perak, op logonok nduk, yawi paga kooke menggerak.

⁷Aap mbi ndonggok togon nenggetak me, nggiin amburu noorak eebi mbake menggerak kwe, Aap mbi abu wonage kenok perak, ale mendek kagak, “Ombat abe o,” yinuk, nengge menggerak.

⁸Aap ambi ame nen wundi nanuk, ambime agak nege nogo ti, Towe awi mbanak me nen wundi nanuk wiganinuk nege menggi kwak aret wonage menggerak.

⁹Amburu inagabolo paga obari abe eeka inom, kani kunggwi obari abe kaga inom, obari kogo logonet, inikime eya eerogo piige menggi kwak, Aap ambi nen oone yanggorogon oreeluk kini wuppege paga iniki ale'nggen eerogo pege menggerak.

¹⁰Kat kore ilik, kogoba ore a, mari eerogo mbo pege, Ndi, aaninggin koba kwi'nage kenok, koreeluk ame nage, Eeriyak mage o. Kore nda wonage me, ka noorak ti meek aret kwe, at kimbirak koorok menggendak ka ungguurak perak op o.

¹¹Napuluk yi wae. Niniki ale'nggen eeppanenok nduk, kiniki warak a'nuk eerit nage logot o. Ti eeke keenok, aakumi nen wone maluk yo'nugwi iinok, wone onggo abe yorage logogin o.

¹²Aap iniki perenak nen maluk inoba ariyak mbet-mbet yelok kogo nagaatik, ineebe op logowok nduk kumaa'nogo menggaarak kwe, It aap iniki yuundurak kenok perak, ugun eerit nogwe me, aaninggin inoba kwippako menggaarak.

¹³Aap ambi nen, “Aap nggiru anomat ti, an nen aret teenikit o,” ari kenok, at ayum waamunggun o. Woppunuk porogo wonage me, kwe onggo wogorulik nogo nen, “Onggo wo'nirulik o,” yokkiri wage kenok, ayum ti aret wogorumunggun o.

¹⁴Aap ambi nen o kuubondendok oone nggwok paga at ore, “Wa,” yoge kenok, “Yi kugi pulunogo panigi ilik?” mbake menggerak.

¹⁵Aap ambi akwe wone wakak mban ari menggerak nogo ti, O tit kunik eeke logonet, terap puk-puk wanggak mban eeke menggi kwak aret wonage menggerak.

¹⁶Ndi, at oone mbannaruwak nduk eeke nogo ti, O wiya ko wapporogo wonogwe, ineenggi paga wam amburu pipporogo wonogwe, eekulik mengga kwak aret wonage menggerak.

¹⁷Mbuti owak ambi mbanak paga nen mbuti ambi paga eyak maako mengga kwak, Aap ambi nen ore eeriyak eyak maarogo pege menggerak.

¹⁸Aap ambi eyo wuli liirogon unde wonage paga anggen yege nogo mbanogo nengge, Ndi, aap ambi nen ogoba liirogon ndegengge paga at endage tiyappugwi, Eeko menggaarak.

¹⁹Yi yenggenak paga inete maluk-abe kin kogo mengga kwak, Aap ineraambe eekwi paga nen iniki ineenu ogo menggaarak.

²⁰Kambunuk nogo menggam inom, ineebe lek ogo menggam inom, unggwi nagaatak kwe, “Yi kuli o,” yaga'lek ambe pan aago menggi kwak, Aap inigen pekkoorak, “Ao,” mbakwi nogo ti, kuli pega'lek pekket-pekket mban aganake menggerak.

²¹Kani eyak paga mbuti perak abut mbanggwi, Kani aganggen paga mbuti emas abut mbanggwi, Eeko menggaarak kwe, Aakumi nen aap ambi endage tiyappugwi paga at abut mbanggwi ti aret.

²²Gandum yugum paga yigiko mengga kwak, aap iniki lek wi negen togop aret aan lebe eerogo pemenggendak kwe, Wi negen eerit nage nogo lek arigin lek itok aret logogin o.

²³Kamendek ti, mondok-mondok wonage, ndi, kendage tiyanak kenok kenggare-nggare yirik kwak kombowologwe nda'narit wundi wogwe iigak, kat unde wonage, Eeke logomunggun lek me, Kambin-ndomba ineebe keenu age, kaanggumi lembu-tapi liippege, eeke logot o.

²⁵Nunggwaangga kobappaga mbanogo pugwi iigak, obaane'me agarip lagangge kage, Iri'ngga-kale'ngga puut paga nen kuwak eerogo pugwi iige, Eeke logomenggendik, Wonage logonet,

²⁶Kandomba ineeruwak paga kayum penggaarogo yikkolage, Kagambin kumbunuk, wu ti paga kanggween kunggolage, Eeke logomenggendik,

²⁷Kambin elak amburu ti, kat inom, kaaganapuri inom, kinambi nunggo logomunggup nduk koonogo pege, Ndi, kayeloman mini kumi ineebe op logowak nduk, wogorage, Eeke logomunggun o.