Read Western Dani Kini Wuppiige 28 Bible Online

Kini Wuppiige 28 - Western Dani bible

Kini Wuppiige 28

¹It aap maluk mendek nen aap muguren naga'lek iigak, mbaganit nogo menggaarak kwe, It aap iniki abe koonak nogo nen perak, singa agabiti mbaka'lek nege menggi kwak, nugu menggaarak.

²Aakumi o ambime nen wone yugu nogo, “Eeriyak nineebi,” mbakwi iinok, aap inarum menggaarak ambi mi'nagak eeko menggaarak kwe, Aap inarum menggerak iniki warak logonet, eenu nen eeppiinet nage kenok perak, at unde menggim mondok nu'lek menggerak.

³Aap eenggi lek ambi nen it aap eekkoloorak meek mendek tebenogo piige nogo ti, O mayu oonebu wage logonet, yi mendek ndi mendek yarak nogo yigirogo pit wage menggi kwak aret wonage menggerak.

⁴It aap wone yugu mbo pugwi nogo nen it aap maluk mendek tiyappiigo menggaarak kwe, It aap wone yugu liirogon porogo wonogwe nogo nen aap maluk mendek inoone lek eerogo piigo menggaarak.

⁵It aap maluk mendek nen a'me nggelok eekwi nogo liippugulik kwe, It aap Aliku ALA mugurok nugu menggaarak kenok perak, wone ti abok aret liippogo menggaarak.

⁶Aap eenggi warak tu yelok-nggolok nage ti maluk aret kwe, Aap eenggi lek tu koonak nage ti perak, abu abe o.

⁷Aap wone yugu liirogon unde wonage ti, aap aput iniki warak aret mbako menggaarak kwe, Aap inaanoguma'le andi lek nengga inom nege kenok perak, at ogoba enggali eerogo pege menggerak.

⁸Aap ambi at awu paga yowaarogo amendek ambik kuwak eekkolage nogo ti, It aap alik nen aap ineenggi lek inabuwa mba'nuk wogorogo logowak nduk, inake aret kuwak eeke menggerak.

⁹Aap ambi nen wone yugu nogo, “Naruk koneniyak neebi o,” yinuk, aruk nakkolage kenok, At tamban eeke nogo Ala nen, “Koneniyak mondok neebi,” ari logogin o.

¹⁰Aap ambi nen aap iniki abe koonak nogo maluk eeppiyaakit nduk, wogoren nage kenok, at talok pakim nogome aret yaru'nari wangge menggerak kwe, It aap maluk inoba lenggenggulik nogo perak, yate kwak abe mendek mban kologo logogun o.

¹¹Aap eenggi warak nen, “An niniki warak aret kagi,” mbake menggerak kwe, Aap eenggi lek wone yelok kaga nogo nen, “Aap ti, iniki lek,” yelok kage menggerak.

¹²Aap ambi iniki abe koonak nen eegin tiyak ari kenok, aakumi apit inale'nggen nen at tiyappogo menggaarak kwe, Aap maluk mendek nen aakumi inarum logokit nduk mi'nage kenok perak, aakumi ogole nen kumaa'narit nogo menggaarak.

¹³Aap ambi nen omaluk kumaappatogo wonage paga at obeelom eekkolaga'lek aret wonage menggerak kwe, Aap ambi, “Maluk neebi o,” yinuk, paganogo mbo pege kenok perak, Ala abuwa nen teppege menggerak.

¹⁴Aap ambi nen Aliku ALA agabiti mbake menggerak nogo ti, ale'nggen aret wonage menggerak kwe, Aap ambi iniki ogogumbuk eekkolage kenok perak, aaninggin oba kwippatit nage menggerak.

¹⁵Aap maluk mendek ambi nen aakumi it eekkoloorak meek nogo mendek inarum wonage nogo ti, Singa anini nen oone kole ari, beruang kok wundi wage, eeko mengga kwak aret wonage menggerak.

¹⁶Aap aakumi inarum wonaga ambi nen iniki kole aga'lek awo wonage logonet, apuri tebenogo pit nage menggerak kwe, Aap ambi it wi-wi aganako logonet, waganggwi eebi mbake nogo perak, li a'nuk kangge menggerak.

¹⁷Aap ambi nen aap alik ambi warogo pege logomenggerik, “Eekirak paga noorukwak,” mba'nuk, Ambime nagak ambime nagak eerit-eerit eebe aret kambi nagin me, ili yuurak mage o.

¹⁸Aap ambi maluk oba lenggenak lek kagak eerit nage ti, eebe kuuri'me aret nage menggerak kwe, Aap ambi tu yelawe-nggolawe nage kenok perak, eebe aret nggelenggolage menggerak.

¹⁹Aap ambi anggween mban eebi-eeba eerit nega nogo ti, ambi ndonggorogon nengge menggerak kwe, Aap ambi, “Yogop kwak kolaane,” mbake nogo mban mugurok nage kenok, eenggi lek wo'no lu aago mban wonage menggerak.

²⁰Aap ambi li'lak mban eeke kenok, aakumi inale'nggen nen obeelom mban eeppit nugu menggaarak kwe, Aap ambi nen, “An mbet-mbet neenggi warak eekkolaakit,” mbake kenok perak, aaninggin oba arigin lek lek oba arigin aret o.

²¹Aap inete maloppunuk inowak looninaburak ti maluk aret kwe, Inambi noorak paga maluk eeko menggaarak ti kunduk, maluk aret o.

²²Aap iniki nggilimi nen peebi amendek lek ariyak liippega'lek logonet, “Namendek mbet-mbet ambik aruwak o,” yinuk, mugurok nage menggerak.

²³Aap ambi nen ore aruk wake kenok, at aruk waremenggerak nogo nen aruk wakerak nogo peebi ale'nggen nggwok ombarigin kwe, Iniki laakot paga yoge kenok perak, ale'nggen mbuuluk ombake logogin o.

²⁴Aap ambi nen ogoba ilik, agalo a, inamendek kiraakkolage logomenggerik, “Yi maluk lek o,” ari ti, Aap ambi aakumi inambik iname tu paappunuk inamendek yogoot kumaari unggwage kwak aret wonage menggerak.

²⁵Aap, “An mban kolaakit,” mbaka nen wone wariyak eerogo piinet nage menggerak kwe, Aap ambi iniki Aliku ALA oba panggombunuk wonage kenok perak, amendek ambik aret age menggerak.

²⁶Aap ambi nen at iniki mbake mban panggombunuk wonage kenok, iniki lek wi negen aret wonage menggerak kwe, Aap ambi iniki warak logonet eerit nage kenok perak, tu kuuri'me aret nege menggerak.

²⁷Aap ambi nen it aap ineenggi lek nogo amendek wogorage kenok, amendek lek arigin lek wonage mban menggerak kwe, Aap ambi nen aap ineenggi lek nogo enegen iige kwe, wogoroorak eebi mbake kenok perak, pulunik aret wonage menggerak.

²⁸Aakumi inarum logokit nduk aap maluk mendek ambi mi'nage kenok, aakumi ogole nen kumaa'narit nogo menggaarak kwe, It aap maluk mendek lek ogwe iinok perak, it aap iniki abe koonak nogo nggwok aret wigannogo menggaarak.