Read Western Dani Kini Wuppiige 29 Bible Online

Kini Wuppiige 29 - Western Dani bible

Kini Wuppiige 29

¹Aap ambi aruk waketak kwe, konengga'lek ogogumbuk mban wonage kenok, Yinip-panip at eebe aret lek eerogo patigin me, aap ambi nen at obeelom eeppuurak meek aret o.

²Aap iniki abe koonak nen aakumi inarum wonage paga aakumi inale'nggen mbako menggaarak kwe, Aap maluk mendek nen inarum wonage kenok perak, iniki wakko'net unggwogo logonet, neebi-keebi yogo menggaarak.

³Aap ambi nen iniki warak eekkoloorak inikilom mbake paga ogoba ale'nggen mbake menggerak kwe, Aap ambi nen kumi mbabilu inom kunggo'net nage kenok perak, awu lek eerogo pake menggerak.

⁴Aap endagembogut ambi nen a'me nggelok eeppiinet nage paga o at unde menggim omaawi eerogo pit nage menggerak kwe, Aap endagembogut ambi nen, “Kinamendek wo'ninip o,” mban yorage menggerak kenok perak, o at unde menggim naalop-kaalop eerogo pege menggerak.

⁵Aap ambi nen ore iniki laakot ombake logonet, oone paga mban yoge ti, at iyok aret nggelok yuwak nduk keele kwak eerogo pake menggerak.

⁶Aap maluk mendek ambi nen maluk eerit nage paga keele pugu kwak eebe aret nggerenggolage menggerak kwe, Aap iniki abe koonak nogo perak, iniki ale'nggen nen ndawi warit nage menggerak.

⁷It aap iniki abe koonak nen aap ineenggi lek inawone op mbanuwak nduk, liippiigo menggaarak kwe, It aap maluk mendek nen perak, “Inobaalombok o,” yinuk, mbo piigo menggaarak.

⁸It aap miyuk-meya eerogo piiga nogo nen o kota naalop-kaalop eerogo piinet nogo menggaarak kwe, Aap iniki warak nogo nen perak, inanini mi'nage nogo yanggonogo piigo menggaarak.

⁹Aap iniki warak aap iniki lek imbirak wone wako logonet, aap iniki lek nogo nen mbelappege logonet, agi'ndok kangge, anini wungge, eeke menggerak me, It imbirak inawone lek eerogo puurak meek aret o.

¹⁰Aap aakumi inamiya nengga nogo nen aap iniki abe nogo ineebi lombok mbako menggaarak kwe, It iniki abe koonak nogo nen aap abe ti, ineebe inili yogo menggaarak.

¹¹Aap iniki lek wi negen nogo nen anini mbake nogo kuli pegeelik anini wunggak mban eeke menggerak kwe, Aap iniki warak nogo nen perak, anini wungge nogo tebenogo punuk wonage menggerak.

¹²Aap aakumi inarum menggerak nen inoone pilit agan nugwi nogo liippege kenok, awuri inom eeko menggaarak abok aret ineraambe maluk ogo menggaarak.

¹³Aap eenggi lek inom, aap tebenogo piiga inom, Aliku ALA nen it imbirak ndak-ndak inigen awuluk warak eerogo piige menggerak.

¹⁴Aap endagembogut ambi nen it aap ineenggi lek mendek liirogon inowak loongge menggerak paga At wone lengganogo yorage menggim mondok nu'lek aret logogin o.

¹⁵Wologwe yawi inookwi, inaruk wakwi, eekwi paga iniki warak eerogo piigo menggaarak kwe, Wologwe we enaani mbo piigwi iinok perak, inagalomini inenggali eerogo piigo menggaarak.

¹⁶Aap maluk mendek nen inendage nggwok arit lagangge kenok, maluk wigak ari menggerak kwe, Aap iniki abe koonak nogo nen it aap maluk inendage lek arit wangge nogo inigen iigo logogun o.

¹⁷At kapuluk nen kat kiniki ugun obeelom logonok nduk, eeppagage, Ndi, kiniki ale'nggen eeppagage, eeke logowak nduk, at aruk wake logot o.

¹⁸Ala nen wone yorage kagak yoraga inenggela'me lek iinok, aakumi mak eerak logonet, ugun-ugun eerit nugu menggaarak kwe, Eeko logorak wone yugu yoragaatak liirogon porogo wonogwe iinok perak, inale'nggen aret wonogo menggaarak.

¹⁹Aap ambi ayeloman iniki koonnaruwak nduk, we inoone paga mban aruk wakwi ti, meek aret o. Yoremenggaarak nogo liippemenggerak kwe, eebe eeka'lek aret logogin o.

²⁰Aap ambi oone perak togon ari kage menggendak ilik, lek a? Aap iniki lek wi negen oone liippunuk yuurak mamunggoloorak op negen kwe, Aap ti perak, mamunggoloorak meek aret o.

²¹Aap kayeloman awo logonet, nggino ari kenok, eeppegak mban eeremenggendak paga peebi irip paga kamendek abok aret at mban tebenggolage logogin o.

²²Aap anini ambik nen wone wako logowak nduk, eerogo piinet nage, Aap amiya maluk nen wone yugu nogo taganogo maluk ambik eeke, Eeke menggerak.

²³Aap iniki tiyappatit nage nogo aap nen tebenogo pogo menggaarak kwe, Aap iniki tebenak wonage kenok perak, endage tiyappogo menggaarak.

²⁴Aap ambi nen aap kumaaka inom kumbunuk, eerit nage logomenggerik, Maluk eeremenggerak pagangge kenok, owak loongga nen maluk onggo oba pege, Ndi, maluk pagangga'lek wonage kenok, Ala nen aret pulunogo pege, Eerugun me, “Nela nen eeki ao,” yinuk, at eebe aret eebi lombok mbake menggerak.

²⁵Aakumi paga inagabiti mbarit nugwi ti, keele pugu kwak inenggaanok nggerenggologo menggaarak kwe, Iniki Aliku ALA oba panggombugwi nogo perak, tu kuuri'me aret nugu menggaarak.

²⁶Aakumi ambik nen, “Aap ninarum menggerak nogo ninom wone mbanuwok lak, Ao,” mbako menggaarak kwe, At Aliku ALA nen mban eekaatak a'me nggelok eeppiige menggerak o.

²⁷Aap maluk mendek nen aap obeelom mendek ineebi lombok inombakwi, Ndi, aap iniki koonak nogo nen aap iniki nggolawe nogo ineebi lombok inombakwi, Eeko menggaarak.