Read Western Dani Kini Wuppiige 30 Bible Online

Kini Wuppiige 30 - Western Dani bible

Kini Wuppiige 30

¹Aap Mata mendek Yake aput Agut nen wone ari nagagerak me, aap Itiyen yoge, aap Ukan yoge, eereegerak nogo yi o.

²Yi aap ndi aap ineenu wonogwe iigak, eenggo'lek wonage, Aakumi yi wone ndi wone liippugwi iigak, wone liippega'lek wonage,

³Iniki warak nen yogwe nogo mamunggolaga'lek wonage, At Kikak Nakeelik Alik Leenak Menggerak nogo kobak aret wonage, Eeke menggerak nogo ti, An lombok aret o.

⁴Ta nen mbogut paga lagi nanuk, wambi wage, Ta nen o wiya eenggime kuwak eerogo porogo wonage, Ta nen ayum irip paga yi kole laut nogo nggeremborogo wonage, Ta nen o nggween yi irip-irip kuli mbanogo pege, Eeke menggerak mbakop? At ti endage ta o? Ndi, apuluk kunduk, endage ngge o? Kit kineenu me, yo'ninip nda!

⁵Ala yegetak ambiriluk ambi alik ageelik a'me aret age menggerak. It at abu'me ari unggwogwe iinok, inanggeemu kwak mulunogo piige menggerak.

⁶Mbekkirage logonet, pilit pugunggwi kiyokwak At wone ari menggerak kagak ambi inom nabenogo puurak mage o.

⁷Kaliku ALA wae. An awo kangga'lek logonet, wone alom mbere nggino yokkege yi, mbo pega'lek liirogon wagangge logot o.

⁸Ambi, niniki mbere logonet ari, noone pilit ari, eeke nogo mbo pege, Ndi ambi, neenggi lek eeppanege, neenggi warak eeppanege, eeka'lek we nambi ko'lu-kii'me nengge logorak punik nogo mban wo'nege, Eeke logot o.

⁹Neenggi warak logonet, mbi abe ndonggok togon naminggirak paga an nen mbo pagage logonet, “Aliku ALA ti, ta o?” ari, Ndi, neenggi lek logonet aakumi inamendek kiraariminggirak paga kat nogoba Ala kendage maluk eerogo pagage, Eerukwak nduk, Yokkege agarik o.

¹⁰Kugi pulunogo pinagage logonet, maluk yumonggotak onggo puurak yokkirage kero, Aap ambi ayeloman nen eekerak nogo meek ombako logonet, ogoba mbininogo yoriyak ti mage o.

¹¹It aap ando inapuri nen inogobamini pulunogo piigo logonet inagalomini inale'nggen inoba piiga'lek mbo piigwi,

¹²It aap ando inapuri nen, “Nit abu kikak naka'lek aret wonogwe,” mbakwi kwe, maluk inoba lenggenak kagak yogwe,

¹³It aap ando inapuri nen, “Nit iya,” mba'nuk inigen tiyanak nugu logonet, aakumi laakot inombarit nugwi,

¹⁴Ndi, it aap o nggween paga tebenak wonogwe nogo lek eerogo piinet nogwe, It eekkoloorak meek mendek aakumi inenggela'me wonogwe nogo lek eerogo piinet nogwe, eeruwok nduk, It aap ando inapuri nogo ineyak kirin ti, wooluwak ngget nggabenak kwak, ineyak alom ti, ndut kwak, wonogwe, Eeko menggaarak.

¹⁵Mili yanambok nogo aagalogwe komologwe mbere wonogwe me, “Yi an noorak, yi an noorak,” yinuk, nili-kili yogo menggaarak. Alom kenagan nen, “Abu ndonggoppanegi o,” yogwe, Alom ambit inom 4 nen, “Abu aret o,” yogwe, Eekulik nogo ti,

¹⁶Kambunuk nogo menggam nen, “Abu aret waga,” mbake, Kwe wubili nen, “Abu aret ndaki o,” ari, Nggween nen, “Abu miin eerogo panegi o,” ari, Ndi, kani nen, “Abu aret nenggi o,” ari, Eekulik Uugwe mban mbako menggaarak ti aret.

¹⁷Wulaga ambi nen ogoba eeke paga enggali nen enegen laambok andiigwi wake, Ndi, agalo yoge nogo, “Eeriyak neebi,” mba'nuk, meek eerogo pege, Eeke nogo ti, Towe ya'ngge-ya'ngge o kobappaga nugwi nogo nen at enegen ti, kilirogo nunggwi, Ndi, towe pen ware nen at eebe warak nibik togon nenggak eekwi, Eeko logogun o.

¹⁸Wone alom kenagan an nen iya lombok mbake, Wone alom ambit inom 4 an liippega'lek mban wonage, Eeke nogo ti,

¹⁹Towe pen ware wuga agan o oolo ya'i nege, Waalo yugum paga tu agan nege, Yiiro niyo kole laut oolome nage, Aap ambi kwe tawe imbirak ndegen-ndegen aago nugwi, Eerit nugu menggaarak ti aret.

²⁰Kwe mbabilu eerit nage nogo ti, yi aret. At nen abu aret nengge nagaatik, ayum age nabekko'nok ari logonet, “An maluk abu eerulik o,” yinuk, ari menggerak.

²¹Wone alom kenagan paga it aakumi nggween paga wonogwe nogo inaganak wake, Wone alom ambi inom 4 paga aakumi iniki a'nggan ngginuk ari, eeke nogo ti,

²²Aap ambi ayeloman nen endagembogut age, Aap iniki lek wi negen nen amendek ambik age,

²³Kwe ambi ogonggelo nen at eebi mbake, Ndi, aap ambi ayeloman kwe nen, “Nagalo obaane'me an aret arikit o,” yinuk, age, Eeko menggaarak ti aret.

²⁴O nggween paga nugu menggaarak mbuulogwe mendek 4 wonogwe kwe, iniki warak lombok wonogo menggaarak

²⁵Ambi ti, muri'malo aret. It ti mendek inomaawi lek aret kwe, o kibi paga inambi pipuk eerogo pakwi,

²⁶Ambi ti, pagi mbandi aret. It ineebe ndeyak wonogwe kwe, inawi yugum lunik tiyarogon paga mbanggologwe,

²⁷Ambi ti, wurin aret. Inowe inendagembogut lek kwe, ineebe ndegen-ndegen aago nogwe,

²⁸Ndi, ambi ti, kole'na aret. Aakumi ineenggi paga pigoorak op aret kwe, Aap endagembogut awi nggwok abe wurik paga wonogwe, Eeko menggaarak.

²⁹It nugu menggaarak mendek nogwe iigak, inayuk wukwi ineebe kenagan wonogwe, It nugu menggaarak mendek nogwe iinok, aakumi iya mbakwi ineebe ambit inom 4 wonogwe, eeko menggaarak

³⁰Ambi, nggweewo-wam inanini warak iigak inirimbaga lombok nonggonak nega singa aret.

³¹Ambi, wi niruwak nega ayam ngguunok aret. Ambi, kambin ngguunok aret. Ndi ambi, awuri ninggi'nuk nega aap endagembogut aret.

³²Yilak amburu toolak nombok-kombok eekwi iinok, linogo pege, Inogobak nombonggogwe iinok, inamiya wundi wage, Eeke menggi kwak, Aap inanini mi'nogwe iinok, ndugwi aret wo'nage menggerak me, Kit kiniki lek wi negen logonet wogoppatit nogwe, Maluk eeriyak ambi koonogo pugwi, Eekwi kiinok, Mbiningga'lek kinoone puk aret logonip o.