Read Western Dani Kini Wuppiige 31 Bible Online

Kini Wuppiige 31 - Western Dani bible

Kini Wuppiige 31

¹Aap o Mata mendek inowe endagembogut Lemuwen wone ari nagagerak at agalo nen mamunereegerak nogo yi o.

²Naagaluk wae. Naagaluk ninikime mendek yi wae. Naagaluk tamban eereegirak paga ndarak yi wae.

³Kumi muguren nege logonet komaawi lek eerogo pake, It aap inendagembogut inendage maluk eerogo pugwi kumi nogo mban eeginabit nage, Eeriyak mage o.

⁴Naagaluk Lemuwen yi wae. Anggur amburu nenok, Wone lengganak nogo kobak eerogo pugwi, Aap tebenak mendek eeppiyoorak kagak eeppiiga'lek mbo piigwi, Eeko menggaarak me, It aap inendagembogut anggur amburu nunggwi, It aap nagawan amburu kumili aganaka noorak uugwe mbakwi, Eekwi ti, Aap inendagembogut noorak ndak-ndak lek me, kat noorak mage o.

⁶It aakumi ineebe andi kogwe nogo mari aago logonet kambuwak nduk, amburu kumili aganaka mendek wogorage, It aakumi iniki aaninggin ndugu aago wonogwe nogo teeluk aruwak nduk, anggur amburu wogorage, Eeke logot o.

⁸It aap inalik nen inawone mbanggoloorak meek nogo inawone mbanogo piige, It aap eekkoloorak meek nogo mendek eeppiyoorak yugu ndak-ndak obeelom eeppiige,

⁹Eeppiige logonet, eekaatak a'me nggelok mban inowak looninake, Aap ineenggi lek inom, aap tebenak wonogwe inom, tebenogo piyookwak, inaana'le mbanogo piige, Eeke logot o.

¹⁰Kwe ambi obaabut abu abe nggeeme wonage mbakop? Kwe ambi obaabut abu abe nogo ti, Yugum kere'li-kere'lo aago onggo nggwok aret kwe, kwe ti nogo abu iya lombok wonage,

¹¹Ogonggelo nen at akwe ti paga iniki panggonak wonage me, amendek ambi lek ti lek, abok aret wonage,

¹²Ogonggelo maluk eeppega'lek obeelom mban eeppit wundi wage kagak, kambuurak kuli aret ari nage,

¹³Ndomba eeruwak inom, ligi awut inom, kwaarit nege nagaatik, eenggi omaawi paga yum penggaarogo pit nage,

¹⁴Aap yi mendek ndi mendek wonok kunit nega inayiiro kwak, kwe ti nen mbi o nda nen ee'nuk wonok wage,

¹⁵O awo kilim nagake kagak, eenik age nagaatik, ogonggelo-aagalogwe inake inambi larogo piige, At ayeloman mini kumi yabu eeko logorak punogo piige,

¹⁶Nggween kwaarit nege nagaatik, kage kenok, onggo kunggolage, At awu paga nen anggur awi kunogo yakko'net nage,

¹⁷At yabu nggwiirit-nggwaarit eerit nage, Eenggi omaawi lombok paga eeriyak mbaketak nogo aret eeke,

¹⁸Eerit nage paga awu kwaakkolage eenu me, andi wuninik tit kagak o nogo iniki paga ari nage,

¹⁹At eenggi paga ligi laangge, keneben paga yum yege,

²⁰Iniki ndoobu me, aap tebenak wonogwe nogo wogorage, Aap ineenggi lek nogo yenggwaarage,

²¹At ogonggelo-aagalogwe inom yum togwi yum yirik wonogwe me, ndugu-ndugu miin tu eerogo pit wage kenok, at agabiti mbaka'lek wonage,

²²At anogo yum yabenggek-ndabenggek penggaarogo pake, Ayum ligi yawenak maa'ngga kunik paga penggaarogo pake,

²³Ogonggelo o kota tu unggwi wogo menggam it aap o time mendek inoweewi kwi'nogo menggam inom kwi'nage kenok, “Aap yi nogo aret o,” yinuk, ayuk wuruwak nduk, eeppege,

²⁴Ligi yawenak paga yum penggaarogo awu kunggolage, Kobee'le waganogo aap kunggo menggaarak wogorage,

²⁵At ayum kwak ti, omaawi inom, ayuk warak inom, wonage, “Ko'lu nano namun?” yinuk, agabiti mbaka'lek agi'ndok kangge,

²⁶Iniki warak lombok logonet, wone kenaarogo mbangge, Oone liippunuk, yanggorogon mamunirage,

²⁷At ogonggelo-aagalogwe eerit nugwi abok aret liirogon enegen wogonake, It aap ineenggi tanep nen larak-worarak mban nunggo mengga kwak, at togop noorak eebi mbake, Eeke menggerak.

²⁸Aagalogwe nogo nen inagalo ti eerit nage kenok, inale'nggen at oba pugwi, Ndi, at ogonggelo kunduk, at tiyappege logonet,

²⁹“Kumi apit ti, obeelom negen eerit nugwi kwe, kat nakwe yi perak, it ndak-ndak lek kat abu abe alik lombok eerit nage menggendak keegi o,” yinuk, yoge, Eeko menggaarak.

³⁰Kumi abe mbaruwak inoone yanggik-yanggok agan nugwi ti, pilit aret yogwe, Ndi, inete kigirikwe ti, maluk ariyak kagak wonogwe, Eeko menggaarak kwe, Kwe ambi nen Aliku ALA agabiti mbake kenok perak, tiyappogo logowok o.

³¹At eenggi omaawi paga ee'nuk wage kenok, onggo wogogwi, Ndi, o kota tu unggwogo menggam nen at eerit nage paga endage tiyak yuwak nduk, teppugwi, Eeko logonip o.