Read Western Dani Kini Wuppiige 4 Bible Online

Kini Wuppiige 4 - Western Dani bible

Kini Wuppiige 4

¹Napuri wae. An kinogoba nen wone mamunggirage yi, kinaruk konenggwi, Kit wone kineenu arumunggup nduk, an yokkirage yi, liippugwi, Eeko logonip o.

²An nen wone kole wone mamunggirage me, Wone mamunggirage yi, mbo puurak mondok mage o.

³Nagalo nen ambolom lombok nda'nake nagagerik, nabuwa ambik nombake kagak, Wulaga mbuuluk paga nogoba nimbirak aret wonagagirak.

⁴Wonage neegak, nogoba nen wone mamunnege logonet, “An nen yokkege yi, kinikime liirogon woppunuk porogo wonage, Yogop ee'nu ndogop ee'nu, wone yokkege yi, liirogon aret eerit nage, Eeke keenok, Keenik mondok aret logomunggun o.

⁵Kiniki warak lombok mamunggolage, Yi wone ndi wone alom keenu eekkolage, Eeke logot o. An wone yokkege yi, mari eerogo pege, Mbo punuk nomo agan nage,

⁶Kiniki warak logorak mamunggolage ti, kolaga abe kwak me, eraangge mbo pege, Eeriyak ti mage o. Mbo pega'lek porogo wonage keenok, wone ti nen liirogon unde wakkake, Kiniki kundugu eeke keenok, at nen enegen wokkeren nage, Eeke logogin o.

⁷Iniki warak eekkologo logorak nogo ti, iya lombok aa'nduk eeriyak mendek aret me, mbet-mbet aret kolage, Yi wone ndi wone alom keenu ariyak nduk, eekko'net nage logonet, kawu abok aret tigippatemenggendak kwe kagak wagangge, Eeke logot o.

⁸Iniki warak wone ti, tiyappege keenok, at nen kat tiyappagage, Liirogon wagangge keenok, at nen kayuk wuke,

⁹Keebe amuni mbanak keyaawak nduk, iri'ngga anggen laambu kanobak paga yirik kwak at nen eeppagage, Nggare-nggare abu abe lombok kwak eeppagage, Eerigin o,” Yinuk, yo'nereegerak me yokkiragi o.

¹⁰Naput wae. Noone yokkege yi, Kat karuk konengge, liirogon wagangge, Eeke keenok, Ndarak keegak nggorek aret ari nagin o.

¹¹Iniki warak nen eeko menggaarak an mamunggege, Tu abe koonak paga wokkeren nage, eeke agarik o.

¹²An yokkege yi, eerit nage keenok, tu paga kiyok pit nage keegak, kiyok yiluk ari, Kat tu nggare agan nage keegak, kiyogobit lik togon yigeebu wangge, Eerumunggun lek o.

¹³An wone mamunggege yi, mbo puurak mage o. Ata, nggirik-nggerok porogo wonage, Wone yi eeke paga keenik logorak me, liirogon unde wake, Eeke logot o.

¹⁴It aap maluk mendek nen eerit nugwi nogo time luk ambi kinom eerit nage, It aap maluk eeka kinom a'nuk eerit nage, Eeriyak mage o.

¹⁵It aap ti, maluk eeka'lek logonet nogo yugwi, Aakumi yigeebu wuppiiga'lek logonet, nogo teberogon yugwi, Eekulik me, It eerit nugwi ti, mbo pege, It eerit nogo menggam tu ti paga naga'lek teppege, It eerit nogo menggam kagak nomoninuk tu alik paga nage, Eeke logot o.

¹⁷It maluk lombok eekwi ti, inambi kwak aret nunggwi, Ndi, inogogun worokot nen eerit nugwi ti, anggur amburu kwak aret nunggwi, Eeko menggaarak o.

¹⁸It aap iniki abe koonak eerit nugwi nogo perak, Oonegen kemeninuk lagi woraakit nduk, eya mbuuluk eeke nagaatik, ti'nuk, Eerit-eerit o liingge paga eya ndak warogo pege kwak aret menggaarak kwe,

¹⁹It aap maluk mendek nen eerit nugwi ti perak, O apit lombok aago kwak wonogwe me, Iniyogobit lik togon yigeebu wanggwi nogo, “Yi nano nen ee'ninake,” mbaka'lek ugun kobak aret wonogo menggaarak o.

²⁰Naput yi wae. An noone yokkege yi, liippege, Noone wundi wage yi, karuk liirogon konengge, Eeke logot o.

²¹It aakumi wone ti, liippugwi iinok inili ari, It ineebe abok aret obeelom eerogo piige, Eeke menggerak me, An yokkege yi, abok aret kenegen lambek kaagun o. Ata, kinikime lombok patogo logot o.

²³Ndi, keenik logonet, eerit nage logorak ti, Niyo eneeri kwak kiniki aret me, Wone ti unde wake logonet, kiniki inom mondok-mondok unde wakkolage logot o.

²⁴Koone pilit-pilit yuurak eekkake kenok mbo pege, Kambe paga wone maluk mendek wumbuurak eekkake kenok tebenogo wuppege, Eeke logomenggendik,

²⁵Kenegen mondok kenaame mban looge, Kenegen nda na'naga'lek kabu'me mban looge, Eeke logot o.

²⁶ Kiyok tu kenaarak paga pit nage keenok, Eeriyak mbaremenggendak nogo a'me nggelok mban arit nage kaamunggun o.

²⁷Kena agigan agak, ogugan agak, eeke logorak mage o. Ata, maluk eeko menggam kiyok pi noorak eekkake kero, mbo pege logot o.