Read Western Dani Kini Wuppiige 5 Bible Online

Kini Wuppiige 5 - Western Dani bible

Kini Wuppiige 5

¹Naput yi wae. Kat yi wone ndi wone kin kage nogo liirogon porogo wonage, Yi wone ndi wone keenu nogo koone liippunuk agan nege, Eeke logonok nduk, An niniki warak nen wone yokkege yi, liippege, Wone alom abok aret yokkege yi, liirogon konengge, Eeke logot o.

³Nggiin amburu ombat abe pubu wangge menggi kwak kwe mbabilu oone amburu ndik-ndik agan nege, Wam amburu anen pera ari ti mbuuluk negen kwe, kwe ti, oone amburu iya tit agan nege, Eeke menggerak kwe,

⁴Irip paga wam ambiki ale negen age, Paloowi abeenok-abeenok ngget maarak pogom wonage, Eeke menggerak o.

⁵Kwe ti, kanggo menggam iyok pi wangge, Kambunuk nogo menggam iyok pit nage, eeke logonet,

⁶“Neenik logokit nen nonggop eeri?” mbaka'lek ugun wonage, Tu yelok-nggolok nage kwe, eenu aga'lek wonage, Eeke menggerak o.

⁷Togop me, napuri yi wae. Wone yokkirage yi, kinaruk konenggwi, Noone yokkirage yi, mbo punuk nomo agan nogwe, Eeriyak mage o.

⁸Kit tawe kinamburu waganogo it ambi paga pugwi, Kit nda'nogogutak nogo it inanini warak mendek wogorogwe, Kit kinamendek nogo aap inambik nen lek eerogo nawak nduk, wogorogwe, Ta'liila eerumonggotak nogo wonok it aap inalik unde eekkolaawak nduk, iname pi nogwe, Eekwi kiyo, Kwe togop eeke menggerak ti, mbo punuk, arungga'nggi paga panggo yi naga'lek tu tayorogon nogo logonip o.

¹¹Kumi ti mendek muguren nogwe kiinok, andi kolamonggotak paga kineebe-kinowak nenet unggwage kagak, Kambuurak eyom panggoni wage kenok, “Ao,” yinuk, kiniki wakkologo logomunggup o.

¹²Kiniki wakkologo logonet, “Niniki koonnaruwak nduk mamunnirage nogo, Nineebi, lombok mbakwi, Ninaruk wake wone nogo meek mbakwi, Eereegurak nogo Ninela nen eereegurak me, ao,” yogwe,

¹³“It mamunniraga nen mamunnirogwe nogo liippunuk eekwi, Ninaruk waka nen yo'nirogwe nogo ninaruk liirogon konenggwi, Eerulik me,

¹⁴Aakumi ambik lombok kuwak eerak inigen iigak, Ninenggali nen yigeebu abu wambuurak eekwi me, ao,” yogo logomunggup o.

¹⁵Togop eerukwak me, Kit kinanggween lombok kabunik me nen niyo nunggwi, Kinaniyo eneeri tookkologo monggo'nom mban tookkologwe, Eeko logonip o.

¹⁶Ndi, kit kinaniyo eneeri kila-kila tu nggwok paga wundi wage, Kinaniyo elaganggen mbininik nage nogo it inambik inawoore'nggam unggwi nage, Eeke kenok, Ti paga maluk ariyak me,

¹⁷Niyo ti, aakumi inambik inamendek lek kit kinamendek aret me, kinale'nggen paga nonggo logonip o.

¹⁸Kinaniyo eneeri kila-kila lagangge ti, inale'nggen aret wonogwe, Kit kunduk tawe logonet, kinakuwi wogonabumonggotak nogo paga kinale'nggen mbakwi, Eeko logomunggup o.

¹⁹Kit kinakuwi ti, Rusa eebe amuni mbanak kwak, kinom abe wonogwe, Rusa kwak kijang amuni mbanak nege kwak kinom nugwi, Eeko logomunggup me, Kinakuwi inelak paga kiniki kwippinagagwi, Kinabuwa lombok kinombakwi paga yilunogo pinagagwi, Eeko logowak o.

²⁰Togop me, naput yi wae. Kwe mbabilu nen yilunogo pagarak ti paga nano eekkolage, Ndi, aap alik akwe kogome lamookkoloorak ti paga nonggop eekkolage, Eeriyak mbaken? Lek aret o!

²¹Aap eerit nugwi abok aret Aliku ALA enegen iige, Yi tu ndi tu nugwi nogo abok aret enegen wogoren nege, Eeke menggerak o.

²²Aap maluk mendek nen maluk eerit nugwi ti, keele pugu kwak me, inenggaanok nggerenggologwe, Ndi, it inobaalombok inomaluk ti nen keele kwak maarogo pakwi, Eeko menggaarak o.

²³Iniki koonnaruwak nduk wone inaruk wakwi nogo liirogon wagangga'lek me, it ineebe aret kanggwi, Iniki lek wi negen eerit nugwi nogo paga naga'nuk kobak nugwi, Eeko menggaarak o.