Read Western Dani Kini Wuppiige 6 Bible Online

Kini Wuppiige 6 - Western Dani bible

Kini Wuppiige 6

¹Naput yi wae. Kat nen kore ambi, “Kanomat mbanak an nen teenikit o,” yinuk, yoge, At kimbirak menggendak nogo, “Togop aret eeruwok o,” yinuk wone koonogo pege,

²Koone yemenggendak paga kat keele pugu kwak eekkolage, Koone perak togon wundemenggerak paga yilunogo pake, Eeke keenok,

³Kat kore eenggime arumunggun me, wondet eerogo patenok nduk, eeriyak nogo yi o, naput. Kat kore wonageme nage logomenggendik, abu'me tebe yinuk, koone nabek togon yorumunggun o.

⁴Kenegen kubumbunuk nogo yege, nogo lomok ari, Eeka'lek

⁵Nggwiya pigaganggaatak ineenggime nen perak togon mbagangge, Towe pigaganggaatak ineenggime nen perak togon wungge, Eeke menggi kwak Wone ti paga yilinik logukwak perak togon wungge logot o.

⁶Aap eenggi tanep yi wae. Muri'malo wonogwe me pegiya nage, It eeko menggaarak nogo liippiige, Eeke logomenggendik, Kiniki warak eekkolet o.

⁷Muri'malo inoweewi nen wone lengganogo inawuri yorogwe, It eeko logorak koonogo piigwi, inarum wonogwe, Eeka'lek iigak kwe,

⁸It nen o kibi paga inambi pipuk eerogo pakwi, Inambi noorak mendek anggen mbanggwi eyom paga anggen kuwak eerogo pakwi, Eeko menggaarak o.

⁹Aap eenggi tanep yi wae. Kat windak mban wonage, mi'naga'lek nogo mban yege, Eeke keegak, Ne mande ari nagin o?

¹⁰ “Nogo mbuuluk yege, nogo lomok mbuuluk ari, Ne ambiriluk neenggi awiirak wonage, Eerikit,” mbake keegak,

¹¹Aap yogoot kumaaka wage menggi kwak keenggi lek eerogo pagarak koba ari wage, Aap eegin warak amendek wonok negeelik kwak kamendek lek ariyak koba ari wage, Eerigin o.

¹²Aap ambi eeppiyoorak lek kagak inoone mban agan nega nen, aap maluk eeka nen, inoone pilit mban agan nugwi,

¹³Inigen nimik agan nugwi, Iniyok paga nomok yogwe, ineenggi melak yogwe, Eeko logonet,

¹⁴Pilit wone mban inikime yagabit eerak wonage me, maluk eeriyak mban koonit nugwi, Wone waruwak nduk, inikime mambiinet nugwi, Eeko menggaarak o.

¹⁵Togop me, ineebe lek eerogo piyoorak nduk, yini-panip aret maluk inoba ari wage, Yeenggwaaraga'lek iigak, ne ambit liingge inenggaawak lek aganake, Eerigin o.

¹⁶Wone alom aa'nduk nen nok, 6 paga Aliku ALA nen eebi mbake, Alom iyaalok nen nok, tujuh paga at ogole lombok mbake, Eeke menggerak nogo yi o.

¹⁷Wogoppatit inigen mbogut paga nugwi, Pilit wone pugunit nugwi, Maluk eeka'lek iigak inooremenggaarak inamiya ineenggi paga wonogwe,

¹⁸Iniki paga nen maluk eeriyak mban koonit nugwi, Iniyok tekkagaatak maluk eeko menggam ari nogwe,

¹⁹Pilit wone agan nugu logonet, abet mbaruwak agan nugwi, Inoreewi inom wone waruwak nduk, inikime mambiinet nugwi, Eeko menggaarak ti aret.

²⁰Naput yi wae. Kogoba nen, “Yogop ee'nu ndogop ee'nu,” yokkege nogo liirogon unde wonage, Kagalo nen wone mamunggege nogo kobak eerogo pega'lek porogo wonage, Eeke logot o.

²¹Kinikime mondok-mondok nggirik-nggerok eerogo pake, Kagiinggen negen kenggaanok me yirikkolage, Eeke logot o.

²²Ti eeke keenok, wone ti nen nage keegak, tu nikkeren nage, Nogo yege keegak, karum wonage, Keenik age keenok, “Ndogop eeriyak,” yokkege, Eeke logogin o.

²³“Yogop ee'nu ndogop ee'nu,” yokkege yi ti, kandi wuninik kwak wonage, Wone mamunik yi ti, kandi eya kwak wonage, Ndi, eerit nege logorak kiniki kooniyak wone wonage, Eeke menggerak me, Mugurok nage keenok,

²⁴Kumi inobaabut maluk nen yilunogo pagagwi, Kumi inogonggelomini warak nen inoone amburu ndik-ndik yokkugwi, Eerugun lek o.

²⁵Kambi noorak ake kawu ambiriluk wonage kwe, kumi mbabilu nogo nen aret nunggwi, Keenik logorak iya kwe, kumi inogonggelomini warak nen kenggaawak lek eerogo pagarak nduk eekwi, Eeko menggaarak me, “Kumi kigirikwe me,” yinuk, kiniki nengge, Yilunogo pagawok nduk inigen nimik yokkugwi iinok, muguren nege, Eeriyak mage o.

²⁷Aap ambi nen ayum kani nengga'lek kagak, kani kunik ogome palu-palu wonok nage,

²⁸Aap ambi iyok kani nengga'lek kagak, yugum yugu paga iyok pit nage, Eeriyak op mbaken?

²⁹Aap ambi aap alik ambi akwe imbirak nogo yege ti, Ti ndak-ndak aret o. Aap ambi nen aap alik akwe nogo pigagangge kenok, At aaninggin oba arigin lek ti lek, oba arigin aret o.

³⁰Aap ambi mbi abu nen mbi abu lek aruwak nduk kumaake kenok, aakumi inoone yiwu yogulik we mbet mban yogo menggaarak kwe,

³¹Kumaake kagak pigaganggwi kenok perak, Kiraaremenggerak obaane'me ne 7 kuli, “Wogoru,” yoremenggaarak wogoge logonet, Amendek ame wonage abok aret pup eerogo pemenggerak kwe,

³²Aap ambi aap alik akwe pigagangge kenok perak, Iniki lek negen eeremenggerak me eebe aret lek eerogo pake menggerak o.

³³Aap eeremenggerak nogo ti, yawi warogo pugwi, endage meek eerogo pugwi, Eeremenggaarak paga enggali aremenggerak nogo lek arigin lek mondok-mondok aret logogin o.

³⁴Aap akwe wuremenggerak nogo nen anini lombok aremenggerak me, “Onggo eeppikit,” mba'nuk, abuwa mbaka'lek logonet, eeppege logogin o.

³⁵Eeremenggerak onggo wu wogoriyak eeremenggerak kwe, wagangge, Iniki yanggo yuwak nduk, yi mendek ndi mendek kuwak eerogo wogoriyak koonemenggerak kwe, “An woorak mondok neebi aret o,” yinuk ari, Eeke logogin o.