Read Western Dani Kini Wuppiige 7 Bible Online

Kini Wuppiige 7 - Western Dani bible

Kini Wuppiige 7

¹Naput yi wae. Noone ari yi, liirogon wagangge, “Yogop ee'nu ndogop ee'nu,” yokkege nogo kinikime nggirik-nggerok porogo wonage, Eeke logot o.

²“Yogop ee'nu ndogop ee'nu,” an yokkege nogo mugurok nage kenok, keenik aret logomunggun o. An nen wone mamunggege yi, kenegen awuluk unde wakkolage menggendak kwak unde wakkolage,

³Mberaarenggen negen keenggi paga yarogo pake, Yugum tabak paga liiru mbanggo mengga kwak kiniki paga mbanogo pake, Eeke logot o.

⁴Kwe mbabilu nen abu'me pagage, Kwe ogonggelo warak nen oone amburu ndik-ndik yokkege paga nomonggake, Eerukwak, Iniki warak eeppiiga nogo, “Kat niriluk aret o,” yoge, Ndi, yi wone ndi wone ineenu ariyak nogo, “Kit niri wologwe aret o,” yinuk, yorage, eeru o.

⁶Ne ambi paga an nawi wurik me logonet, pugagi ambe mbanak me nen nena wunnage, Awe eyo karo-karo mbaro-karo aago me nen nenegen wunnage, Eeke nagarik,

⁷It wologwe iniki yuundurak negen inenggela'me wulaga ambi nenegen kage, Yi wologwe ndi wologwe inenggela'me wulaga ti, iniki awo kole aga'lek wonage liippege, Eekirak o.

⁸Eeke nagarik, oonegen kilu yi nage, o ndonggo agan nage, Eeke logonet, O apit eerogo pege kagak, wulaga ti, kwe ambi ame tu nage menggim nanuk kwe nogo awoore'nggam ari nage kagarak o.

¹⁰Kage neegak, kwe ambi at ka wundi wage, Ayum kumi mbabilu yikkologo mengga kwak yippunuk, mbagaya negen at ka wage, Eeke kagarak o.

¹¹Kumi ti mendek ti, inoone ambik, iniki worokot, Iname teberogon wonaga'lek

¹²tu nggwok paga wonogwe, Aakumi kuwak eeko menggam wonogwe, Tu andogon-andogon me mi'ndak mban wonogwe, Eeko menggaarak nogo o.

¹³Kwe wundi wage kagarak ti nen wulaga at ka nage nogo lamooppunuk, Agandin eyak mbambunuk, enggali lek aret yoge logonet,

¹⁴“Ala nimbirak lambunik logorak ake name warogo lake, Wokkirigin o, yinuk, wone kumbuk mbaneegirak nogo ne yi paga ndak-ndak aret eeke, Eeke nagarik,

¹⁵Wage keyo, nimbirak lambunikit nduk wundi wage, Tokkeege me, nimbirak lambungge, Eekoorak o.

¹⁶Eekoorak me, an nogo yege minggim paga nogo yum abe yabenggek-ndabenggek aago o Metit mendek ndoonogo pege,

¹⁷Winnaruwam obari abe aruwak nduk, eyo yibinggami inom, eyo ni inom, nggo'nggop inom, yigirogo pit nage, Eekirak o.

¹⁸Ndi, an nogonggelo nogo ti, oome wonage lek ayum awina awu yagabit aago kagak o nda nagaarak ame waga'lek kagak tut ambi penenigin me, Ninoba yanggo yuwak nduk, yine ndonggorogon kunit nogwe, Niniki ale'nggen aruwak nduk ninondogowak nik-nik yogwe, Eekwi niigak, O aret weeruwak nen nimbirak aret nawi o,” yinuk, yoge kagarak o.

²¹Kwe nogo nen oone yorit unggwage paga wulaga nogo iniki nomongge, Oone amburu ndik-ndik yorit unggwi nage paga iniki lek-lek eeke, Eeke kenok,

²²Lembu wariyak ugun kagak wonok nogo mengga kwak, Nggwiya yilunnaburak mbaka'lek keele pugume nonggonnari unggunuk wonage me, maale paga iniki polok yi unggwage kenok, eenu age menggi kwak,

²³Towe keele pugume nggelok yi nage menggi kwak, Wulaga ti, “Eerit nage paga kambigin,” mbaka'lek yini-panip kwe ti mugurok nage kagarak o.

²⁴Togop me, napuri yi wae. Noone ari yi, kinaruk konenggwi, An wone yokkirage yi, liippugwi, Eeko logonip o.

²⁵Kwe ti nen aap yigeebu wuppiigetak ineebe ambik aret wonogwe, Inoorogo piigetak ti, ineenggi lingginiyak meek apit lombok wonogwe, Eerak wonogwe me, Kit ndak-ndak eekkinabukwak, nomo agan at eerit nage menggim nogwe, At eerit nage tu ti paga nogwe, Eeriyak mage o.

²⁷Aakumi kambunuk nogo menggam tu nggwok paga nogwe, Kambunuk nogo menggam ogoorik-ogoorak aago me unggwi nogwe, Eekwi nogo ti, Kwe ti, ame unggwi nanuk, eekwi paga nen aret o.