Read Western Dani Kini Wuppiige 8 Bible Online

Kini Wuppiige 8 - Western Dani bible

Kini Wuppiige 8

¹ Iniki warak nogo nen oone nggwok ari, Yi wone ndi wone eenu nen oone tiyarogon ari, Eekeelik mbakop?

²Puut-puut tu nggwok ambet paga, Tu andogon-andogon lombok paga, At taati mi'narit nage,

³O kota unggwi wogo menggam paga, Tu unggwogo menggam ambe mbanak paga, At oone nggwok ari, Eeke logonet,

⁴Kit aap yi wae. An noone nggwok yokkirage, Kit aakumi abok aret noone tiyarogon yokkirage, Eeke logonet,

⁵Kit kiniki yuundurak yi wae. Kiniki penenak eekkabuwak nduk mamunggologwe, Kit kiniki lek wi negen yi wae. Yi wone ndi wone alom liippakwi, Eeko logonip o.

⁶An wone yokkirage yi, kit koneniyak op aret me, kinaruk konenggwi, An wone yokkirage yi, kit woorak aret me liippugwi, Eeko logonip o.

⁷An noone paga nen maluk wone yuurak neebi mbake minggirak me, noone paga nen ari ti, abet mban aret yokkirage,

⁸Wone nomok-komok ari, wone yuurak lek mendek ari, eekeelik noone nambe paga wundi wage nogo ti, abet mban aret ari, Eeke minggirak o.

⁹It aap wone yelok kaga nen noone ari ti, abe koonak aret ari neegwi, It aap yi wone ndi wone ineenu aga nen noone ari ti, maluk lek abe mban ari neegwi, Eeko menggaarak me,

¹⁰Mbuti perak kolookwak an mamunggirage yi, waganggwi, Mbuti emas abe lombok kolookwak, yi wone ndi wone lippakwi, Eeko logonip o.

¹¹Yugum etenggen kere'li-kere'lo eerak ti, iya negen kwe, Iniki warak nogo ti, mondok iya lombok me, yi mendek ndi mendek uugwe mba'nuk kolamenggaarak nogo Iniki warak ti kwak lek me, imbirak ndak-ndak wakkoorak meek aret o.

¹²Niniki warak lombok ti, an neebe aret me, niniki penenak paga eeka nimbirak aret wonage, Yi wone ndi wone eenu aga inom, wone yelok kaga alom inom, porogo wonage, Eeke minggirak o.

¹³Aliku ALA inagabiti mbakwi ti, “Maluk nineebi o,” mbakwi ti aret. Iniki wogoppakwi, Nit iya, mbakwi, Ineraambe maluk lombok eerit nogwe, Inambokan laganuwak nduk agan nugwi, Eekwi ti, An neebi lombok mbake minggirak o.

¹⁴Inaruk waka, iniki liippunuk koongga, ti, an aret unde wonage, Wone alom ineenu aga, omaawi eeppiiga, ti, an noba mban wonage, Eerak aret agarik o.

¹⁵An ari neenok, it aap inendagembogut wone lengganogo yorogwe, Aap inoweewi nagawan-nagawan nen eekaatak a'me nggelok eeppiigo logorak wone koonogo pugwi,

¹⁶An yorage neenok, aap inendagembogut inawuri yi o ndi o unde wonogwe, Yi aap ndi aap abok aret o nggween paga yime aakumi inowak loonogo piigwi, Eeko menggaarak o.

¹⁷It aakumi iniki kunik ee'nakwi nogo an nen niniki kunik eeginake, It an kwaa'nabit nugwi nogo kwaa'neyaawak nduk, neebe nigiige, Eeke minggirak o.

¹⁸Ineenggi warak inom, inayuk warak inom, an nen aret eeppiige, Yi mendek ndi mendek mondok logorak mendek inom, abe koonak mban eerit nugwi inom, ti, an unde wonage, Eeke minggirak o.

¹⁹Mbuti emas at mendek mban ti, iya negen kwe, An paga nen woorak perak, iya lombok wonage, Mbuti perak abu abe ti, onggo iya tit kwe, An eerit nage paga koloorak ti perak, mondok iya lombok wonage, Eeke menggerak o.

²⁰Abe koonak mban eerit nogo menggam ti paga an nage, A'me nggelok eeko menggam tu ti paga an nage, Eeke logonet,

²¹It an iniki kunik ee'nakwi ti, ineenggi warak eeppiige, Inamendek pogo menggam yagabit eerogo pege, Eeke minggirak.

²² Aliku ALA nen o maan togon yi mendek ndi mendek awo ogobakkigika'lek kagak at nimbirak aret wonagagirak.

²³Mbogut-nggween wakkaga'lek kagak o maan aa'nduk an aret mippangge,

²⁴Niyo kole laut eebe wonage lek kagak, neebe kin eerogo panege, Yi niyo ndi niyo eneeri wundit naga'lek kagak,

²⁵Yi puut ndi puut alom yarit naga'lek kagak, Puut lunik-lunik awo kin aga'lek kagak, O nggween yi inom, o endekem pit nagagim inom, ogobakkigika'lek kagak, Nggween ameneno awo pega'lek kagak, An kin eerogo panege, Eereegerak o.

²⁷An wonage neegak, yi mbogut ndi mbogut wiganogo nappit nage, Yi kole yenggenak mbogut inete imbirak kunogo pege,

²⁸Ndugwi mbogut paga pit nage, Niyo kole yenggenak kiiniki paga nen niyo eneeri wumbit woraawak nduk, eeppege,

²⁹“Kuli yi o,” yoreegerak kagak niyo kole laut ugun-ugun nage logokwak, non mbanogo pege, Nggween alom ndoonogo pit nage, Eereegerak.

³⁰Ti eerit wage kagak, aap eenggi amburu eeka iyaalok an aret nimbirak wonagagirak me, At enggaanom paga nale'nggen mban wonage, At o ogobakkigirogo pit nagagerak kenok niniki ale'nggen mbake, Aakumi ogobakkigirogo piinet nagagerak nogo ninikilom mbarit nage, Eeke neenok, Ko'lu-kii'me inikilom lombok nombake nagagerak.

³²Togop me, napuri yi wae. An eerit nage nogo mugurok nogwe iinok, inale'nggen mbako menggaarak me, An yokkirage yi, kinaruk konenggo logonip o.

³³An mamunggirage yi, mbo puurak ti mage o. Ata, Kinaruk liirogon konenggwi, kiniki warak eekkologwe, Eeko logonip o.

³⁴Aap ambi an noone konenikit nduk eeke logonet, Name nen wundi nage neyo, ko'lu-kii'me to'nake, Naru ngga'nggi paga narum wonage, Eeke kenok ti, Iniki ale'nggen aret logogin o.

³⁵It aap an wo'nakwi iinok, ineenik logorak aret kologwe me, Aliku ALA nen ale'nggen inoba piyaagin kwe,

³⁶It aap an wo'naka'lek mbo panugwi iinok perak, It inobaalombok aret maluk eekkologo menggaarak o. It aakumi an ineebi nombakwi abok aret kambunuk mondok-mondok Ala inom ogoorak logorak inikilom mbako menggaarak o, Yinuk, iniki warak nen yereegerak nogo ti aret o.