Read Western Dani Kini Wuppiige 9 Bible Online

Kini Wuppiige 9 - Western Dani bible

Kini Wuppiige 9

¹Iniki warak nen awi wukkolage logonet, eyo 7 loonak paga o eyak mippunuk wureegerak.

²Wuke nagagerik, wam warogo lake, Anggur amburu ombat abe inom nenggelak-kenggelak eerogo pege, Eeppunuk, Mbi noorak pipuk eerogo pereegerak.

³Pipuk eerogo punuk, ayeloman komologwe nogo O kota tiyarogon nen inoone nggwok paga It aakumi wiiraawak nduk, nappiyareegerak.

⁴Nappiyareegerak nogo nogogwaarik, inoone nggwok paga yorogo logonet, “Kit aap yuundurak yi, woraanip o,” yorogwe, Ndi, iniki awo kole aga'lek nogo yorogo logonet,

⁵“Mbi larogo pigirak nunggwi, Anggur amburu ombat abe inom nenggelak-kenggelak eerogo pigirak nunggwi, Eeriyak woraawak yegerak me, yokkirogo o.

⁶Kinale'nggen logonet, kineenik logomunggup nduk, Kiniki lek wi negen eerit nugwi ti, mbo punuk, Yi wone ndi wone ineenu nen eeko menggam mugurok nogo logonip o.

⁷Kit nen aap miyuk-meya eerogo piiga nogo aruk wakwi kiinok, at nen, Ha! yinuk, kinagi'ndok kangge, Ndi, aap maluk eeka mberugwi kiinok, at nen aret maluk eerogo pinagage, Eerugun me,

⁸Aap meek eerogo piiga ti nen eebi lombok kinombarukwak, aruk wariyak mage o. Aap iniki warak aruk wakwi kiinok perak, iniki kunik eekkinabigin me, aruk wariyak op aret o.

⁹Aap iniki warak aruk wakwi kiinok, abunuk iniki warak age, Aap iniki abe koonak mamunugwi kiinok, ambinom eenu age, Eeke logogin o.

¹⁰ It aap iniki warak mamunggolaawok nduk eekwi ti, Aliku ALA inagabiti mbakwi ti aret. Ndi, at kikak nakeelik alik leenak liippugwi ti, kineenu ariyak alom ti aret.

¹¹Iniki warak nogo mugurok wogwe kiinok, nda'nogogutak ne ambik eerogo pinagage, Kineenik kiigak, yi tahun ndi tahun ambinom eerumunggup nduk, eeppinagage, Eeke logogin o.

¹²Kit kiniki warak wonogwe kiinok, kiniki warak ti nen obeelom eeppinagage, Ndi, kit miyuk-meya eerogo piigwi kiinok, kinalik nen aret maluk eerogo pakwi, Eerumunggup, yegerak o,” yinuk, yorogogwaarak.

¹³Kwe iniki lek yuundurak nen oone ambik ari menggerak. Eeriyak kobak aret wonage, enggali mbaka'lek eerit nage, Eeke menggerak.

¹⁴At awi tungga'nggi paga kwi'nage, Eyo ndoonak tiyarogon kwi'ndak menggam kota paga kwi'nage, Eeke logonet,

¹⁵It yi aap ndi aap tu ti paga nogwe, It aap inobaalombok iniki ugun nugwi, Eekwi nogo Oone nggwok paga yorage logonet,

¹⁶“Aap iniki yuundurak kenok yime woraanip o. Niyo kumaarak ti, ombat abe kogwe, Mbi kumaat-kumaat nunggwi kenok, ombat abe kogwe, Eeko menggaarak o,” yinuk, It iniki lek wiiragaatak nogo nen ineenggo'lek kagak, “Yi abet yigi,” yinuk, mugurok namenggaarak kwe, Nomok togon aakumi kambit nogogwaarak wonogwe me, iya unggwogwe, Ndi, aakumi kanggo menggam aret unggwogwe, Eeko menggaarak o.