Read Western Dani Wone Alom Kibingga 1 Bible Online

Wone Alom Kibingga 1 - Western Dani bible

Wone Alom Kibingga 1

¹WONE ALOM KIBINGGA WONE Aap Ndawut aput wone alom kibinogo yoraga nogo, endagembogut o Yerutalem logonet, yereegerak nogo yi o.

²Aap wone alom kibinogo yoraga nen ari logonet, “Aanom warogo! Abu aanom warogo! Yi mendek ndi mendek abok aret mondok aanom warogo mban wonage menggerak o!” yinuk, ari menggerak o.

³Aakumi nen mo andi kagak yabu ligak wuundamo nggwiirit eerit nugwi ti, nano eekkolaawok nduk, eerit nugwi mbakop?

⁴Aa'nduk ndarak nogwe, peebi nda'narit wundi wogwe, eekwi iigak kwe, Nggween yi perak, lek aga'lek itok aret wonage menggerak.

⁵Oonegen komeninuk lagi wage, kilu yi nage, eeke nagaatik, iyokan mbet-mbet obaane'me ari nanuk, komeninuk lagi wage menggerak.

⁶O wiya o omarip paga nen warit wage nagaatik, wangge'nuk, o ame paga nen nombok-kombok warit negetak-negetak iyokan ame aret ari nage menggerak.

⁷Yi niyo ndi niyo abok aret niyo laut mban iri nagaatak kwe, niyo laut nogo nggwok yenggenit lagangga'lek itok aret wonage kagak, Niyo nogo yungguninuk iyokan eneerime ari nanuk wage menggerak.

⁸Ti eerit nage nogo abok aret niniki koonit noorak anggon ee'ninake me, yuurak abu meek aret age menggerak o. Ninigen nen, “Abu aret kagi o,” ari, Ninaruk nen, “Abu aret konenggi o,” ari, Eekeelik o.

⁹Yi mendek ndi mendek aa'nduk wonagagerak nogo, peebi ti aret age, yi eekak ndi eekak aa'nduk eeko nogogwaarak nogo, peebi ti aret eekwi, Eeko menggaarak me, Oonegen abu'me wonage nogo ti, ngget mendek ambi arigin lek aret o.

¹⁰“Wologwe! Ngget mendek yi kaanip o,” yogo menggaarak aakumi ambi wonogwe ilik, lek a? Lek aret o! Yi mendek ndi mendek aa'nduk lombok wonage, nit nda'naga'lek niigak, wonage, Eeke menggerak nogo lek a?

¹¹Aa'nduk yi mendek ndi mendek arit wagagerak nogo abekwi, ndi, peebi arit nagin nogo, it peebi nda'narugun nogo nen abekwi, Eekulik aret o.

¹²Wone alom kibinogo yoraga an nogo, o Yerutalem logonet aakumi Iterali inowe nendagembogut wonagagirak.

¹³Wonage logonet, yi wone ndi wone alom maloppege, niniki warak paga mbogut abu'me yime eeko menggaarak abok aret liippege, eerikit nduk, niniki mbere lek ambit eeppunuk, eereegirak. Ala nen it aakumi inoba ariyak kooneegerak nogo mondok aaninggin lombok inoba wonage kagagirak.

¹⁴It aakumi oonegen abu'me menggaarak nen yi mendek ndi mendek eekwi abok aret nenegen liippereegirak me, ti abok aret ti, o wiya mugurok nogwe kwe, pigoorak meek kwak we aanom warogo mban eekwi iyareegirak.

¹⁵Koonak lek nggolawe kenok koonggwi, Yi mendek ndi mendek lek kenok ineenggi lingginggwi, Eeriyak meek aret o.

¹⁶ Ti kage nagagirik, niniki mbake logonet, “Aap an mi'naga'lek neegak, o Yerutalem wone lengganogo yorogo nogogwaarak nogo abok aret ndak-ndak lek an mban nendage nggwok age, niniki warak lombok age, eeke logonet, an niniki warak lombok age, yi wone ndi wone ambik neenu age, eekirak kagi,” mbareegirak.

¹⁷Mbake nagagirik, aap iniki warak koonggwi alom inom, aap iniki lek kumili iniki koonggwi alom inom, liippikit nduk, niniki mbere lek ambit eeppunuk, eereegirak kwe, Iniki warak eekko'net nogo logonet, aaninggin inoba patit wogwe, Yi wone ndi wone ineenu arit nogo logonet, iniki andi eerogo pakwi, Eeko menggaarak neenu agagirak me, An eerikit mbareegirak nogo ti, o wiya mugurok nogwe kwe, pigoorak meek kwak aret eeriyak kagagirak o.