Read Western Dani Wone Alom Kibingga 10 Bible Online

Wone Alom Kibingga 10 - Western Dani bible

Wone Alom Kibingga 10

¹Obari abe toolak me, ti'neebon yonggo'na'nuk kanggetak obari ndi wuke menggi kwak, Iniki lek wi negen eeko mengga kwak mbuuluk eerit nage paga at iniki warak logonet ayuk warak wonage nogo lek aret age menggerak.

²Aap ambi iniki warak nen eenggi abe'nggan paga noorak koongge kagak kwe, Aap iniki lek wi negen nen perak, eenggi kwaare'nggan noorak koongge menggerak.

³Aap iniki lek wi negen nogo eerit nage logonet, Iniki lek me, agan nage paga aakumi abok aret, “Aap ti, iniki lek wi nen agan nege, kogo o,” mbako menggaarak.

⁴Iniki yanggoppunuk wonogwe paga maluk nggwok lombok eeriyak age nogo lek aret age menggerak me, Aap karum menggerak nogo nen mbekkege kenok, kat yabu unde logorak yokkereegim nen mbo punuk mbaganiyak mage o.

⁵Oonegen abu'me yime maluk lombok it aap aakumi inarum menggaarak nen eeko menggaarak mendek ambi eekwi iigirak nogo ti,

⁶Aap iniki lek wi negen nen it aap inendage warak eeko menggam eekwi iigak, it aap ineenggi warak nogo it aap inendage tebenak eeko menggam eekwi,

⁷Ndi, aap inayeloman kuda paga kwi'na'nuk nogwe iigak, Aap nagawan-nagawan nogo nen aakumi inayeloman mini tu iniyok paga nogo mengga kwak nogwe, Eekwi iigirak o.

⁸ Aap ambi nen nggween kabunogo pakim nogome at aret yobok togon wangge, Ambi nen yugum yagat eno pelengge me, waalo nen eyak mbangge,

⁹Ambi nen yugum yanggungge me, telok togon wakkolage, Ndi, ambi nen kani pooke me, mbeyok togon wakkolage, Eeko menggaarak.

¹⁰Yembuti ngget lek agaatak maarak lek kenok, eyo muuriyak inomaawi lek age menggerak kwe, Aap iniki warak nen perak, ye nogo ngget maappunuk, ale'nggen paga eyo muurit nage menggerak.

¹¹Waalo muuru, “Keyak mbaninaburak mage o,” yoga'lek kagak inooke kenok, Aap, “Keyak mbaninaburak mage o,” yoga nogo, yori noorak ti, we aanom warogo aret o.

¹²Aap iniki warak nen inoone yogwe ti, aakumi koneniyak inikilom mbako menggaarak kwe, Aap iniki lek wi nen agan nogwe paga perak, it ineebe aret lek eerogo pako menggaarak.

¹³Inoone aa'nduk wundi wage nogo ti, aap iniki lek wi inoone yogwe kwak yogo nagaatik, Irip paga perak, it aap iniki mbanak kwak aret yogo menggaarak.

¹⁴It aap iniki lek wi negen nogo inoone ambik agan nogo menggaarak o. Aakumi nen nonggop arigin nogo, ineenggo'lek aret wonogo menggaarak. Ndi, it kanggwi iigak, “Ndogop agaarak o,” yinuk, ta nen it aap ti yoroorak mbakop? Lek aret o.

¹⁵Aap iniki lek wi nen yabu ta'liila eerit nage nagaatik, ame o kota noorak kobak aret age menggerak.

¹⁶Kat o yi wae. Kat kowe endagembogut ti, it aakumi ugun inaput wonage, It karum menggaarak nagawan-nagawan nen kubondendok kagak laago lappunuk, nunggo logonet, ugun-ugun eekwi, Eekwi iinok, kat kabuwa o!

¹⁷Kat o yi wae. Kowe endagembogut ogoba obaane'me mi'ndak wonage, Ndi, it karum menggaarak nogo nen kumili aganaburak nduk lek inomaawi eekkolaawok nduk, ndi eyom paga noorak koonak nogo mban nunggwi, Eekwi iinok, Kale'nggen kage logomunggun o.

¹⁸Aap yabu eeriyak eebi mbaka awi oo'ngget maarak miya-miya wangge, Aap eenggi tanep kenok, awi terap wambi wage, Eeke menggerak.

¹⁹Laago lakwi ti, inale'nggen mbariyak ake, Anggur amburu ti, inale'nggen nen inoone ugun agan nugu logorak ake, Aret menggerak kwe, Wu ti perak, yi mendek ndi mendek eeriyak ake aret menggerak o.

²⁰Kat koone yemenggendak nogo towe o oolo ya'i wonage nen wonok nage, Kat yemenggendak nogo a'naabit warak nen yorenet nage, Eeke kero, Kat kinikime nen aap endagembogut meek eerogo pege, Ndi, kat nogo yege menggenom logonet, aap eenggi warak pulunogo pege, Eeriyak mage o.