Read Western Dani Wone Alom Kibingga 11 Bible Online

Wone Alom Kibingga 11 - Western Dani bible

Wone Alom Kibingga 11

¹Kat kambi ugun niyo ogumbaga yumbunogo nappege keenok, ne mande negen logonuk, kowagam ari wage kaamunggun o.

²O nggween paga yime maluk ariyak nogo kat keenggo'lek me, kambi aap ineebe 7 wogorage logonet, aap ambi inom wogoge logot o.

³Ndugwi paga nen mayu narogo punuk, nggween paga lubu-lubu wambit wage menggerak. Eyo ambi aan woguk togon o omarip paga pa'nggwe ngginnari nage, ambi o ame paga pa'nggwe ngginnari nage, Eeke nagaatik, wambemenggim time aret wonage menggerak.

⁴Aap ambi nen o wiya wage nogo lek aruwak nduk, tokkage logonet, yi awi ndi awi yumbunit nage, Ndi, ndugwi lek aruwak nduk enegen mban wagangge logonet, yi anggen ndi anggen mbanggolage, Eekeelik o.

⁵O wiya nggeeme nen warit wage, Ndi, kwe ambi aagaluk inikime logombunuk nonggoti eenggi-iyok warak age, Eeke menggerak Kat keenggo'lek menggen kwak At yi mendek ndi mendek ogobakkigika Ala nen eeke menggerak nogo, kat keenggo'lek aret wonage menggendak o.

⁶Iri'ngga yumbunemenggendak nogo, “Ambi ti, op arigin,” ilik, “Ambi ti op arigin a?” Ilik, “Imbirak aret obeelom aremenggi a?” nogo ti, kat keenggo'lek me, O kubondendok paga yi mendek ndi mendek awi yumbunit nage, ndi, o kiyoma kunduk, keenggi awiirak puk wonaga'lek eerit nage, Eeke logot o.

⁷O eya ti, aakumi iniki ale'nggen eeginake me, Oonegen inigen pekkogwe iinok, inale'nggen mbako menggaarak.

⁸Togop aret me, aap ndarak kagak tahun ambik age kenok, inikime nen ale'nggen mban mbake logowak o. Ale'nggen mban mbake logorak ti op aret kwe, o nggween paga yime logonet, o eya kaga'lek apit paga logorak ne ambik aret ariyak abeke logowak o. Yi eeriyak ndi eeriyak abok aret ti, we aanom warogo mban aret wonage menggerak.

⁹Wulaga tawe yi wae. Kat awo tawe wonage logonet, kiniki ale'nggen mbake, Kat awo tawe paga kiniki ale'nggen nen eerit nage, Eeriyak eekkake nogo mugurok nage, Kenegen kenok eerit nage, Eeke logorak ti op aret kwe, Yi eekak ndi eekak eeremenggendak abok aret nogo paga Ala nen kowak loonigin mbake logot o.

¹⁰Togop me, kat keebe tawe aret wonage, Ndi, tawe logonet komaawi paga eerit nage, Eeke ti, We aanom warogo aret me, “Eerikit lak, ao,” yinuk, kiniki piirik wonage, Kagabolo andi-pandi eekkake kenok, kagabiti mbake, Eeriyak mage o.