Read Western Dani Wone Alom Kibingga 12 Bible Online

Wone Alom Kibingga 12 - Western Dani bible

Wone Alom Kibingga 12

¹Kat awo tawe logonet, at ogobakkigirogo pagareegerak nogo abeke logot o. Maluk koba ariyak ne nogo awo ari waga'lek kagak, “An nda'nagagirak yi tahun ndi tahun ari nage kagak, niniki ale'nggen ee'nabigin lek kagi o,” yuurak eyom awo panggoni waga'lek kagak,

²Oonegen inom, o eya inom, tut inom, laaluguragan inom, awo yumaak aga'lek kagak, Mayu wage nagaatik, ndugwi nogo obaane'me ogom eerogo pi lagangga'lek kagak,

³It o arum menggaarak nogo inaganak lele yaga'lek kagak, Aap inomaawi ambik kwe, inamborowak yomongga'lek kagak, Kumi anggen yigika nogo ineebe mbereeret me, yigika'lek puk ariyak eyom aga'lek kagak, Pugagi ambe mbanak me, inigen pekkoorak yumaak aga'lek kagak,

⁴Tu nggwok paga wundi nogo menggam tu nogo naka'lek kagak, Yigikwi oone ari nogo oone lek arit wangga'lek kagak, Towe inoone yogwe iinok, mi'nariyak eyom aga'lek kagak, Kumi ndawi wakwi abok aret inoone nggobo agan wangga'lek kagak,

⁵Tu tiyarogon nugu logorak inagabiti mbariyak eyom aga'lek kagak, Tu nggwok paga noorak inagabiti mbariyak eyom aga'lek kagak, Eyo mbogombi ambit-mbit wariyak eyom aga'lek kagak, Wurin nabuk-kabuk noorak eyom aga'lek kagak, Iniki aganggen aganake lek ariyak eyom aga'lek kagak, Kame mondok-mondok logowam noorak eyom aga'lek kagak, Kerabun ndooniyak eyom awo ari naga'lek kagak, At ogobakkigirogo pagareegerak nogo abeke logot o.

⁶Mbutigeele perak nggaruk ari, Mbuti emas paga ndi ogobakkigirik telok ari, Niyowak nggween paga eerak niyo eneerime nen telok ari, Niyo tookak agale niyo tookak nggween kabunik me taati nen nggaruk ari,

⁷Ndi, kat keebe liirubu paga eerak me, kiyokan nggween ari nage, Kiniki at nen wokkereegerak iyokan Ala wonageme ari nage, Eeka'lek kagak, At ogobakkigirogo pagareegerak Ala nogo abeke logot o

⁸Wone alom kibinogo yoraga an nen, “Aanom warogo aret! Aanom warogo aret! Yi mendek ndi mendek abok aret ti, we aanom warogo mban aret wonage kage minggirak o,” yinuk, yereegirak o.

⁹At wone alom kibingga nogo ti, iniki warak aret wonagagerak. Ndi, iniki warak logonet, it aakumi at apuri nogo wone ineenu aruwak nduk mamunirage, aakumi yogo nogogwaarak wone abok aret liippege, kuwak eerogo liiru mbangge, peebi-aa'nduk yogo logorak nogo koonogo pege, eereegerak.

¹⁰At nen yi wone ndi wone iniki ale'nggen mbariyak wone kwaarit nage, kwaake nagaatik, yogo nogogwaarak nogo ndak-ndak liiru mbanikit nduk, wakkagak mban eeke, eereegerak.

¹¹Aap iniki warak nen wone yogwe nogo ti, yawi wam teegak kwak wonage, ndi, wone yogo nogogwaarak kuwak eerak nogo ti, pulu eyo paga warak kwak wonage, eerak menggerak me, wone ti abok aret at ndegenninaka ambit nen aret wo'niragagerak o.

¹²Togop me, naput o. Wone alik ambi inom nabenogo pukwak, wone yi liirogon unde logot o. Yi mbuku ndi mbuku liiru mbanit no-no irip paga, “Abu mbanggo,” yinuk, puk aga'lek mbanit mban nogwe, ndi, mbuku malenit nogwe tit niigak nineebe ndeyak ee'ninabit unggwage kwe kagak, malenit mban nogwe, eeko monggoorak.

¹³Yi mendek ndi mendek eereegwaarak abe inom, maluk inom, kumaarak wonage nogo abok aret, Ala nen wonok inowak loonigin me, wone agan wagarak nogo abok aret liippunuk, irip paga ambit eeko logorak nogo ti, Ala ninagabiti mbakwi, Ndi, “Yogop ee'nu, ndogop ee'nu,” wone yugu nogo porogo logonet, eerit nogwe, Eeko logorak ti aret! Wone yi ti, it aakumi abok nen eeko logorak ti aret o.