Read Western Dani Wone Alom Kibingga 2 Bible Online

Wone Alom Kibingga 2 - Western Dani bible

Wone Alom Kibingga 2

¹An ninikime nen ari logonet, “Niniki yi wae. Nale'nggen mbariminggirak ti paga ambi abe ariyak kaamun ilik?” yinuk, wakkagatak kwe, ti kunduk, ndak-ndak we aanom warogo aret ariyak kage,

²ndi, i'ndok kambuurak nogo kunduk ti, aap wi yogo mengga kwak aret yuurak me, ambi eekkoloorak lek kagak yogwe kage, eereegirak o.

³Nogo kage nagagirik, niniki mbake logonet, “Aakumi inapuri mbogut abu'me ineenik luulu wonogwe yi nen nonggop eekkologwe paga irip paga op eekkoloorak mbakwi iyaamun,” yinuk, neenu arikit nduk, niniki warak nen liirogon koonogo yo'nege kagak, nale'nggen kaakit nduk, wi negen nen eeko mengga kwak anggur amburu noorak wakkagagirak o.

⁴ An yi yabu ndi yabu nggwok lombok eeke logonet, yi o ndi o wurogo patit nage, neyabume anggur awi yarogo patit nage,

⁵yabu yagat wurogo pit nanuk, iri'ngga-kale'ngga anggen laambu awi yarogo pit nage, yi eyo ndi eyo alitak lombok anggen yege menggerak awi yarogo pit nage, eereegirak.

⁶Eeke nagagirik, yarak nogome mili kwit agan lagangge logowak nduk, niyo kilirogo pit nagak ake nggween kabunogo pit nage,

⁷ an nayeloman mini aap inom, kumi inom, inonggo mbanogo piya wage, nayeloman mini name logonet, ndarak ambik lombok wonogwe, an mi'naga'lek neegak, o Yerutalem wonogogwa kwak lek an naanggumi lembu-tapi inom, kambin-ndomba inom, ambik lombok unde wonage,

⁸ aap inendagembogut inom, it inabu'me logonet yi o ndi o unde menggaarak inom, inamendek iniki kundugu mbuti perak inom, emas inom, kuwak eerogo pako menggaarak mendek, an kuwak eerogo pake, ndawi tiyanggak kumi-aap koonogo piige, aap iniki ale'nggen eeppiigak kumi nogo kuwak eerogo piige, eeke nagagirak o.

⁹ Togop aret eeke logonet, an mi'naga'lek neegak aap yo'nggok o Yerutalem wonogogwa kwak lek an abu tiyanak nggwok lombok logonet, niniki mondok warak aret wonagagirak.

¹⁰Yi mendek ndi mendek nenegen kenok, uugwe mbake nogo mbo pege, Nale'nggen kaakit nduk, niniki nengge nogo, “Neebi,” mba'nuk, tebenogo wuppege, Eeka'lek Ligak wuundamo eerit nage paga nale'nggen mbake, Ligak wuundamo eeke onggo nale'nggen ti aret kage, Eeke nagagirak kwe,

¹¹An neenggi paga nen eerit nagagirak nogo abok aret maloppege, Ligak wuundamo eeke nagagirak nogo abok aret liippege, Eeke nagagirik, “Ti abok aret o wiya mugurok nogwe kwe, pigoorak meek kwak aanom warogo aret eerit nage kage, Oonegen abu'me logonet, eerit nogwe paga ambi kologo mengga kwak lek we aret eeke, Eekirak kagi,” mbareegirak.

¹²Ti'nuk, melak togon niniki koongge logonet, Iniki warak inom, iniki lek kumili inom, koonggwi nogo liippuurak mbareegirak. Aap endagembogut obaane'me ambi mi'nage kenok, nano eeke logogin mbakop? Lek o. It aakumi inoweewi inendagembogut aa'nduk eeko nogogwaarak nogo ndak-ndak aret eeke logogin o.

¹³O apit ti, meek, ndi, o eya ti, iya, menggi kwak, Iniki lek nogo ti, meek, ndi, iniki warak nogo ti, iya lombok kagagirak.

¹⁴Aap iniki lek wi ti, tu o apit paga nogwe, ndi, aap iniki warak ti, inigen wonage me, tu eya paga nogwe, Eeko menggaarak kwe, Irip paga eeppiyoorak koonak nogo ndak-ndak inoba arigin neenu agagirak o.

¹⁵Neenu age nagagirik, niniki mbake logonet, “Aap iniki lek wi oba abeka'lek mbet-mbet mari eerogo pogo mengga kwak, aap iniki warak ndak-ndak oba abeka'lek mbet-mbet kobak age, Ndi, aap iniki lek wi kangge menggi kwak, aap iniki warak togop aret kangge,” Eekwi kage nagagirik, Niniki koongge logonet, “Aap iniki lek wi inoba ariyak koonak nogo an kunduk noba arigin me, Niniki warak ariyak ti paga nano eekkoloorak? Lek aret kagi,” Mba'nuk, iniki warak ariyak ti kunduk, we aanom warogo mban ariyak aret mbareegirak.

¹⁷Oonegen abu'me logonet, eerit nugwi nogo liippit ungguurak anggon lombok ee'nabeegerak me, neenik wonage logorak neebi lombok mbareegirak. Mbake logonet, yi eekak ndi eekak eerit nugwi abok aret ti, o wiya mugurok nogwe kwe, pigoorak meek kwak we aanom warogo aret kagagirak.

¹⁸Oonegen abu'me logonet, ligak wuundamo kuwak eerogo pit nage nagagirak abok aret kangge neegak, at nobaane'me ariyak nogo unde arigin me, kuwak eerogo pit nagagirak nogo an neebi lombok mbareegirak.

¹⁹Aap nobaane'me arigin ti, iniki warak ilik, iniki lek wi a, neenggo'lek kwe kagak, oonegen abu'me logonet ligak wuundamo eereegirak inom, niniki warak logonet eerit nage nagagirak inom, abok aret at nen aret unde arigin me, ti kunduk, we aanom warogo mban aret eeriyak kagagirak.

²⁰Togop aret me, “An oonegen abu'me logonet, ligak wuundamo nggwiirit eerit nage nagagirak nogo abok aret aanom warogo kagi,” yinuk, niniki wakkolagagirak.

²¹“Niniki wakkolage logonet, aap iniki warak paga, yi wone ndi wone eenu paga, eenggi amburu paga, yabu nggwiirit-nggwaarit eeremenggerak kwe, amendek abok aret mbo punuk nage kagak, aap alik ligak wuundamo eeka'lek logomenggerak nen unde arigin me, ti kunduk, we aanom warogo aret eeke, eeriyak lek mendek kagak eeke, eeriyak kagi,” mbareegirak.

²²Aap oonegen abu'me logonet, nggwiirit-nggwaarit eerit nage, iniki piirik logonet, eerikit nduk wakkanet nage, eeremenggerak nogo paga nano eekkoloorak nduk, eerit nage agaarik mbakop?

²³ At awo eenik wonage logonet, eerit nage paga andi-pandi kage, iniki aaninggin ndugu agan nage, ndi, oonikiya paga kunduk, iniki ugun tayenak wonage lek ando pemenggerak nogo mban iniki koonit nage, eeke menggerak me, ti kunduk, we aanom warogo aret eeke menggerak mbareegirak.

²⁴ Togop aret me, aap ambi nen, “Eekirak abu op aret kagi,” mbariyak nogo ti, mbi nengge, niyo nengge, ligak wuundamo eerit nage paga ale'nggen mbake, eeke logorak ti aret o. Ala nen eeppega'lek kagak aap ambi mbi nengge, ale'nggen kage, eeriyak meek me, mbi nengge, niyo nengge, ligak wuundamo eerit nage paga ale'nggen mbake, eeruwak nduk, at Ala nen aret eeppiige menggerak kagagirak o.

²⁶ Togop aret me, aap ambi nen Ala inikilom ombaruwak nduk eeke kenok, Ala nen iniki warak eeppege, yi wone ndi wone eenu eeppege, iniki ale'nggen mbaruwak nduk eeppege, eeke menggerak kwe, it aap maluk mendek perak, wu kwaarit nugwi, yi mendek ndi mendek kunogo kuwak eerogo pakwi, eeppunuk, it aap Ala nen inikilom mbake nogo wogorogo logorak ineyabu ti aret unde eeppiige menggerak. Ti eeriyak kunduk, o wiya mugurok nogwe kwe, pigoorak meek kwak, we aanom warogo eeriyak aret kagagirak o.