Read Western Dani Wone Alom Kibingga 3 Bible Online

Wone Alom Kibingga 3 - Western Dani bible

Wone Alom Kibingga 3

¹Yi mendek ndi mendek o nggween paga wonage abok aret ariyak eyom wonage, Mbogut abu'me yime yi eeriyak ndi eeriyak eyom abok aret punik wonage, Eerak menggerak.

²Nda'nariyak eyom wonage, kambuurak eyom wonage, Awi yariyak eyom wonage, eebe ndariyak eyom wonage,

³Inooriyak eyom wonage, obeelom eeppiyoorak eyom wonage, Minogo puurak eyom wonage, wuriyak eyom wonage,

⁴Leenggu maariyak eyom wonage, i'ndok kambuurak eyom wonage, Iniki puru yuurak eyom wonage, kwirabik-kwirabok yuurak eyom wonage,

⁵Yugum mbo nappuurak eyom wonage, yugum kuwak eerogo puurak eyom wonage, Lamooriyak eyom wonage, lamoorinaka'lek tayo yuurak eyom wonage,

⁶Kwaariyak eyom wonage, kwaaka'lek mbo puurak eyom wonage, Patogo logorak eyom wonage, mbo puurak eyom wonage,

⁷Nibik yuurak eyom wonage, penggaariyak eyom wonage, Inoone yuurak lek eyom wonage, inoone yuurak eyom wonage,

⁸Inabuwa mbariyak eyom wonage, ineebi lombok mbariyak eyom wonage, Wim namburiyak eyom wonage, lambuniyak eyom wonage, Eerak menggerak.

⁹Togop aret me, aap yabu eeka ti, nano eekkolaakit nduk ligak wuundamo eerit nage menggerak?

¹⁰Aakumi yabu nggwiirit-nggwaarit eeruwak nduk, Ala nen unde eeppiyareegerak nogo, an abu liippereegirak o.

¹¹At Ala nen, “Ndi eyom paga abu kigirikwe lombok arigin o,” yinuk, koonogo pereegerak nogo eyom ari nage kenok, yi mendek ndi mendek abok aret obeelom kigirikwe age menggerak o. Ndi, it aakumi nen, “Nabelan-kabelan kolaawok lak ao,” mbaruwak nduk, at Ala nen ti kunduk inikime manabeegerak kwe, o aa'nduk nen eerit irip paga eeri nage nogo aakumi nen liippega'lek aret wonogo menggaarak o.

¹²It aakumi nen alik ambi eeriyak lek ineenik wonogo logonet, iniki ale'nggen paga obeelom mban eerit nogwe ti mban abu obeelom aret kage,

¹³aakumi inalitik-inalitak mbi nunggwi, niyo nunggwi, ndi, yabu ligak wuundamo eeppunuk, inale'nggen paga wonogwe, eekwi ti, at Ala nen mban eeppiige kage, eeke minggirak o.

¹⁴At Ala nen yi mendek ndi mendek eeke menggerak nogo ti, at ayuk wuko logowak nduk, mondok-mondok eeke menggerak me, aakumi nen ambinom nabenogo pugwi, ambi lek eerogo pugwi, eeriyak meek aret kage minggirak o.

¹⁵Yi mendek ndi mendek yogondak wonage yi, eebe lek kagak, aa'nduk lombok wonagagerak. Ndi, peebi ariyak kunduk, aa'nduk wonagagerak mban. Aa'nduk lombok wonagagerak nogo peebi aruwak nduk, Ala nen aret koonogo pege menggerak.

¹⁶It oonegen abu'me menggaarak nen eerit nugwi ambi kagagirak nogo yi o. Aakumi inowak loonggo menggam time maluk-maluk inowak loonggwi, Ndi, a'me nggelok eeppiigo menggam time eekaatak a'me nggelok eeppiiga'lek alik eeppiigwi, Eekwi iyareegirak.

¹⁷Iige nagagirik, niniki mbake logonet, “Yi mendek ndi mendek ariyak eyom wonage, Ndi, yi eeriyak ndi eeriyak eyom wonage, Eerak menggerak me, It aakumi iniki abe koonak inom, aap iniki maluk inom, imbirak at Ala nen inowak looninabigin o,” yinuk, mbareegirak.

¹⁸Mbake nagagirik, ambi mbake logonet, “It aakumi ti, nggeewo-wam ndak-ndak wonogwe kogo o, mbaruwak nduk, Ala nen inabut mbangge menggerak.

¹⁹Aakumi ari noorak ti, nggeewo-wam ndak-ndak ari nagun me, imbirak aganaburak ti, at ambi kangge kwak, at ambi aret kangge, eeko menggaarak. Aakumi ti iya, ndi, nggeewo-wam ti, meek lek inambe aagi imbirak ndak-ndak aret me, abok aret ti, we aanom warogo aret menggaarak.

²⁰It imbirak nggween mendek wogome, imbirak ndak-ndak iniyokan ngggween aret ari nagun o.

²¹Ari nanuk, aap ogoma agi nage, nggeewo-wam inogoma nggween abu'na wanggwi, eeriyak ti, aap ta nen eenu wonage mbakop? Lek aret,” mbareegirak.

²²Aakumi ari noorak ti aret me, ndi, it ti nogwe iinok, aap ambi nen peebi eeriyak nogo it aap ti inigen kaawak nduk, titik iraagin mbakop? Lek aret me, ambi eeko logorak lek yabu eerit nogwe paga mban inale'nggen mbako logorak ti aret kagagirak o.